ചെറുവത്തൂര്‍ വിജയ ബാങ്കിന്റെ കോണ്‍ക്രീറ്റ് തറ തുരന്ന് അഞ്ചു കോടി രൂപയുടെ സ്വര്‍ണവും പണവും കവര്‍ന്ന സംഭവത്തില്‍ മുഖ്യപ്രതിയെന്നു സംശയിക്കുന്നയാളിന്റെ രേഖാചിത്രം പൊലീസ് പുറത്തുവിട്ടു. കാസര്‍കോട് മഞ്ചേശ്വരം സ്വദേശി ഇസ്മായില്‍ എന്നു പരിചയപ്പെടുത്തി കട വാടകയ്‌ക്കെടുത്തയാളിന്റെ ചിത്രമാണ് പൊലീസ് തയാറാക്കിയത്. മുറി വാടകയ്‌ക്കെടുക്കാന്‍ ഇയാളെ സഹായിച്ച തൃക്കരിപ്പൂര്‍ ഉടുമ്പുന്തലയിലെ എ.പി. യൂസഫിനെ പൊലീസ് കസ്റ്റഡിയിലെടുത്തു. യൂസഫിനു പുറമേ, കടമുറികളുടെ ഉടമ, ഇതിനു സമീപത്തെ ഒരു വ്യാപാരി എന്നിവരെയും പൊലീസ് ചോദ്യം ചെയ്തു.

അന്യസംസ്ഥാനക്കാരായ ചിലര്‍ക്കു കൂടി കവര്‍ച്ചയില്‍ പങ്കുണ്ടെന്ന് സ്ഥിരീകരിച്ചതോടെ, അന്വേഷണം കര്‍ണാടകയിലേക്കും വ്യാപിപ്പിച്ചു. കര്‍ണാടക പൊലീസിനു രേഖാചിത്രം കൈമാറിയതായാണ് വിവരം. അതേസമയം, വിജയ ബാങ്കിന്റെ നിരീക്ഷണ ക്യാമറയില്‍ കവര്‍ച്ചയ്ക്കു തൊട്ടുമുന്‍പുള്ള പ്രവൃത്തി ദിവസം പതിഞ്ഞ സ്ത്രീയേയും യുവാവിനെയും പൊലീസ് തിരയുന്നുണ്ട്.

കവര്‍ച്ചയുടെ സൂത്രധാരന്‍ കടമുറികള്‍ വാടകയ്‌ക്കെടുത്ത ഇസ്മായിലാണ് എന്നാണ് പൊലീസിന്റെ പ്രാഥമിക നിഗമനം. നാല്‍പത്തഞ്ചു വയസിലേറെ തോന്നുന്ന ഇയാള്‍ നാലുമാസത്തോളം ചെറുവത്തൂരിലുണ്ടായിരുന്നെന്നാണ് വിവരം. ഇയാള്‍ ഉപയോഗിച്ചിരുന്ന മൊബൈല്‍ നമ്പറിനെക്കുറിച്ചുള്ള വിവരങ്ങള്‍ സൈബര്‍ സെല്ലില്‍ നിന്നു പൊലീസ് ശേഖരിച്ചു. ചെറുവത്തൂരിലെ പരിചിതരെ മാത്രമാണ് ഇതില്‍ നിന്നു വിളിച്ചിരിക്കുന്നത്.

സംഭവ സ്ഥലത്തു നിന്നു ശേഖരിച്ച വിരലടയാളങ്ങള്‍ക്കു പുറമേ, ബാങ്കിന്റെ സ്‌ട്രോങ് മുറിയിലേക്കു തുരങ്കമുണ്ടാക്കിയ കടമുറിയില്‍ നിന്നു കാഞ്ഞങ്ങാട് സ്വകാര്യ സ്ഥാപനത്തിന്റെ പേരുള്ള സ്റ്റിക്കര്‍ പതിച്ച ഷര്‍ട്ട് പൊലീസിനു ലഭിച്ചിട്ടുണ്ട്. സേഫ് പൊളിക്കാതെ സ്വര്‍ണം കവര്‍ച്ച ചെയ്തതുമായി ബന്ധപ്പെട്ട് ദുരൂഹതകള്‍ ബാക്കിയുണ്ടെന്നും ഇതേക്കുറിച്ചു വിശദമായി അന്വേഷിക്കുമെന്നും ഉത്തര മേഖലാ എഡിജിപി എന്‍. ശങ്കര്‍റെഡ്ഡി അറിയിച്ചു.

മോഷ്ടാക്കള്‍ സംസ്ഥാനം വിട്ടിരിക്കാനുള്ള സാധ്യത തള്ളിക്കളയുന്നില്ലെന്നും എഡിജിപി പറഞ്ഞു. കാസര്‍കോട്ടെത്തിയ മന്ത്രി രമേശ് ചെന്നിത്തലയും സംഭവസ്ഥലം സന്ദര്‍ശിച്ചു. ചെറുവത്തൂര്‍ മല്‍സ്യമാര്‍ക്കറ്റിന് എതിര്‍വശത്തെ, കെട്ടിടത്തിലെ രണ്ടാം നിലയില്‍ പ്രവര്‍ത്തിക്കുന്ന ബാങ്കിന്റെ സ്‌ട്രോങ് റൂമിന്റെ കോണ്‍ക്രീറ്റ് തറ തുരന്നു 19.5 കിലോ സ്വര്‍ണവും 2.95 ലക്ഷം രൂപയുമാണ് ശനിയാഴ്ച കവര്‍ച്ച ചെയ്തത്. കവര്‍ച്ച ചെയ്യപ്പെട്ട സ്വര്‍ണത്തിന്റെ മതിപ്പുവില 4.95 കോടി രൂപയാണെന്നു പൊലീസ് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha