അമേരിക്കന്‍ മലയാളികളാകെ ഞെട്ടിയിരിക്കുകയാണ്. പത്തനംതിട്ട കോഴഞ്ചേരി ചെറുകോല്‍ ചരുവേല്‍ സ്വദേശി സാജന്‍ മാത്യുവിന്റെ (56) കൊലപാതകി 15 വയസുകാരനെന്നാണ് വ്യക്തമായി. സാജന്‍ മാത്യുവിനെ വെടിവച്ചു കൊന്ന കേസില്‍ 15 വയസുകാരനായ പ്രതിയെ മാസ്‌കിറ്റ് പൊലീസ് അറസ്റ്റ് ചെയ്തു. അമേരിക്കന്‍ പൗരനായ പ്രതിക്കു പ്രായപൂര്‍ത്തിയാകാത്തതിനാല്‍ പേരു വിവരങ്ങള്‍ പുറത്തു വിട്ടിട്ടില്ല. ഇയാളുടെ മേല്‍ കൊലക്കുറ്റം ചുമത്തി.

കടയില്‍ സാധനം വാങ്ങാനെത്തിയ പ്രതി ആദ്യം സാജനോടു പണം ആവശ്യപ്പെട്ടു, കിട്ടാതെ വന്നപ്പോള്‍ പുറത്തു കാറിലേക്കു പോയി. ഇയാള്‍ പോയി എന്ന് ഉറപ്പു വരുത്താനായി സാജന്‍ കടയുടെ വെളിയില്‍ എത്തിയപ്പോള്‍ അക്രമി തിരിച്ചെത്തി വെടിവയ്ക്കുകയായിരുന്നു എന്നാണ് പൊലീസ് പറയുന്നത്. വയറിലാണ് വെടിയേറ്റത്. ആംബുലന്‍സില്‍ ആശുപത്രിയിലേക്കു മാറ്റുമ്പോള്‍ ജീവനുണ്ടായിരുന്നുവെന്നും അവിടെ നിന്നുള്ള റിപ്പോര്‍ട്ടില്‍ പറയുന്നു.

സാജന്റെ മൃതദേഹം 21ന് ഡാലസ് സെഹിയോന്‍ മാര്‍ത്തോമ്മാ പൊതുദര്‍ശനത്തിനു വയ്ക്കും. സംസ്‌കാര ശുശ്രൂഷകള്‍ 24ന് നടത്തും. സാജന്‍ മരിച്ചു വീണ സ്ഥലത്ത് ഇന്നലെ സ്‌നേഹിതരും ബന്ധുക്കളും മെഴുകുതിരി കത്തിച്ച് ആദരം അര്‍പ്പിച്ചു.

ഡാലസ് കൗണ്ടി മെസ്‌കിറ്റ് സിറ്റിയിലെ ഗലോവയില്‍ ബ്യൂട്ടി സപ്ലൈ സ്‌റ്റോര്‍ നടത്തി വരികയായിരുന്നു സാജന്‍ മാത്യു. കോഴഞ്ചേരി ചെരുവില്‍ കുടുംബാംഗമായ സാജന്‍ മാത്യു 2005 ലാണ് കുവൈത്തില്‍ നിന്ന് അമേരിക്കയില്‍ എത്തിയത്. ഡാലസ് സെഹിയോന്‍ മാര്‍ത്തോമ ചര്‍ച്ച് അംഗമാണ്. മെസ്‌കിറ്റില്‍ അടുത്തിടെയാണ് സുഹൃത്തുക്കളില്‍ ചിലരുമായി ചേര്‍ന്ന് സാജന്‍ സൗന്ദര്യവര്‍ധക വസ്തുക്കളുടെ കട തുടങ്ങിയത്. ഡാലസ് പ്രസ്ബിറ്റീരിയന്‍ ഹോസ്പിറ്റലില്‍ നഴ്‌സായ മിനി സജിയാണ് ഭാര്യ. രണ്ട് മക്കളുണ്ട്.

സെഹിയോന്‍ മാര്‍ത്തോമാ ചര്‍ച്ചിലെ യുവജന സഖ്യത്തിലെ സജീവ അംഗമായിരുന്നു സാജന്‍. ഡാലസിലെ മലയാളി സമൂഹത്തിലാകെ സാജന്റെ മരണം ഞെട്ടലുണ്ടാക്കി. കുടുംബാംഗങ്ങളെ ആശ്വസിപ്പിക്കുന്നതിനായി നിരവധി മലയാളികളാണ് എത്തിയത്.

കൊലക്കേസ് ചാര്‍ജ് ചെയ്‌തെങ്കിലും അക്രമിയുടെ പേരോ ഫോട്ടോയോ പൊലീസ് പുറത്തു വിട്ടിട്ടില്ല. പ്രതിക്കു പ്രായപൂര്‍ത്തി ആകാത്തതിനാല്‍ ജുവനൈല്‍ കോടതിയിലാണോ വിചാരണ ചെയ്യുകയെന്നു വ്യക്തമല്ല. ബുധനാഴ്ച്ച ഉച്ചക്ക് 2 മണിയോടെ സ്‌റ്റോറിലെത്തി അക്രമി പണം ആവശ്യപ്പെട്ടു. കിട്ടാതെ വന്നപ്പോള്‍ കാറിലേക്ക് മടങ്ങി. തിരികെ പോയോ എന്നറിയാന്‍ കടയുടെ വാതില്‍ തുറന്ന് സാജന്‍ നോക്കിയപ്പോള്‍ വെടിവെയ്ക്കുകയായിരുന്നു. വയറില്‍ ഒന്നില്‍ കൂടുതല്‍ തവണ വെടിയേറ്റ സാജന്‍ നടന്നാണ് ആംബുലന്‍സില്‍ കയറിയത് എന്നും പറയപ്പെടുന്നു. പെട്ടെന്നു പൊലീസ് ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു.

അമേരിക്കയിലേക്കു ചേക്കേറിയെങ്കിലും നാടും വീടുമായുള്ള ബന്ധം അറ്റുപോകാതെ കാത്തിരുന്ന ആളായിരുന്നു ഡാലസില്‍ വെടിയേറ്റു മരിച്ച ചെറുകോല്‍ സ്വദേശി സാജന്‍ മാത്യു. വര്‍ഷത്തില്‍ രണ്ടു തവണ നാട്ടില്‍ വന്നിരുന്ന സാജന്‍ ഒന്നര വര്‍ഷം മുന്‍പ് പിതാവിന്റെ മരണം വരെ ഈ പതിവ് തുടര്‍ന്നു. അടുത്ത മാസം വീണ്ടും വരാനിരിക്കെ സാജന്റെ വേര്‍പാടിന്റെ ഞെട്ടലിലാണ് ബന്ധുക്കളും സുഹൃത്തുക്കളും.

പിതാവിന്റെ മരണത്തെ തുടര്‍ന്നു ഒന്നര വര്‍ഷം മുന്‍പാണ് സാജന്‍ അവസാനമായി നാട്ടില്‍ എത്തിയതെന്നു സഹോദരന്‍ ജോണ്‍ മാത്യു പറഞ്ഞു. തന്നെക്കാള്‍ 14 വയസിന് ഇളയതായിരുന്നു സാജനെന്നും ഏറെ അടുപ്പമായിരുന്നു എന്നും അദ്ദേഹം പറഞ്ഞു. എല്ലാക്കാര്യങ്ങളും തന്നോട് ചോദിച്ചു മാത്രമാണ് ചെയ്തിരുന്നത്. തന്റെ വീടിന് അടുത്തായി ഒരു വീട് വയ്ക്കണമെന്ന് സാജന്‍ ആവശ്യപ്പെട്ടിരുന്നു. അങ്ങനെ വീടുവച്ചു. പക്ഷേ മൂന്ന് അവധിക്കാലം മാത്രമാണ് സാജനും കുടുംബവും അതില്‍ താമസിച്ചത്. പിതാവിന്റെ മരണത്തിന് ശേഷം ഇതുവരെ നാട്ടില്‍ വന്നിരുന്നില്ല.