രക്ഷപ്പെട്ടത് അത്ഭുതകരമായി.... കണ്ണൂരില്‍ നിന്ന് ഗോവയിലേയ്ക്ക് ഉല്ലാസയാത്ര പോയ വിദ്യാര്‍ത്ഥികള്‍ സഞ്ചരിച്ച ബസിന് തീപിടിച്ചു, പൂര്‍ണമായും ബസ് കത്തിയമര്‍ന്നു.

അപകടത്തില്‍ ബസ് പൂര്‍ണമായും കത്തി നശിച്ചുവെങ്കിലും ആര്‍ക്കും പരിക്കേറ്റിട്ടില്ല. കണ്ണൂര്‍ മാതമംഗലം ജെബീസ് കോളേജിലെ വിദ്യാര്‍ത്ഥികളാണ് അപകട സമയത്ത് ബസിലുണ്ടായിരുന്നത്. പുലര്‍ച്ചെ അഞ്ചരയോടെ ഗോവയിലെ ഓള്‍ഡ് ബെന്‍സാരിയില്‍ വച്ചാണ് ബസ് തീ പിടിച്ചത്.

തീപിടിത്തം എങ്ങനെയാണ് ഉണ്ടായതെന്ന് ഇതുവരെ വ്യക്തത വന്നിട്ടില്ല. എഞ്ചിനില്‍ നിന്ന് പുക വരുന്നുവെന്ന് ആളുകള്‍ ഡ്രൈവറോട് പറഞ്ഞെങ്കിലും അദ്ദേഹം ഇത് ശ്രദ്ധിച്ചിട്ടില്ലായിരുന്നു. എന്നാല്‍ ബസ് കത്താന്‍ തുടങ്ങിയതോടെയാണ് ഡ്രൈവര്‍ വാഹനം നിര്‍ത്തി പെട്ടെന്ന് യാത്രക്കാരെ ഒഴിപ്പിച്ചത്.

ഉടന്‍ തന്നെ ഫയര്‍ഫോഴ്സ് എത്തി തീയണയ്ക്കുകയുണ്ടായി. ഓള്‍ഡ് ഗോവയില്‍ നിന്നും പോണ്ടയില്‍ നിന്നുമുള്ള രണ്ട് അഗ്നിശമന സേനാ യൂണിറ്റുകളാണ് തീയണയ്ക്കാനെത്തിയത്. ബസുടമയ്ക്ക് 40 ലക്ഷത്തോളം രൂപയുടെ നാശനഷ്ടമുണ്ടായതായി കണക്കാക്കുന്നു.