മെഡിക്കല്‍ കോളേജിലെ പ്രസവ വാര്‍ഡില്‍ നിന്ന് നവജാത ശിശുവിനെ തട്ടിയെടുത്ത നീതുവിന്റെ കാമുകന്‍ ഇബ്രാഹിം ബാദുഷയെ ഇന്ന് കോടതിയില്‍ ഹാജരാക്കും. ഏറ്റുമാനൂര്‍ ഫസ്റ്റ് ക്ലാസ് ജുഡീഷ്യല്‍ കോടതിയിലാണ് ഹാജരാക്കുക. നീതുവിന്റെ പരാതിയിലാണ് ബാദുഷയെ അറസ്റ്റ് ചെയ്തത്.


പണത്തിനുവേണ്ടി ബാദുഷ തന്നെയും മകനെയും ഉപദ്രവിച്ചിരുന്നുവെന്നായിരുന്നു യുവതിയുടെ പരാതി. ഇയാള്‍ക്കെതിരെ വഞ്ചനാക്കുറ്റവും ഗാര്‍ഹിക-ബാലപീഡന വകുപ്പുകളും ചുമത്തിയിട്ടുണ്ട്. നീതുവില്‍ നിന്നും 30 ലക്ഷം രൂപയും സ്വര്‍ണവും തട്ടിയെടുത്തതിന് ഇയാളുടെ പേരില്‍ പ്രത്യേകം കേസെടുത്തിട്ടുണ്ട്. സോഷ്യല്‍ മീഡിയയിലൂടെയാണ് നീതുവും ഇബ്രാഹിമും പരിചയപ്പെട്ടത്.

ഇരുവരും തമ്മില്‍ രണ്ട് വര്‍ഷമായി പ്രണയത്തിലായിരുന്നു. ഇതിനിടെ യുവതി ഗര്‍ഭിണിയായി. ഇത് അലസിപ്പോയതോടെ ഇബ്രാഹിം തന്നെ വിട്ടുപോകാതിരിക്കാന്‍ ഒരു കുഞ്ഞിനെ സംഘടിപ്പിക്കാന്‍ നീതു തീരുമാനിക്കുകയായിരുന്നു.

തുടര്‍ന്നാണ്് മെഡിക്കല്‍ കോളേജിലെത്തി കുട്ടിയെ തട്ടിയെടുത്തത്. യുവതിയെ 14 ദിവസത്തേക്ക് റിമാന്‍ഡ് ചെയ്തു. ഇവരെ വനിതാ ജയിലിലേക്ക് മാറ്റും. മെഡിക്കല്‍ കോളേജിലെത്തിച്ച് തെളിവെടുപ്പ് നടത്തും.