മനസ്സില്‍ നിന്ന് മായാത്ത ആ ഗാനം..... അറിവില്ലാ പൈതലായിരിക്കുമ്പോള്‍ വേര്‍പെട്ടു പോയ അനുജന്റെ ഓര്‍മ്മയില്‍ വരികളെഴുതിയത് മഷിയില്‍ കണ്ണീര്‍ കലര്‍ത്തി... വീട്ടിലെ കാര്യസ്ഥന്‍ ആര്‍ക്കു ചോറുവിളമ്പാനാണ് ഇത്രയും വലിയ വാഴയില വെട്ടി തിണ്ണയില്‍ ഇട്ടതെന്നുഅപ്പോള്‍ തോന്നിയ സംശയം പിന്നീടാണ് മനസ്സിലായത് സ്വന്തം അനുജനെ പൊതിഞ്ഞെടുക്കാനായിരുന്നെന്ന്....

മലയാളികളുടെ ഓര്‍മ്മയില്‍ സൂക്ഷിക്കാന്‍ ഒരുപിടി നല്ല ഗാനങ്ങള്‍ രചിച്ച ബിച്ചുതിരുമല തലസ്ഥാനത്തെ സ്വകാര്യ ആശുപത്രിയില്‍ ഇന്ന് പുലര്‍ച്ചെയായിരുന്നു വിടവാങ്ങിയത് . ഹൃദയാഘാതത്തെ തുടര്‍ന്ന് അദ്ദേഹം ചികിത്സയിലായിരുന്നു.

നാനൂറിലേറെ സിനിമകള്‍ക്കായി ആയിരത്തിലേറേ ഗാനങ്ങള്‍ രചിച്ചിട്ടുള്ള ബിച്ചു തിരുമലയ്ക്ക് അദ്ദേഹത്തിന്റെ തൂലികയില്‍ നിന്നും ജനഹൃദയങ്ങളില്‍ ഇടം പിടിച്ച പപ്പയുടെ സ്വന്തം അപ്പൂസ് എന്ന ചിത്രത്തിലെ ഈ ഗാനം ഏറെ പ്രിയപ്പെട്ടതായിരുന്നു. ജാനകിയമ്മയുടെ ശബ്ദത്തില്‍ പുറത്തുവന്ന 'ഓലത്തുമ്പത്തിരുന്ന് ഊയലാടും ചെല്ല പൈങ്കിളി ' എന്ന ഗാനം ചിത്രത്തിന്റെ ഹൈലൈറ്റായിരുന്നു

. ' എന്റെ ബാലഗോപാലനെ എണ്ണ തേപ്പിക്കുമ്പം പാടെടീ 'എന്ന അടുത്തവരി അദ്ദേഹം മഷിയില്‍ കണ്ണീര്‍ കലര്‍ത്തിയാണ് എഴുതിയത്. ആ ഗാനരചനയില്‍ ഉടനീളം മനസില്‍ അറിവില്ലാ പൈതലായിരിക്കുമ്പോള്‍ വേര്‍പെട്ടുപോയ കുഞ്ഞനുജന്റെ അവ്യക്തമായ ചിത്രമായിരുന്നു . ബിച്ചുവിന് അന്ന് നാലുവയസ് പ്രായമേ ഉണ്ടായിരുന്നുള്ളൂ. അനുജനെ എണ്ണ പുരട്ടി അമ്മ കുളിപ്പിക്കുന്നത് ഒരുപക്ഷേ മനസില്‍ കയറികൂടിയിട്ടുണ്ടാവാം.

ഒരു രാത്രി മുഴുവന്‍ അനുജന്‍ നിര്‍ത്താതെ കരച്ചില്‍. അമ്മ എത്ര ശ്രമിച്ചിട്ടും കുഞ്ഞിന്റെ കരച്ചില്‍ അടക്കാനാവുന്നില്ല. ഒടുവില്‍ എപ്പോഴോ ആ കരച്ചില്‍ നിലച്ചു.

അടുത്ത ദിവസം രാവിലെ വീട്ടിലെ കാര്യസ്ഥന്‍ വന്ന് വലിയൊരു വാഴയില വെട്ടി തിണ്ണയില്‍ ഇട്ടു. അതു കണ്ടപ്പോള്‍ ആര്‍ക്ക് ചോറു വിളമ്പാനാണ് ഇത്രയും വലിയ ഇലയെന്നായിരുന്നു അപ്പോള്‍ തോന്നിയ സംശയം. പക്ഷെ ഏറെ നാള്‍ കഴിഞ്ഞാണ് മനസിലായത്, വലിയ ഇലയില്‍ പൊതിഞ്ഞത് സ്വന്തം അനുജനെയാണെന്ന്. ഇന്നും ആ പാട്ട് മനസ്സില്‍ നൊമ്പരമായാണ് നില്‍ക്കുന്നത്.