വാസ്തവമറിഞ്ഞ് പോലീസ്... ബിപിന് റാവത്തിന്റെയും മറ്റുള്ളവരുടേയും മരണത്തിനിടയാക്കിയ ഹെലികോപ്റ്റര് മൂടല് മഞ്ഞിലേക്കു മറയുന്ന വിഡിയോ പകര്ത്തിയയാളും സുഹൃത്തും പോലീസിന് മുമ്പാകെ ഹാജരായി; കണ്ടു നില്ക്കേ മാഞ്ഞു, പിന്നെ ഉഗ്രശബ്ദം; കണ്ടതിനേക്കാളും ഭീകരം
കൂനൂരില് തകര്ന്ന വ്യോമസേന ഹെലികോപ്റ്റര് മൂടല്മഞ്ഞിലേക്കു മറയുന്ന വിഡിയോ വളരെ വേഗം വൈറലായിരുന്നു. ബിപിന് റാവത്തിന്റെയും മറ്റുള്ളവരുടേയും മരണത്തിനിടയാക്കിയ ഹെലികോപ്റ്റര് അപകടത്തിന് തൊട്ടുമുമ്പുള്ള ഈ വീഡിയോ എടുത്ത ആളിനെത്തപ്പി എല്ലാവരും പരക്കം പാഞ്ഞിരുന്നു. വ്യാജമാണെന്ന് പോലും പലരും കരുതി.
അവസാനം വീഡിയോ പകര്ത്തിയയാളും സുഹൃത്തും ദൃശ്യങ്ങള് പൊലീസിനു കൈമാറി. ഇന്നലെ കോയമ്പത്തൂര് സിറ്റി പൊലീസ് കമ്മിഷണറുടെ ഓഫിസിലെത്തിയാണു രാമനാഥപുരം തിരുവള്ളൂര് നഗര് സ്വദേശികളായ ജോ (കുട്ടി), സുഹൃത്ത് നാസര് എന്നിവര് 19 സെക്കന്ഡ് ദൈര്ഘ്യമുള്ള വിഡിയോ കൈമാറിയത്.
ഹെലികോപ്റ്റര് താഴ്ന്നു പറന്നു മൂടല്മഞ്ഞിനകത്തേക്കു മറയുന്ന ദൃശ്യമാണു ജോയുടെ മൊബൈലിലുള്ളത്. പിന്നീട് ഹെലികോപ്റ്റര് എവിടെയോ തട്ടുന്ന വലിയ ശബ്ദവും കേള്ക്കാം. ഇതു സമൂഹമാധ്യമങ്ങളില് പ്രചരിച്ചിരുന്നു. തുടര്ന്ന് നടന്ന അന്വേഷണത്തില് വീഡിയോ ചിത്രീകരിച്ചത് ഇവരാണെന്ന് കണ്ടെത്തിയിരുന്നു. തുടര്ന്ന് അന്വേഷണത്തിന്റെ ഭാഗമായി ഇരുവരെയും പൊലീസ് വിളിച്ചു വരുത്തിയിരുന്നു.
സംഭവത്തെക്കുറിച്ചു ജോ പറയുന്നതിതാണ്. എട്ടിനു കുടുംബസമേതം ഊട്ടി കാണാനെത്തിയ ഞങ്ങള് കൂനൂരില് റെയില്വേ ട്രാക്കിലൂടെ നടക്കുന്നതിനിടെയാണു ഹെലികോപ്റ്റര് താഴ്ന്നു പറക്കുന്നതു കണ്ടത്.
കൗതുകം തോന്നി ദൃശ്യം ഫോണില് പകര്ത്തി. മഞ്ഞിനകത്തേക്കു ഹെലികോപ്റ്റര് മറഞ്ഞു. പിന്നീട് വലിയ ശബ്ദവും കേട്ടു. സുഹൃത്തായ നാസര് 'അതു തകര്ന്നു വീണോ' എന്നു ചോദിച്ചു. ഞങ്ങള് ആകെ ഭയപ്പെട്ടു.
മൊബൈല് റേഞ്ചില്ലായിരുന്നു. പിന്നീട് യാത്രാമധ്യേ പൊലീസിനെ കണ്ടു വിവരം പറഞ്ഞു. ദൃശ്യവും കൈമാറി. അതു രാജ്യത്തെ നടുക്കിയ വലിയ ദുരന്തമായിരുന്നു എന്നു പിന്നീടാണറിഞ്ഞത്.
അതേസമയം ബിപിന് റാവത്തിന്റെയും ഭാര്യ മധുലികയുടെയും ഭൗതികശരീരങ്ങളടങ്ങിയ പേടകങ്ങളില് ജനം സ്നേഹപ്പൂക്കള് അര്പ്പിച്ചു. തങ്ങളുടെ പ്രിയപ്പെട്ട ജനറലിനെ അവസാനമായി കാണാന് അവിടേക്കെത്തിയ ജനക്കൂട്ടത്തെ നിയന്ത്രിക്കാന് സേന പാടുപെട്ടു. ഭാരത് മാതാ കീ ജയ്, വന്ദേമാതരം വിളികളില് അവര് റാവത്തിന് അന്ത്യഭിവാദ്യമര്പ്പിച്ചു.
സേനയില് ചേര്ന്ന നാള് റാവത്ത് ഭാഗമാവുകയും പിന്നീടു നയിക്കുകയും ചെയ്ത ഗൂര്ഖ റൈഫിള്സ് 5/11 യൂണിറ്റ് തങ്ങളുടെ പ്രിയപ്പെട്ട നായകന്റെ അന്ത്യയാത്രയിലെ ചടങ്ങുകള്ക്കു മേല്നോട്ടം വഹിച്ചു. കര, നാവിക, വ്യോമ സേനാ മേധാവികളുടെ നേതൃത്വത്തില് 3 സേനകളിലെയും ഉദ്യോഗസ്ഥര് അണമുറിയാതെ വസതിയിലേക്കെത്തി. വാര്ന്നൊഴുകിയ കണ്ണുകളോടെ മധുലികയുടെ അമ്മ ജ്യോതി പ്രഭ സിങ് തളര്ന്നിരുന്നു. റാവത്തിന്റെ മക്കളായ കൃതികയും തരിണിയും മാതാപിതാക്കളുടെ പേടകങ്ങള്ക്കു സമീപം നിശബ്ദമിരുന്നു.
3 സേനകളുടെയും സംഗീത ബാന്ഡിന്റെ അകമ്പടിയില് 2.14നു റാവത്തും മധുലികയും 9 കിലോമീറ്റര് അകലെയുള്ള ബ്രാര് സ്ക്വയര് ശ്മശാനത്തിലേക്കുള്ള അന്ത്യയാത്ര ആരംഭിച്ചു. റാവത്തിന്റെ ശരീരം തുറന്ന വാഹനത്തിലും മധുലികയുടേത് പിന്നിലുള്ള സേനാ ട്രക്കിലും നീങ്ങി. പൂക്കള് കൊണ്ട് അലങ്കരിച്ച തുറന്ന വാഹനത്തിനൊപ്പം ജനക്കൂട്ടം നടന്നു. പലരും കണ്ണീര്വാര്ത്തു. മുന്നിലും പിന്നിലുമായി സേനാ വാഹനങ്ങള് അണിനിരന്നു. 1985ല് ജീവിതത്തില് ഒന്നിച്ച റാവത്തും മധുലികയും മരണത്തിലും ഒരുമിച്ചായിരുന്നു. ബ്രാര് സ്ക്വയറില് അവര്ക്കായി സേന ഒരു ചിതയൊരുക്കി. അതിലുയര്ന്ന അഗ്നിനാളങ്ങളില് പ്രിയതമയെ ചേര്ത്തുപിടിച്ചു റാവത്ത് മടങ്ങി.
"
https://www.facebook.com/Malayalivartha