മകന്റെ വിയോഗ വിവരം ആശുപത്രിയില്‍ ഗുരുതരാവസ്ഥയില്‍ കഴിയുന്ന അച്ഛനറിഞ്ഞിട്ടില്ല.... ഹെലികോപ്ടര്‍ അപകടത്തില്‍ ജൂനിയര്‍ വാറന്റ് ഓഫീസര്‍ പ്രദീപ് മരിച്ചതിന്റെ ഞെട്ടലിലാണ് തൃശൂര്‍ പുത്തൂര്‍ പൊന്നൂക്കര ഗ്രാമം....

ശ്വാസകോശരോഗത്തെ തുടര്‍ന്ന് പ്രദീപിന്റെ അച്ഛന്‍ രാധാകൃഷ്ണന്‍ വെന്റിലേറ്ററില്‍ കഴിയുകയാണ്. ഗുരുതര ആരോഗ്യപ്രശ്‌നങ്ങളുമായി കഴിയുന്ന അച്ഛനെപ്പറ്റിയായിരുന്നു പ്രദീപിന് എപ്പോഴും ആശങ്ക. രണ്ടാഴ്ചത്തെ അവധിക്കു വന്നപ്പോഴും മുഴുവന്‍ സമയവും അച്ഛനൊപ്പം ആശുപത്രിയിലാണ് കഴിഞ്ഞത്. രണ്ടുദിവസം മുമ്പുവരെ വീട്ടിലേക്ക് അച്ഛനെ വിളിച്ച് വിശേഷങ്ങള്‍ അന്വേഷിച്ചിരുന്നു.

സൈനിക ഹെലികോപ്ടര്‍ അപകടത്തില്‍ പ്രദീപും മരിച്ചുവെന്ന വാര്‍ത്ത ഇന്നലെ രാത്രി ഏഴരയോടെയാണ് പൊന്നൂക്കരയില്‍ എത്തിയത്. ഇതേ തുടര്‍ന്ന് രാത്രി ഒമ്പതോടെ പൊന്നൂക്കര മൈമ്പിള്ളി ക്ഷേത്രത്തിന് സമീപത്തെ വീടിനരികില്‍ ജനപ്രതിനിധികള്‍ അടക്കമുള്ള ആളുകള്‍ എത്തിത്തുടങ്ങി. എങ്കിലും പ്രദീപിന്റെ വീട്ടുകാരെ വിവരമറിയിക്കാതിരിക്കാന്‍ എല്ലാവരും ശ്രമിച്ചു.

സുഹൃത്തും അയല്‍വാസിയുമായ ശിവപ്രസാദിനോട് ഒരാഴ്ച മുമ്പാണ് പ്രദീപ് യാത്രപറഞ്ഞ് മടങ്ങിയത്. പൊന്നൂക്കരയില്‍ വീടുപണിയുന്നതിന് ചെറിയൊരു സ്ഥലം വാങ്ങിയിരുന്നു.

രണ്ടുവര്‍ഷംകൂടി കഴിഞ്ഞാല്‍ റിട്ടയര്‍മെന്റാണ്. സേനയില്‍ തുടരുന്നതിനെപ്പറ്റിയും സുഹൃത്തുക്കളോട് സൂചിപ്പിച്ചിരുന്നു. എന്തായാലും സ്വന്തം നാട് വിട്ടൊരു സ്ഥിരതാമസം പ്രദീപിന് താത്പര്യമുണ്ടായിരുന്നില്ലെന്നാണ് അടുപ്പമുള്ളവര്‍ പറയുന്നത് 2002ലാണ് പ്രദീപ് വ്യോമസേനയില്‍ ഔദ്യോഗിക ജീവിതം ആരംഭിച്ചത്.