വീട്ടില്‍ കെട്ടിയിട്ടതിന്റെ പക.... ഭാര്യയെ വഴിയില്‍ തടഞ്ഞുനിറുത്തി കൊടുവാളിന് വെട്ടിക്കൊലപ്പെടുത്തി ഭര്‍ത്താവ് തൂങ്ങി മരിച്ച സംഭവത്തില്‍ നിര്‍ണായക വിവരങ്ങള്‍ പുറത്ത്.

കൊട്ടാരക്കര നെടുവത്തൂര്‍ പുല്ലാമല കല്ലുവിള താഴതില്‍ വീട്ടില്‍ രാജന്‍ (63), ഭാര്യ രമാവതി (58) എന്നിവരാണ് മരിച്ചത്. ഭാര്യയുടെ അനുജത്തിയുമായി പോകവേയാണ് ആക്രമണമുണ്ടായത് അതിനെ ചെറുത്ത ഭാര്യയുടെ അനുജത്തിയുടെ കൈപ്പത്തി രാജന്‍ വെട്ടിമാറ്റി.

ഏറെനാളായി രാജനും രമാവതിയും പിണങ്ങിക്കഴിയുകയാണ്. മക്കളായ രാജേഷ്, രമേശ് എന്നിവര്‍ക്കൊപ്പമാണ് രമാവതി താമസിച്ചിരുന്നത്. രാജന്‍ സമീപത്തുള്ള കുടുംബ വീട്ടില്‍ ഒറ്റയ്ക്കാണ് താമസിച്ചിരുന്നത്.


കുടുംബപ്രശ്‌നങ്ങള്‍ സംബന്ധിച്ച് പുത്തൂര്‍ പൊലീസില്‍കേസ് നിലനില്‍ക്കുന്നുണ്ട്. ഇതേത്തുടര്‍ന്ന് വീട്ടില്‍ കയറുന്നത് പൊലീസിന്റെ വിലക്കുമുണ്ടായിരുന്നു. ഇന്നലെ രാവിലെ കുറുമ്പാലൂരില്‍ താമസിക്കുന്ന അനുജത്തി രതിക്കൊപ്പം രമാവതി ഇസാഫ് ബാങ്കിന്റെ ആഴ്ചപ്പിരിവിനും ചിട്ടിപ്പിരിവിനുമായി പുറത്തുപോയി. തിരികെ മടങ്ങും വഴി റബര്‍ തോട്ടത്തില്‍ നിന്ന് വിറക് ശേഖരിക്കുമ്പോഴാണ് പതിയിരുന്ന രാജന്‍ കൊടുവാളുമായി ചാടിവീണ് ആക്രമിച്ചത്.




രമാവതിയുടെ കഴുത്തിലും കൈയിലും കാലിലുമടക്കം ആറുതവണ വെട്ടി. കഴുത്തിന്റെ രണ്ട് ഭാഗങ്ങളിലായുള്ള വെട്ടാണ് മരണകാരണമെന്നാണ് സൂചന. തടയാന്‍ ശ്രമിച്ചപ്പോഴാണ് രതിക്ക് വെട്ടേറ്റത്. നിലവിളിച്ചുകൊണ്ട് രതി റബര്‍തോട്ടം പിന്നിട്ട് റോഡിലിറങ്ങിയപ്പോള്‍ നാട്ടുകാര്‍ ഓടിക്കൂടി.

രതിയെ കൊട്ടാരക്കര താലൂക്ക് ആശുപത്രിയിലും അവിടെ നിന്ന് തിരുവനന്തപുരം മെഡിക്കല്‍ കോളേജ് ആശുപത്രിയിലും എത്തിച്ചു.പുത്തൂര്‍ പൊലീസ് നടത്തിയ തെരച്ചിലിലാണ് രതിയുടെ കൈപ്പത്തി കുറ്റിക്കാട്ടില്‍ നിന്ന് കണ്ടെടുത്തതെങ്കിലും ഇത് മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും സമയം അതിക്രമിച്ചതിനാല്‍ തുന്നിച്ചേര്‍ക്കാനായില്ല.

രമാവതി മരിച്ചെന്ന് ഉറപ്പാക്കിയശേഷമാണ് രാജന്‍ സ്ഥലത്ത് നിന്നും മുങ്ങിയത്. തുടര്‍ന്ന് പൊലീസും നാട്ടുകാരും നടത്തിയ അന്വേഷണത്തിലാണ് കുടുംബ വീട്ടില്‍ രാജനെ തൂങ്ങിമരിച്ച നിലയില്‍ കണ്ടെത്തി. രണ്ടു മൃതദേഹങ്ങളും ഇന്‍ക്വസ്റ്റിനുശേഷം പോസ്റ്റ്മോര്‍ട്ടത്തിനായി തിരുവനന്തപുരം മെഡിക്കല്‍ കോളേജ് ആശുപത്രിയിലേക്കു മാറ്റി.


അതേസമയം അമ്മായിഅമ്മയുടെ മരണത്തിന് പിറ്റേന്നുണ്ടായ സംഘര്‍ഷത്തിനിടെ ബന്ധുക്കള്‍ രാജനെ കെട്ടിയിട്ടതിന്റെ പകവീട്ടലായിരുന്നു രമാവതിയുടെ കൊലപാതകത്തില്‍ കലാശിച്ചതെന്നാണ് പൊലീസിന്റെ പ്രാഥമിക നിഗമനം.



ഇവരുടെ വിവാഹം നടന്നത് മുപ്പത്തിയൊന്ന് വര്‍ഷം മുമ്പായിരുന്നു . അന്നുമുതല്‍ രാജനും ഭാര്യയും നിരന്തരം വഴക്കിട്ടിരുന്നു. രാജന്‍ പതിവായി മദ്യപിച്ചെത്തി ഭാര്യയെ മര്‍ദ്ദിക്കുന്നതാണ് പതിവ്. മുമ്പ് പാറമടയില്‍ ജോലിക്ക് പോകുമ്പോഴും ഇപ്പോള്‍ കല്പണി മേസ്തിരിയായപ്പോഴും മദ്യപാനവും വഴക്കും തുടര്‍ന്നു.

രണ്ടര വര്‍ഷം മുമ്പ് രമാവതിയുടെ ജ്യേഷ്ഠത്തിയുടെ മകളെ മര്‍ദ്ദിച്ചതുമായി ബന്ധപ്പെട്ട കേസില്‍ രാജനെ കോടതി റിമാന്‍ഡ് ചെയ്തിരുന്നു. പിന്നീട് ജാമ്യത്തിലിറങ്ങിയ ശേഷം ബന്ധുക്കളുമായി അകല്‍ച്ചയിലായിരുന്നു. പൊളിഞ്ഞുവീഴാറായ കുടുംബ വീട്ടില്‍ അടുത്തിടെയാണ് ഒറ്റയ്ക്ക് താമസം തുടങ്ങിയത്. രമാവതിയുടെ അമ്മ മരിച്ചപ്പോള്‍ രാജനും ചടങ്ങിനെത്തിയിരുന്നു. എന്നാല്‍ പിറ്റേന്ന് മദ്യലഹരിയിലെത്തിയ രാജനെ വീട്ടുകാര്‍ മര്‍ദ്ദിക്കുകയും കെട്ടിയിട്ടശേഷം പൊലീസിന് കൈമാറുകയും ചെയ്തു. പൊലീസ് കേസെടുത്തിരുന്നില്ല. ഇതിന്റെ പ്രതികാരമെന്ന നിലയിലാണ് രാജന്‍ കൊലപാതകം ആസൂത്രണം ചെയ്തതെന്നാണ് അന്വേഷണ ഉദ്യോഗസ്ഥര്‍ നല്‍കുന്ന സൂചനകള്‍.