കോവിഡ് ചട്ടം ലംഘനം; വിവാഹ ചടങ്ങുകള് നടത്തുകയും ഭക്ഷണം വിളമ്പുകയും ചെയ്ത എം.സി.പി കണ്വെന്ഷന് സെന്ററിന്റെ ലൈസന്സ് സസ്പെന്ഡ് ചെയ്തു, പ്രവര്ത്തനാനുമതി നിഷേധിച്ചിരിക്കുന്നത് 2021 ഒക്ടോബര് 31 വരെ
സംസ്ഥാനത്ത് പ്രാബല്യത്തിലുള്ള കോവിഡ് ചട്ടം ലംഘിച്ച് വിവാഹ ചടങ്ങുകള് നടത്തുകയും ഭക്ഷണം വിളമ്പുകയും ചെയ്ത എം.സി.പി കണ്വെന്ഷന് സെന്ററിന്റെ ലൈസന്സ് സസ്പെന്ഡ് ചെയ്ത് ഉത്തരവ് പുറപ്പെടുവിച്ചു. കേരള മുനിസിപ്പാലിറ്റീസ് ആക്ട് പ്രകാരം നഗരസഭ സെക്രട്ടറിയാണ് ഇതുസംബന്ധിച്ച ഉത്തരവ് പുറത്തിറക്കിയിരിക്കുന്നത്.
സെന്ററിന് പ്രവര്ത്തനാനുമതി നിഷേധിച്ചിരിക്കുന്നത് 2021 ഒക്ടോബര് 31 വരെയാണ്. കണ്വെന്ഷന് സെന്റര് നില്ക്കുന്ന 12ാം വാര്ഡ് തീവ്രലോക്ഡൗണ് പരിധിയില് ഉള്പ്പെട്ട വേളയില് ജില്ല ഭരണകൂടത്തിന്റെ ഉത്തരവ് ലംഘിച്ച് പ്രവര്ത്തനം നടത്തിയതിനാണ് നടപടി സ്വീകരിച്ചിരിക്കുന്നത്.
അതോടൊപ്പം തന്നെ പ്രവര്ത്തനം സംബന്ധിച്ച് നഗരസഭയില്നിന്ന് നല്കിയ അറിയിപ്പുകളും നോട്ടീസുകളും ലംഘിച്ചതായും ഉത്തരവില് വ്യക്തമാക്കുന്നു. ഉത്തരവിന്റെ പകര്പ്പ് ജില്ല ഭരണകൂടത്തിനും കണ്വെന്ഷന് സെന്റര് ലൈസന്സിക്കും സര്ക്കിള് ഇന്സ്പെക്ടര്ക്കും നഗരസഭ ഹെല്ത്ത് സൂപ്പര്വൈസര്ക്കും കൈമാറിയിട്ടുണ്ട്. കോവിഡ് ലംഘനങ്ങളുടെ പേരില് ലൈസന്സ് സസ്പെന്ഡ് ചെയ്യാന് നഗരസഭക്ക് അധികാരമില്ലെന്ന് നഗരസഭ ഭരണ നേതൃത്വം വിശദീകരിച്ച് ദിവസങ്ങള് പിന്നിടുന്നതിന് മുമ്ബാണ് ഉത്തരവിറങ്ങിയത്.
കൂടാതെ കോവിഡ് ചട്ട ലംഘനത്തിന് കണ്വെന്ഷന് സെന്ററിന്റെ പേരില് നടപടി സ്വീകരിക്കണമെന്ന് കാട്ടി വാര്ഡ് കൗണ്സിലര് മാര്ട്ടിന് ആലേങ്ങാടനും എല്.ഡി.എഫ് കൗണ്സിലര്മാരും സി.പി.ഐ ലോക്കല് സെക്രട്ടറി കെ.എസ്. പ്രസാദും അധികൃതര്ക്ക് പരാതി നല്കിയിട്ടുണ്ടായിരുന്നു. വിഷയം ചര്ച്ച ചെയ്യാന് എല്.ഡി.എഫിന്റെയും ബി.ജെ.പിയുടെയും ആവശ്യ പ്രകാരം അടിയന്തര കൗണ്സില് ചേര്ന്നിരുന്നു. ലൈസന്സ് സസ്പെന്ഡ് ചെയ്യണമെന്നും വിഷയത്തില് വോട്ടെടുപ്പ് നടത്തണമെന്നും ആവശ്യം ഉയര്ന്നെങ്കിലും ഇക്കാര്യത്തില് നഗരസഭക്ക് അധികാരമില്ലെന്ന് പറഞ്ഞ് യോഗം ചെയര്പേഴ്സന് പിരിച്ചുവിടുകയായിരുന്നു.
https://www.facebook.com/Malayalivartha
