ഇത്തവണത്തെ റിപ്പബ്ലിക് ദിന പരേഡില്‍ കേരളത്തിന്റെ ടാബ്ലോ ഉള്‍പ്പെടുത്താതിരുന്ന കേന്ദ്ര സര്‍ക്കാര്‍ നടപടി തിരുത്തണമെന്നാവശ്യപ്പെട്ട് പ്രധാനമന്ത്രി നരേന്ദ്ര മോദിയ്ക്ക് കത്തയച്ച് മുഖ്യമന്ത്രി പിണറായി വിജയന്‍.

കാലികപ്രസക്തവും സാമൂഹിക പ്രാധാന്യവുമുള്ള പ്രമേയമാണ് കേരളം ടാബ്ലോയില്‍ അവതരിപ്പിക്കുന്നത്. രാജ്യം കണ്ട മഹാനായ സാമൂഹ്യ പരിഷ്‌കര്‍ത്താവും തത്വചിന്തകനുമായ ശ്രീനാരായണ ഗുരുവിന്റെ സന്ദേശം ഉയര്‍ത്തിപ്പിടിക്കുന്ന ടാബ്ലോ അനുവദിക്കാതിരുന്നത് ദൗര്‍ഭാഗ്യകരവും പ്രതിഷേധാര്‍ഹവുമാണ്.

മനുഷ്യര്‍ക്കിടയില്‍ വിഭജനങ്ങള്‍ക്ക് കാരണമായ ജാതിചിന്തകള്‍ക്കും അനാചാരങ്ങള്‍ക്കും വര്‍ഗീയവാദങ്ങള്‍ക്കുമെതിരെ അദ്ദേഹം പകര്‍ന്ന മാനവികതയുടേയും സാഹോദര്യത്തിന്റേയും ആശയങ്ങള്‍ കൂടുതല്‍ ആളുകളില്‍ എത്താനുള്ള അവസരമാണ് നിഷേധിക്കപ്പെട്ടിരിക്കുന്നത്.


ടാബ്ലോ ഉള്‍പ്പെടുത്താതിരുന്ന കേന്ദ്ര സര്‍ക്കാര്‍ നടപടിയില്‍ കേരളത്തിനുള്ള പ്രതിഷേധം രേഖപ്പെടുത്തിയ മുഖ്യമന്ത്രി കേന്ദ്ര സര്‍ക്കാര്‍ നടപടി തിരുത്തണമെന്നുമാവശ്യപ്പെട്ടാണ് കത്തയച്ചത്.

അതേസമയം കൊവിഡിന്റെ രൂക്ഷവ്യാപനം കണക്കിലെടുത്ത് ഇത്തവണ റിപ്പബ്ലിക് ദിനാഘോഷത്തിന് കടുത്ത നിയന്ത്രണങ്ങള്‍ ഏര്‍പ്പെടുത്തി. ആഘോഷ പരിപാടികളില്‍ പൊതുജനങ്ങള്‍, കുട്ടികള്‍, മുതിര്‍ന്ന പൗരന്മാര്‍ എന്നിവര്‍ക്ക് പ്രവേശനമില്ല.

സംസ്ഥാനതല പരിപാടി 26ന് രാവിലെ 9ന് തിരുവനന്തപുരം സെന്‍ട്രല്‍ സ്റ്റേഡിയത്തില്‍ നടക്കും. ഗവര്‍ണര്‍ ആരിഫ് മുഹമ്മദ് ഖാന്‍ ദേശീയ പതാക ഉയര്‍ത്തും. ക്ഷണിക്കപ്പെട്ട 100പേര്‍ക്ക് മാത്രമായിരിക്കും ചടങ്ങില്‍ പങ്കെടുക്കാനാകുക.

ജില്ലകളില്‍ രാവിലെ 9ന് നടക്കുന്ന ചടങ്ങില്‍ അതതു മന്ത്രിമാര്‍ പതാക ഉയര്‍ത്തും. പരമാവധി 50 പേര്‍ക്ക് മാത്രമായിരിക്കും പ്രവേശനം.


സബ് ഡിവിഷണല്‍, ബ്ലോക്ക് തലത്തില്‍ നടക്കുത്തുന്ന പരിപാടിയിലും പങ്കെടുക്കുന്നവരുടെ എണ്ണം 50ല്‍ കൂടാന്‍ പാടില്ല. പഞ്ചായത്ത്, മുനിസിപ്പല്‍, കോര്‍പറേഷന്‍ തലത്തിലും മറ്റ് സര്‍ക്കാര്‍ സ്ഥാപനങ്ങളിലും ഓഫീസുകളിലും സംഘടിപ്പിക്കുന്ന പരിപാടിക്ക് 25 പേരില്‍ കൂടാന്‍ പാടില്ലെന്നും പൊതുഭരണവകുപ്പ് സര്‍ക്കുലറില്‍ വ്യക്തമാക്കി. പ്ലാസ്റ്റിക്കിലുള്ള ദേശീയ പതാകയുടെ നിര്‍മ്മാണം, വിതരണം, വില്‍പന, ഉപയോഗം എന്നിവ നിരോധിച്ചതായും സര്‍ക്കുലറില്‍ പറയുന്നു.