ആറാം ക്ലാസ് വിദ്യാര്‍ഥിയെ ഷോട്ട്ഫിലിമില്‍ അഭിനയിപ്പിക്കാന്‍ എന്ന വ്യാജേനെ ലൈംഗികമായി ഉപദ്രവിച്ച അധ്യാപകന്‍ അറസ്റ്റില്‍. ശ്രീമൂലനഗരം വട്ടേക്കാട്ടുപറമ്ബില്‍ വീട്ടില്‍ രാജുവിനെയാണ് (50) ചെങ്ങമനാട് പൊലീസ് അറസ്റ്റ് ചെയ്തത്.

സിനിമയിലടക്കം അഭിനയിക്കാന്‍ അവസരമുണ്ടാക്കി തരാമെന്ന വാഗ്ദാനത്തില്‍ കുട്ടിയുടെ വീട്ടില്‍നിന്ന് ബൈക്കില്‍ പ്രതിയുടെ വീട്ടിലെത്തിച്ചാണ് ലൈംഗികമായി ഉപദ്രവിച്ചത്. പീഡനത്തിന് ശേഷം സംഭവം പുറത്ത് പറയരുതെന്ന്​ ഭീഷണിപ്പെടുത്തി കുട്ടിയെ വീട്ടിലെത്തിച്ചതെങ്കിലും അസ്വസ്ഥനായ കുട്ടി വീട്ടുകാരോട് ഉണ്ടായ സംഭവങ്ങളെല്ലാം തുറന്ന് പറഞ്ഞു. തുടര്‍ന്ന്​ വീട്ടുകാര്‍ ചെങ്ങമനാട് പൊലീസ് സ്റ്റേഷനില്‍ വിവരം അറിയിച്ചു.

സ്റ്റേഷന്‍ ഹൗസ് ഓഫിസര്‍ എസ്.എം പ്രദീപ് കുമാറിന്‍റെ നേതൃത്വത്തിലാണ്​ പ്രതിയെ അറസ്റ്റ് ചെയ്തത്. സബ് ഇന്‍സ്പെക്ടര്‍മാരായ പി.ജെ. കുര്യാക്കോസ്, എം.ബി. റഷീദ്, എ.എസ്.ഐ രാജേഷ് കുമാര്‍, സി.പി.ഒ സെബാസ്റ്റ്യന്‍ എന്നിവരാണ് അന്വേഷണ സംഘത്തിലുണ്ടായിരുന്നത്.