ഐപിഎല്ലിൽ മുംബൈ ഇന്ത്യൻസ് ഉയർത്തിയ റൺമല താണ്ടി സൺറൈസേഴ്‌സ് ഹൈദരാബാദ്. ആറ് വിക്കറ്റിനാണ് ഹൈദരാബാദ് മുംബൈയെ മറികടന്നത്.

ആദ്യം ബാറ്റ് ചെയ്ത മുംബൈ അഞ്ച് വിക്കറ്റ് നഷ്ടത്തിൽ 243 റൺസാണെടുത്തത്. എന്നാൽ എട്ട് പന്തും ആറ് വിക്കറ്റും ബാക്കി നിൽക്കെ ഹൈദരാബാദ് ലക്ഷ്യം മറി കടന്നു. ട്രാവിസ് ഹെഡിന്റേയും (76) ഹെൻഡ്രിച്ച് ക്ലാസന്റേയും (65) അർധസെഞ്ചുറികളാണ് ഹൈദരാബാദിന് വിജയമൊരുക്കിയത്.

അഭിഷേക് ശർമ 45 റൺസും സാലിൻ അറോറ 30 റൺസും നേടിയപ്പോൾ നിതീഷ് കുമാർ റെഡ്ഡി 21 റൺസും കൂട്ടിച്ചേർത്തു. അതിവേഗ ഇന്നിങ്‌സുമായി ടീമിനെ വിജയത്തിലേക്ക് നയിച്ച ക്ലാസനാണ് കളിയിലെ താരം. മുംബൈയ്ക്കായി അല്ലാഹ് ഗസൻഫർ രണ്ട് വിക്കറ്റ് നേടുകയും ചെയ്തു. ഹൈദരാബാദ് വിജയിച്ചതോടെ മുംബൈയ്ക്കായി റയാൻ റിക്കൽട്ടൻ നേടിയ സെഞ്ചുറി പാഴായിപ്പോയി.

55 പന്തിൽ എട്ട് സിക്‌സും പത്ത് ഫോറുമടക്കം 123 റൺസും അപരാജിതനായാണ് റിക്കൽട്ടൻ കളം വിട്ടത്. വിൽ ജാക്‌സ് 22 പന്തിൽ 46 റൺസും നേടിയിരുന്നു. നായകൻ ഹാർദിക് പാണ്ഡ്യ 31 റൺസാണ് നേടിയത്. സീസണിൽ ഹൈദരാബാദിന്റെ തുടർച്ചയായ അഞ്ചാം വിജയമാണിത്.