ആര്‍.എസ്.എസ്. പ്രവര്‍ത്തകന്‍ സഞ്ജിത്തിനെ വെട്ടിക്കൊലപ്പെടുത്തിയ കേസില്‍ പ്രതികളുടെ രേഖാചിത്രം തയ്യാറാക്കുന്നു... ദൃക്സാക്ഷിയായ ഭാര്യ അര്‍ഷിക നല്‍കിയ വിവരണത്തിന്റെ അടിസ്ഥാനത്തിലാണു ചിത്രം വരയ്ക്കുന്നത്, പട്ടാപ്പകല്‍ ആസൂത്രിതമായി നടത്തിയ കൊലപാതകത്തില്‍ രണ്ടുദിവസമായിട്ടും ഇരുട്ടില്‍ തപ്പുന്നത് പോലീസിനെ പ്രതിരോധത്തിലാക്കി ,അക്രമികള്‍ സഞ്ചരിച്ച കാര്‍ കണ്ടെത്താനുള്ള ശ്രമം ഊര്‍ജ്ജിതത്തില്‍.

തിങ്കളാഴ്ച രാവിലെ എട്ടേമുക്കാലോടെയാണ് മമ്പറത്തുവച്ച് കൊലപാതകം നടന്നത്. രണ്ടു ദിവസം കഴിഞ്ഞിട്ടും കൊലയാളികളെക്കുറിച്ചോ അവര്‍ സഞ്ചരിച്ച കാറിനെക്കുറിച്ചോ ഒരു സൂചനയും ലഭിച്ചിട്ടില്ല. പ്രതികള്‍ മുഖംമൂടിയോ മാസ്‌കോ ധരിച്ചിരുന്നില്ലെന്നും കണ്ടാല്‍ തിരിച്ചറിയുമെന്നും അര്‍ഷിക .

അര്‍ഷികയുടെ വിവരണം വച്ചു രേഖാചിത്രം തയാറാക്കിയതിനു ശേഷം മറ്റു സാക്ഷികളെക്കൂടി കാണിച്ചിട്ടേ പരസ്യമാക്കൂകയുള്ളൂ. ഉത്തരമേഖലാ ഐ.ജി. അശോക് യാദവിന്റെ നേതൃത്വത്തില്‍ അന്വേഷണ പുരോഗതി വിലയിരുത്തിയിട്ടുണ്ട്.

അതേസമയം സംഭവസ്ഥലത്തുനിന്ന് പ്രതികള്‍ വാളയാര്‍-തൃശൂര്‍ ദേശീയപാതയിലേക്ക് കടന്നതായി പോലീസ് കണ്ടെത്തിയിരുന്നു. കാര്‍ കുഴല്‍മന്ദം ഭാഗത്തേക്കു പോയതായാണ് സി.സി. ടിവി ദൃശ്യങ്ങള്‍ കേന്ദ്രീകരിച്ചുള്ള അന്വേഷണത്തിലെ നിഗമനം.

കാറിന്റെ നമ്പര്‍ വ്യാജമാകാനുള്ള സാധ്യതയും തള്ളിക്കളയാനാവില്ല. ആസൂത്രിതമായ കൊലപാതകത്തിനൊരുങ്ങി അക്രമി സംഘം രാവിലെ ഏഴോടെ മമ്പറത്തിന് ഒരു കി.മീ. അകലെയുള്ള ഉപ്പുംപാടത്ത് എത്തിയിരുന്നതായി സൂചനയുണ്ട്.

മമ്പറം പ്രദേശത്തെ ടവര്‍ ലൊക്കേഷനിലുണ്ടായിരുന്ന മൊബൈല്‍ ഫോണ്‍ നമ്പറുകള്‍ കേന്ദ്രീകരിച്ചും അന്വേഷണം നടത്തുന്നു. പ്രതികള്‍ അതിര്‍ത്തി കടക്കാനുള്ള സാധ്യത മുന്‍നിര്‍ത്തി തമിഴ്നാട്ടിലെ എസ്.ഡി.പി.ഐ. ശക്തികേന്ദ്രങ്ങളിലും നിരീക്ഷണം തുടങ്ങി.