ക്ലാസ്​ തുടങ്ങിയിട്ടും സംസ്ഥാനത്ത്​ പ്ലസ് വണ്‍ പ്രവേശനം ലഭിക്കാതെ പുറത്തിരിക്കുന്നത് അര ലക്ഷം വിദ്യാര്‍ഥികള്‍. ഒന്നാം സപ്ലിമെന്‍റിന്​ ശേഷവും 50,000 ലധികം പേര്‍ക്ക് സീറ്റ് കിട്ടിയില്ല. പ്ലസ്​ വണിന്​ ഒന്നാം സപ്ലിമെന്‍ററി അലോട്ട്മെന്‍റില്‍ അപേക്ഷിച്ചിട്ടും സീറ്റ്​ ലഭിക്കാത്തവര്‍ക്ക്​ രണ്ടാം സപ്ലിമെന്‍ററിറി അലോട്ട്മെന്‍റിന് അപേക്ഷ പുതുക്കി നല്‍കാം.

നിലവിലുള്ള ഒഴിവിന്​ അനുസൃതമായി ഓപ്ഷനുകള്‍ പുതുക്കി നല്‍കാനാണ്​ അവസരം. നവംബര്‍ 17 ന് രാവിലെ 10 മണി മുതല്‍ നവംബര്‍ 19 ന് വൈകീട്ട് നാലുമണിവരെയാണ്​ അപേക്ഷിക്കാനുള്ള സമയം. ക്യാന്‍ഡിഡേറ്റ് ലോഗിനിലൂടെയാണ്​ അപേക്ഷ പുതുക്കേണ്ടത്​.

സ്കൂള്‍/കോമ്ബിനേഷന്‍ ട്രാന്‍സ്​ഫറിന്​ ശേഷമുള്ള ഒഴിവുകളും രണ്ടാം സപ്ലിമെന്‍ററി അലോട്ട്മെന്‍റിനെ സംബന്ധിച്ച വിശദ നിര്‍ദ്ദേശങ്ങളും നവംബര്‍ 17ന്​ രാവിലെ 9 മണിക്ക്​ പ്രസിദ്ധീകരിക്കുമെന്നും പൊതുവിദ്യാഭ്യാസ ഡയരക്​ടര്‍ അറിയിച്ചു.

മലപ്പുറം കോഴിക്കോട് പാലക്കാട് ജില്ലകളിലാണ് കൂടുതല്‍ പേര്‍ക്കും സീറ്റില്ലാത്തത്. മലപ്പുറം (14,460), കോഴിക്കോട് (6660), പാലക്കാട് (6384) വിദ്യാര്‍ഥികളാണ് സീറ്റ് കിട്ടാതെ പുറത്തിരിക്കുന്നത്. വിദ്യാര്‍ഥികള്‍ക്ക്​ തുടര്‍ പഠനം സാധ്യമാകണമെങ്കില്‍ കോഴിക്കോട്, മലപ്പുറം, പാലക്കാട് ജില്ലകളില്‍ താല്‍ക്കാലിക അധിക ബാച്ച്‌ വേണ്ടിവരും.

പുതിയ പ്ലസ് വണ്‍ ബാച്ചുകളുടെ കാര്യത്തില്‍ ഈ മാസം 23 ന് തീരുമാനമുണ്ടാകുമെന്ന് വിദ്യാഭ്യാസ മന്ത്രി വി. ശിവന്‍കുട്ടി പറഞ്ഞു. മുഴുവന്‍ പേര്‍ക്കും പ്രവേശനം ഉറപ്പ് വരുത്തുമെന്നും മന്ത്രി കൂട്ടിച്ചേര്‍ത്തു.

51,600 കുട്ടികള്‍ക്ക് പ്രവേശനം ലഭിക്കാനുണ്ടെന്ന് വിദ്യാഭ്യസ മന്ത്രി സഭയില്‍ വ്യക്തമാക്കിയിരുന്നു. ഇതില്‍ മുഴുവന്‍ വിഷയങ്ങളിലും എ പ്ലസ് നേടിയ 618 വിദ്യാര്‍ഥികളുണ്ടെന്നും മന്ത്രി പറഞ്ഞിരുന്നു.