നിരോധിച്ച കറൻസി കടത്തിയ സംഭവത്തിൽ കണ്ണൂർ സ്വദേശി ഉൾപ്പെടെ മൂന്നുപേർ അറസ്റ്റിൽ. രണ്ട് കോടിയോളം രൂപയുടെ നിരോധിത കറൻസിയുമായാണ് സംഘത്തെ മംഗളൂരു പോലീസ് പിടികൂടിയത്. അടയാറിൽ നിന്നും ലാൽബാഗിലേക്കുള്ള യാത്രാമധ്യേയാണ് അസാധുവാക്കപ്പെട്ട നോട്ടുൾപ്പെടെ സംഘം പോലീസ് പിടിയിലായത്. പഴയ നോട്ടുകൾ സംഘം കാറിൽ കടത്തിക്കൊണ്ട് പോകുകയായിരുന്നു.രണ്ടു ബാഗുകളിലായി കടത്തിയ ആയിരത്തിന്റെയും അഞ്ഞൂറിന്റെയും പഴയ നോട്ടുകളാണ് പതിവ് പരിശോധനയ്ക്കിടെ പോലീസ് കസ്റ്റഡിയിലെടുത്തത്.

കാറിലുണ്ടായിരുന്ന കണ്ണൂർ സ്വദേശി സുബേർ കർണ്ണാടക സ്വദേശികളായ ദീപക് കുമാർ, അബ്ദുൾ നസീർ എന്നിവരാണ് പിടിയിലായത്. കർണ്ണാടകയിലെ ഷിമോഗ, ചിത്രദുർഗ എന്നിവിടങ്ങളിൽ നിന്നാണ് കറൻസികൾ കൊണ്ടുവന്നതെന്നാണ് പ്രതികൾ നൽകിയിരിക്കുന്ന മൊഴി. കമ്മീഷൻ വ്യവസ്ഥയിലാണ് ഇവർ നോട്ടുകൾ എത്തിച്ചിരുന്നത്. ആർക്കുവേണ്ടിയാണ് പണം കൊണ്ടുവന്നതെന്ന് അന്വേഷിക്കുമെന്ന് ബംഗളൂരു സിറ്റി പോലീസ് കമ്മീഷണർ എൻ.ശശികുമാർ പറഞ്ഞു.