സര്വകലാശാലകളിലെ സര്ക്കാര് ഇടപെടലില് അതൃപ്തി അറിയിച്ച് ഗവര്ണര് ആരിഫ് മുഹമ്മദ് ഖാന്..... രാഷ്ട്രീയ ഇടപെടല് തുടര്ന്നാല് ചാന്സിലര് പദവി ഒഴിയാന് താന് തയ്യാറാണെന്നും പദവി മുഖ്യമന്ത്രി ഏറ്റെടുക്കണമെന്നും ഗവര്ണറുടെ കത്ത്
അതിരുവിട്ട സര്ക്കാര് ഇടപെടലിനെതിരെ ആഞ്ഞടിച്ച് ഗവര്ണര്. സര്വകലാശാലകളിലെ സര്ക്കാര് ഇടപെടലില് അതൃപ്തി അറിയിച്ച് ഗവര്ണര് ആരിഫ് മുഹമ്മദ് ഖാന്. ഇതുമായി ബന്ധപ്പെട്ട് ഗവര്ണര് മുഖ്യമന്ത്രിക്ക് കത്ത് നല്കി. രാഷ്ട്രീയ ഇടപെടല് തുടര്ന്നാല് ചാന്സിലര് പദവി ഒഴിയാന് താന് തയ്യാറാണെന്നും പദവി മുഖ്യമന്ത്രി ഏറ്റെടുക്കണമെന്നും ഗവര്ണര് കത്തില് പറയുന്നു.
കണ്ണൂര്, കാലടി സര്വകലാശാലകളിലെ വൈസ് ചാന്സിലര് നിയമനങ്ങളുമായി ബന്ധപ്പെട്ട സര്ക്കാര് ഇടപെടലുകളാണ് ഗവര്ണറെ കടുത്ത നിലപാടെടുക്കാന് പ്രേരിപ്പിച്ചത്. സര്വകലാശാലകളില് രാഷ്ട്രീയ അതിപ്രസരമാണെന്ന് ഗവര്ണര് ചൂണ്ടിക്കാണിച്ചു.
സര്വകലാശാലകളില് ഇത്തരത്തിലുള്ള പ്രവണതകള് തുടരുന്നത് തെറ്റാണ്. വേണമെങ്കില് ചാന്സിലര് പദവിയില് നിന്ന് മാറ്റാം, അല്ലെങ്കില് സ്ഥാനം ഒഴിഞ്ഞു തരാം എന്നും ഗവര്ണര് കത്തില് വ്യക്തമാക്കി. ഇത്തരത്തില് മുന്നോട്ടുപോയാല് അത് ദൂരവ്യാപകമായ പ്രത്യാഘാതങ്ങള് ഉണ്ടാക്കുമെന്നും കത്തില് ഗവര്ണര് വ്യക്തമാക്കി.
സമ്മര്ദ്ദത്തിലാക്കി നിയമവിരുദ്ധ കാര്യങ്ങള് ചെയ്യിച്ചെന്നും ഇനി അതിനാവില്ലെന്നും തുറന്നടിച്ചും സര്വകലാശാലകളുടെ പരമാധികാരിയായ ചാന്സലറുടെ അധികാരങ്ങള് ഓര്ഡിനന്സിലൂടെ തന്നില് നിന്ന് ഏറ്റെടുക്കാനും മുഖ്യമന്ത്രിക്ക് കത്ത് നല്കി ഗവര്ണര് ആരിഫ് മുഹമ്മദ് ഖാന്റെ അസാധാരണ നീക്കം. യൂണിവേഴ്സിറ്റി അപ്പലേറ്റ് െ്രെടബ്യൂണലിനെ നിയമിക്കാനുള്ള അധികാരം നിയമ ഭേദഗതിയിലൂടെ എടുത്തുകളഞ്ഞതും കണ്ണൂര്, സംസ്കൃത വി.സിമാരുടെ നിയമനവുമാണ് ഗവര്ണറെ ചൊടിപ്പിച്ചത്.
സര്വകലാശാലകളുടെ സ്വയംഭരണാവകാശം സംരക്ഷിക്കാനും രാഷ്ട്രീയ അതിപ്രസരത്തില് നിന്ന് രക്ഷിക്കാനും വേറെ വഴിയില്ലെന്നും ഉടന് നടപടിയെടുക്കണമെന്നും കത്തില് ആവശ്യപ്പെടുന്നു. ബുധനാഴ്ച മുഖ്യമന്ത്രിക്ക് കൈമാറിയ ജി.എസ് 1252021 കത്തില്, നിയമവിരുദ്ധ നിയമനങ്ങളടക്കം നിരാശയോടെയാണ് കാണുന്നതെന്ന് പറയുന്നു. നിയമവിരുദ്ധ നടപടികള് അക്കമിട്ടുനിരത്തിയ ശേഷമാണ്, ചാന്സലറുടെ അധികാരം ഏറ്റെടുക്കാന് ആവശ്യപ്പെടുന്നത്.
'അങ്ങനെയായാല് ഗവര്ണറെ ആശ്രയിക്കാതെ നിങ്ങളുടെ രാഷ്ട്രീയ ലക്ഷ്യങ്ങള് നടപ്പാക്കാന് കഴിയും. സര്വകലാശാലകള് സര്ക്കാരിന്റെ നേരിട്ടുള്ള നിയന്ത്രണത്തിലായാല്, രാഷ്ട്രീയ ഇടപെടലെന്ന ആക്ഷേപവും ഒഴിവായിക്കിട്ടും.
ഇപ്പോള് നിയമസഭ സമ്മേളിക്കാത്തതിനാല് ഓര്ഡിനന്സ് തയ്യാറാക്കൂ. ഞാന് ഒപ്പിട്ടുതരാം. ചാന്സലറുടെ അധികാരം മുഖ്യമന്ത്രിയിലേക്ക് നിയമപരമായി കൈമാറുന്ന രേഖയുണ്ടാക്കാന് അഡ്വക്കേറ്റ് ജനറലിനോട് പറയൂ. അദ്ദേഹത്തിന് അത് എളുപ്പത്തില് ഉണ്ടാക്കാവുന്നതേയുള്ളൂ.' അഞ്ചു പേജുള്ള കത്ത് അവസാനിപ്പിക്കുന്നത് ഇങ്ങനെയാണ്.
അതേസമയം ഗവര്ണറെ അനുനയിപ്പിക്കാന് ഇന്നലെ രാവിലെ ധനമന്ത്രി കെ.എന്.ബാലഗോപാലും ചീഫ്സെക്രട്ടറി വി.പി.ജോയിയും രാജ്ഭവനിലെത്തി. ഗവര്ണറെ വിശ്വാസത്തിലെടുത്തുള്ള നടപടികളേ ഉണ്ടാകൂവെന്ന് ഇരുവരും ഉറപ്പു നല്കി. എന്നാല് ഗവര്ണര് വഴങ്ങിയില്ല. മാത്രവുമല്ല അദ്ദേഹം ഡല്ഹിയിലേക്ക് പോയി.
"
https://www.facebook.com/Malayalivartha