കൂട്ടുകാരിക്ക് വേണ്ടി ഒറ്റക്കെട്ട്... മോഫിയയുടെ മരണത്തില് തേങ്ങി അല്അസ്ഹര് ലോ കോളജ്; മൈലാഞ്ചി ഡിസൈനിങ്ങിലും ചിത്രരചനയിലും വിദഗ്ധയായ മോഫിയ കോളേജിലെ കലാതിലകം; പ്രിയ കൂട്ടുകാരിയ്ക്ക് വേണ്ടി കൂട്ടുകാര് കസ്റ്റഡിയില്
ആലുവയില് ഗാര്ഹിക പീഡനത്തെത്തുടര്ന്ന് ജീവനൊടുക്കിയ മോഫിയ പര്വീണ് (23) തൊടുപുഴ അല്അസ്ഹര് ലോ കോളജിലെ എല്ലാമെല്ലാമായിരുന്നു. മൂന്നാം വര്ഷ എല്എല്ബി വിദ്യാര്ഥിനിയായിരുന്നു. മൈലാഞ്ചി ഡിസൈനിങ്ങിലും ചിത്രരചനയിലും വിദഗ്ധയായിരുന്നു.
ചിത്രരചന, ഇംഗ്ലിഷ് പ്രസംഗം, കഥാരചന, കവിതാരചന എന്നിവയില് ഒന്നാം സമ്മാനം നേടിയ മോഫിയ കോളജിലെ കലോത്സവത്തില് കലാപ്രതിഭയായും തിരഞ്ഞെടുക്കപ്പെട്ടിരുന്നു. മെഹന്ദി ഡിസൈന് വര്ക്ക് കിട്ടിയിട്ടുണ്ടെന്നും മൂന്നു ദിവസത്തിനുള്ളില് തിരികെവരാമെന്നും കോളജിലെ കൂട്ടുകാര്ക്കു വാക്കു നല്കി പോയതാണു മോഫിയ പര്വീണ്.
അനീതിക്കെതിരെ ധൈര്യപൂര്വം ശബ്ദമുയര്ത്തുന്ന ആളായിരുന്നു മോഫിയയെന്ന് സഹപാഠികള് ഓര്മിക്കുന്നു. പൊലീസില് നിന്നു നീതി ലഭിക്കില്ലെന്നു തോന്നിയിട്ടാവാം മോഫിയ ജീവനൊടുക്കിയതെന്നും അവര് പറയുന്നു. ഭര്തൃവീട്ടില് നേരിട്ടിരുന്ന പ്രയാസങ്ങള് തങ്ങളുമായി മോഫിയ പങ്കുവയ്ക്കാറുണ്ടെന്നു സഹപാഠികള് പറഞ്ഞു. രണ്ടാഴ്ച അവധിയെടുക്കുകയാണെന്നും എസ്പിക്കും മറ്റും പരാതി കൊടുത്ത ശേഷം മടങ്ങിവരുമെന്നും പഠനം തുടരണമെന്നും പറഞ്ഞ ശേഷമാണു മോഫിയ കോളജില് നിന്നു പോയത്.
അതേസമയം മോഫിയയ്ക്ക് വേണ്ടി അവര് കസ്റ്റഡിയിലുമായി. സഹപാഠിയായ മോഫിയ പര്വീണിനു നീതി നിഷേധിച്ച ഇന്സ്പെക്ടര്ക്കെതിരെ നടപടി ആവശ്യപ്പെട്ട് ആലുവ അല് അസ്ഹര് ലോ കോളജിലെ സഹപാഠികള് എസ്പി ഓഫിസിലേക്കു നടത്തിയ മാര്ച്ച് വൈകാരിക പ്രതികരണങ്ങള്ക്കു വഴിയൊരുക്കി.
മാര്ച്ച് തടഞ്ഞ പൊലീസിനോടു പരാതി കൊടുക്കാന് എസ്പി ഓഫിസിലേക്കു കടത്തിവിടണമെന്ന് ആവശ്യപ്പെട്ട പെണ്കുട്ടികളടക്കം 17 വിദ്യാര്ഥികളെ പൊലീസ് കസ്റ്റഡിയിലെടുത്തു. മുന്കൂട്ടി അനുവാദം വാങ്ങാതെ പ്രകടനം നടത്തിയെന്നു കാണിച്ചാണിത്. വിദ്യാര്ഥികളെ പിന്നീട് എടത്തല പൊലീസ് സ്റ്റേഷനിലേക്കു മാറ്റി. വിദ്യാര്ഥികളെ കസ്റ്റഡിയിലെടുത്തതില് പ്രതിഷേധിച്ചു ഡീന് കുര്യാക്കോസ് എംപി സ്റ്റേഷനില് എത്തി.
മോഫിയാ പര്വീന് ആത്മഹത്യ ചെയ്ത കേസ് എറണാകുളം റൂറല് ജില്ലാ െ്രെകംബ്രാഞ്ച് അന്വേഷിക്കും. ഡിവൈ.എസ്.പി വി.രാജീവിനാണ് ചുമതല. പ്രത്യേക അന്വേഷണസംഘവും രൂപീകരിച്ചു. സംഭവത്തെതുടര്ന്ന് ആരോപണ വിധേയനായ ആലുവ സി.ഐ സി.എല്.സുധീറിനെ പൊലീസ് ഹെഡ് ക്വാര്ട്ടേഴ്സിലേക്ക് സ്ഥലംമാറ്റിയെങ്കിലും ആലുവയില് കോണ്ഗ്രസ് നേതൃത്വത്തില് പ്രക്ഷോഭം തുടരുകയാണ്.
ഭര്ത്തൃപീഡനത്തിനെതിരെ പരാതിയുമായി സമീപിച്ചപ്പോള് പ്രതികളുടെ മുന്നില് വച്ച് തന്നെ ഇന്സ്പെക്ടര് അവഹേളിച്ചതായി എഴുതി വച്ചാണ് മോഫിയ ചൊവ്വാഴ്ച വീട്ടില് തൂങ്ങിമരിച്ചത്.
അതേസമയം ഭര്ത്താവും കുടുംബാംഗങ്ങളും 45 ലക്ഷം രൂപ സ്ത്രീധനത്തുക ആവശ്യപ്പെട്ടു മോഫിയ പര്വീണിനെ പീഡിപ്പിച്ചതായി പ്രതികളുടെ റിമാന്ഡ് റിപ്പോര്ട്ട്. മോഫിയയെ മരുമകളെപ്പോലെയല്ല, വേലക്കാരിയെപ്പോലെയാണു പ്രതികള് കണക്കാക്കിയത്. ശാരീരികമായും മാനസികമായും ഉപദ്രവിച്ചു. മാനസിക ദൗര്ബല്യമുള്ള ആളായി ചിത്രീകരിക്കാന് ശ്രമിച്ചു. പള്ളി വഴി വിവാഹമോചനത്തിനു കത്തു നല്കി. വേറെ കല്യാണം കഴിക്കുമെന്നു സുഹൈല് ഭീഷണിപ്പെടുത്തി. ഈ കാര്യങ്ങളിലുണ്ടായ മനോവിഷമമാണു മോഫിയയെ ആത്മഹത്യയിലേക്കു നയിച്ചതെന്നാണു റിമാന്ഡ് റിപ്പോര്ട്ടില് പറയുന്നത്.
https://www.facebook.com/Malayalivartha
