സോഷ്യല്‍ മീഡിയയില്‍ വലിയ ചര്‍ച്ചയായ മഹാകുംഭ വൈറല്‍ പെണ്‍കുട്ടി മോണാലിസയുടെ തിരോധാന വാര്‍ത്തയില്‍ നിര്‍ണ്ണായക വഴിത്തിരിവ്. മോണാലിസയെ കാണാനില്ലെന്നും താന്‍ അവരെ തിരഞ്ഞ് ജോധ്പൂരിലെത്തിയെന്നും അവകാശപ്പെട്ട് വീഡിയോയിലിട്ടത് ഫര്‍മാന്‍ ഖാനല്ലെന്ന് വ്യക്തമായി.

രാജസ്ഥാനിലെ ബലോത്ര സ്വദേശിയായ അരവിന്ദ് കുമാര്‍ ജോഷിയാണ് വീഡിയോയില്‍ ഉണ്ടായിരുന്നത്. തനിക്ക് ഫര്‍മാന്‍ ഖാനുമായി യാതൊരു ബന്ധവുമില്ലെന്നും തമാശയ്ക്കാണ് വീഡിയോ ചെയ്തതെന്നും ഇയാള്‍ പിന്നീട് വിശദീകരിച്ചു.

കുടുംബത്തിന്റെ പരാതി: മോണാലിസയെ കാണാനില്ലെന്ന് ആരോപിച്ച് കുടുംബം നേരത്തെ രംഗത്തെത്തിയിരുന്നു. മകളുടെ ഫോണ്‍ ഫര്‍മാന്‍ തട്ടിയെടുത്തതായും അമ്മ ലതാഭായ് ആരോപിച്ചിരുന്നു. മധ്യപ്രദേശിലെ തട്ടിക്കൊണ്ടുപോകല്‍ കേസുമായി ബന്ധപ്പെട്ട് ഫര്‍മാന്‍ ഖാന്റെ അറസ്റ്റ് തടഞ്ഞുകൊണ്ടുള്ള ഉത്തരവ് കേരള ഹൈക്കോടതി മെയ് 20 വരെ നീട്ടി. ജസ്റ്റിസ് കൗസര്‍ എടപ്പഗത്താണ് മുന്‍കൂര്‍ ജാമ്യാപേക്ഷ പരിഗണിച്ചുകൊണ്ട് ഈ ഉത്തരവ് പുറപ്പെടുവിച്ചത്.

മലയാള സിനിമയില്‍ അഭിനയിക്കുമ്പോള്‍ പ്രണയത്തിലായ ഇവര്‍ മാര്‍ച്ച് 11ന് കേരളത്തില്‍ വെച്ചാണ് വിവാഹിതരായത്. വിവാഹ രജിസ്‌ട്രേഷന്റെ സമയത്ത് മോണാലിസയ്ക്ക് 18 വയസ്സുണ്ടായിരുന്നുവെന്ന് ആധാര്‍ കാര്‍ഡ് ഉള്‍പ്പെടെയുള്ള രേഖകള്‍ ഓണ്‍ലൈനായി പരിശോധിച്ച് ഉറപ്പുവരുത്തിയതായി കേരള പൊലീസ് ഡിജിപിക്ക് റിപ്പോര്‍ട്ട് നല്‍കി. എന്നാല്‍ മോണാലിസ പ്രായപൂര്‍ത്തിയാകാത്തയാളാണെന്ന് പിന്നീട് നടന്ന അന്വേഷണങ്ങളില്‍ കണ്ടെത്തിയതിനെത്തുടര്‍ന്ന് മധ്യപ്രദേശിലെ മഹേശ്വര്‍ പോലീസ് ഫര്‍മാന്‍ ഖാനെതിരെ പോക്‌സോ കേസ് രജിസ്റ്റര്‍ ചെയ്തിട്ടുണ്ട്. ദേശീയ മനുഷ്യാവകാശ കമ്മീഷന്റെയും പട്ടികവര്‍ഗ കമ്മീഷന്റെയും ഇടപെടലിനെത്തുടര്‍ന്നാണ് ഈ നടപടി.