നടിയെ ആക്രമിച്ച കേസില് കാവ്യാ മാധവനെ ചോദ്യം ചെയ്യും... അന്വേഷണത്തില് ലഭിച്ച ഡിജിറ്റല് തെളിവുകളുടെ അടിസ്ഥാനത്തില് കാവ്യ മാധവനെ ചോദ്യം ചെയ്യേണ്ടതുണ്ടെന്ന് പ്രോസിക്യൂഷന് കോടതിയെ അറിയിച്ചു
നടിയെ ആക്രമിച്ച കേസില് കാവ്യാ മാധവനെ ചോദ്യം ചെയ്യണമെന്ന ആവശ്യവുമായി പ്രോസിക്യൂഷന് ഹൈക്കോടതിയില്.നടിയെ ആക്രമിച്ച കേസിന്റെ തുടരന്വേഷണം പൂര്ത്തിയാക്കാന് മൂന്ന് മാസം കൂടി സമയം അനുവദിക്കണമെന്നാണ് പ്രോസിക്യൂഷന് കോടതിയോട് ആവശ്യപ്പെട്ടത്. ഏപ്രില് 15നകം അന്വേഷണം പൂര്ത്തിയാക്കണമെന്നായിരുന്നു ഹൈക്കോടതിയുടെ ഉത്തരവ്.
സൂരജിന്റെ മൊബൈല് ഫോണ് പരിശോധിച്ചതില് ചില പുതിയ വിവരങ്ങള് ലഭിച്ചിട്ടുള്ളതായും പ്രോസിക്യൂഷന് കോടതിയെ അറിയിച്ചു. ഡിജിറ്റല് തെളിവുകളില് വിശദമായ അന്വേഷണവും പരിശോധനയും ആവശ്യമാണ്. ഇതിന് കൂടുതല് സമയം വേണമെന്നും പ്രോസിക്യൂഷന് കോടതിയെ അറിയിച്ചു.
ഇതുവരെയുള്ള അന്വേഷണത്തില് ഒട്ടേറെ നിര്ണായക തെളിവുകള് ലഭിച്ചിട്ടുണ്ട്. ഈ സാഹചര്യത്തില് വിശദമായ തുടര് അന്വേഷണം ആവശ്യമാണെന്നും പ്രോസിക്യൂഷന് ഹൈക്കോടതിയില് വ്യക്തമാക്കി. നടിയെ ആക്രമിക്കുന്ന ദൃശ്യങ്ങള് സംബന്ധിച്ച ചില വിവരങ്ങളും സൂരജിന്റെ ഫോണില് നിന്ന് ലഭിച്ചതായും പ്രോസിക്യൂഷന് പറയുന്നു.
അന്വേഷണത്തില് ലഭിച്ച ഡിജിറ്റല് തെളിവുകളുടെ അടിസ്ഥാനത്തില് കാവ്യ മാധവനെ ചോദ്യം ചെയ്യേണ്ടതുണ്ടെന്ന് പ്രോസിക്യൂഷന് കോടതിയെ അറിയിച്ചു. ചോദ്യം ചെയ്യലിന് സൗകര്യം തേടിയപ്പോള് ചെന്നൈയില് ആണെന്നാണ് കാവ്യ മറുപടി നല്കിയതെന്നും അടുത്ത ആഴ്ച നാട്ടില് തിരികെയെത്തുമെന്ന് അറിയിച്ചതായും പ്രോസിക്യൂഷന് ഹൈക്കോടതിയില് പറഞ്ഞു. ദിലീപിന്റെ ഫോണിലെ തെളിവ് നശിപ്പിച്ച നാല് അഭിഭാഷകരെയും ചോദ്യം ചെയ്യണം എന്ന് അന്വേഷണ സംഘവും കോടതിയെ അറിയിച്ചു.
ദിലീപിനൊപ്പം കാവ്യ മാധവനും സാക്ഷികളെ സ്വാധീനിക്കാന് ശ്രമിച്ചു എന്ന് അന്വേഷണ സംഘം പറയുന്നു. നടിയെ ആക്രമിച്ച കേസിലെ പിഴവുകള് ഇല്ലാതാക്കാന് പൊലീസ് കെട്ടിച്ചമച്ചതാണ് വധ ഗൂഢാലോചന കേസെന്നാണ് ദിലീപിന്റെ വാദം. കൃത്യമായി ആസൂത്രണം ചെയ്തതിന്റെ ഭാഗമായിട്ടാണ് വധ ഗൂഢാലോചന കേസ് സൃഷ്ടിച്ചതെന്നും ദിലീപ് കോടതിയെ അറിയിച്ചിട്ടുണ്ട്.
കേസിലെ തെളിവുകള് നശിപ്പിച്ചുവെന്ന പ്രോസിക്യൂഷന്റെ വാദം ദിലീപ് നേരത്തെ തന്നെ നിഷേധിച്ചിരുന്നു. എന്നാല് ദിലീപിനെതിരെ വ്യക്തമായ തെളിവുണ്ടെന്നും, ഫോണ് രേഖകള് അടക്കം നശിപ്പിക്കാന് ദിലീപ് ശ്രമിച്ചതെന്നുമാണ് പ്രോസിക്യൂഷന്റെ നിലപാട്.
നേരത്തെ അതിജീവിതയുടെ പരാതിയില് ബി രാമന് പിള്ള ഉള്പ്പെടെയുള്ള ദിലീപിന്റെ അഭിഭാഷകര്ക്ക് നോട്ടീസയക്കാന് ബാര് കൗണ്സില് തീരുമാനിച്ചിരുന്നു. ഇരുപതിലധികം സാക്ഷികളെ കൂറുമാറ്റിയെന്നും അഭിഭാഷകവൃത്തിക്ക് ചേരാത്ത പ്രവര്ത്തികള് ഇവരില് നിന്നുണ്ടായെന്നുമാണ് നടിയുടെ പരാതി.
കേസിലെ സാക്ഷിയായ ജിന്സനെ സ്വാധീനിക്കാന് ബി രാമന് പിള്ള 25 ലക്ഷം രൂപയും 5 സെന്റ് ഭൂമി വാഗ്ദാനം ചെയ്തെന്നും ആരോപണമുണ്ട്. ക്രിമിനല് കേസിലെ പ്രതിയുടെ സഹായത്തോടെയാണ് അഭിഭാഷകന് നിയമവിരുദ്ധ പ്രവര്ത്തനം നടത്തിയത്. രാമന്പിള്ളയുടെ ഓഫീസില് വച്ച് ദിലീപിന്റെ ഫോണിലെ തെളിവുകള് നശിപ്പിച്ചെന്നും പരാതിയില് ആരോപിക്കുന്നു.
https://www.facebook.com/Malayalivartha
