10. 99 കിലോ ഹാഷിഷ് ഓയില്‍ ലഹരി മരുന്ന് തലസ്ഥാനത്തേക്ക് കടത്തിയ കേസില്‍ രണ്ടു പ്രതികള്‍ക്ക് 12 വര്‍ഷം കഠിന തടവും 2 ലക്ഷം പിഴയും ശിക്ഷ വിധിച്ചു.

തിരുവനന്തപുരം രണ്ടാം അഡീ. ജില്ലാ സെഷന്‍സ് കോടതിയാണ് ശിക്ഷ വിധിച്ചത്. ലഹരിക്കടത്തു കേസില്‍ ഒന്നും രണ്ടും പ്രതികളായ തമിഴ്‌നാട് രാമനാഥപുരം അനീസ് നഗറില്‍ മുഹമ്മദ് മകന്‍ സാദില്‍ (40) , ഇടുക്കി ഉടുമ്പന്‍ചോല ഈട്ടിത്തോപ്പ് കൊച്ചുപറമ്പില്‍ വീട്ടില്‍ നിന്നും ആന്ധ്രാ വിശാഖ പട്ടണം യാരമ്പൊരലു കുമരിയില്‍ താമസിക്കുന്ന സേവ്യര്‍ മകന്‍ സാബു സേവ്യര്‍ (41) എന്നിവരെയാണ് ശിക്ഷിച്ചത്.

പിഴയൊടുക്കാത്ത പക്ഷം 1 വര്‍ഷത്തെ അധിക തടവനുഭവിക്കാനും ജഡ്ജി എ. എസ്. മല്ലിക ഉത്തരവിട്ടു. നര്‍ക്കോട്ടിക് കേസില്‍ പാലിക്കേണ്ട നിയമ നടപടിക്രമങ്ങള്‍ എക്‌സൈസ് ഉദ്യോഗസ്ഥര്‍ പാലിച്ചതായി കോടതി വിധിന്യായത്തില്‍ ചൂണ്ടിക്കാട്ടി. സമൂഹത്തെയാകെ നശിപ്പിക്കുന്ന ലഹരി കടത്ത് , വ്യാപാരം വേരോടെ പിഴുതെറിയാന്‍ ശിക്ഷ കഠിനമായേ മതിയാകൂവെന്നും വിധിന്യായത്തില്‍ കോടതി നിരീക്ഷിച്ചു.

2019 ജനുവരി 10 നാണ് കേസിനാധാരമായ ലഹരി കടത്ത് നടന്നത്. തിരുവനന്തപുരം പവര്‍ഹൗസ് സ്‌റ്റേഷന് സമീപം പാര്‍ത്ഥാസ് ടെക്സ്റ്റയില്‍സ് ബ കൃപാ തീയറ്റര്‍ റോഡില്‍ ഐ ഒ സി ഡിപ്പോക്ക് സമീപം വച്ചാണ് തൊണ്ടി സഹിതം പ്രതികള്‍ എക്‌സൈസ് പിടിയിലായത്.

വിശ്വാസ യോഗ്യമായ രഹസ്യ വിവരത്തിന്റെ അടിസ്ഥാനത്തിലാണ് കുറ്റകൃത്യം കണ്ടെത്തിയത്. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ റ്റി. അനില്‍കുമാറിന്റെ നേതൃത്വത്തില്‍ ഇന്‍സ്‌പെക്ടര്‍മാര്‍ അറസ്റ്റ് ചെയ്ത കേസില്‍ അന്വേഷണം നടത്തി കുറ്റപത്രം സമര്‍പ്പിച്ചത് തിരുവനന്തപുരം എക്‌സൈസ് എന്‍ഫോഴ്‌സ്‌മെന്റ് അസി. കമ്മീഷണറാണ്.