കിഴക്കേക്കോട്ട വിദ്വേഷ പ്രസംഗക്കേസ്... പി സി യുടെ ജാമ്യം റദ്ദാക്കണമെന്ന സര്‍ക്കാര്‍ ഹര്‍ജിയില്‍ 25 ന് ഉത്തരവ് , വെണ്ണല പ്രസംഗ സി ഡി കോടതിയില്‍ പ്രദര്‍ശിപ്പിച്ചു, അടച്ചിട്ട കോടതി മുറിയില്‍ ഇന്‍ ക്യാമറ നടപടിയിലൂടെയാണ് ഹൈടെക് സെല്‍ വീഡിയോ പ്രദര്‍ശിപ്പിച്ചത്, ജാമ്യം നല്‍കിയത് നിയമപരമായാണെന്നും കോടതിക്ക് വീഴ്ച പറ്റിയിട്ടില്ലെന്നും വിചാരണ കോടതി
കിഴക്കേക്കോട്ട തീര്‍ത്ഥപാദ മണ്ഡപത്തിലെ ഹിന്ദു മഹാസമ്മേളന പ്രസംഗ കേസില്‍ മുന്‍ എംഎല്‍എ പി.സി. ജോര്‍ജിന്റെ ജാമ്യം റദ്ദാക്കണമെന്ന സര്‍ക്കാര്‍ ഹര്‍ജിയില്‍ തിരുവനന്തപുരം രണ്ടാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതി 25 ന് ഉത്തരവ് പുറപ്പെടുവിക്കും.
പി.സി. ജോര്‍ജ് എറണാകുളം വെണ്ണല ശിവക്ഷേത്ര സപ്താഹ യജ്ഞ പ്രസംഗ സി ഡി കോടതിയില്‍ തിങ്കളാഴ്ച പ്രദര്‍ശിപ്പിച്ചു. അടച്ചിട്ട കോടതി മുറിയില്‍ ഇന്‍ ക്യാമറ നടപടിയിലൂടെയാണ് പോലിസ് ഹെഡ്ക്വാര്‍ട്ടേഴ്‌സിലെ ഹൈടെക് സെല്‍ ഉദ്യോഗസ്ഥര്‍ ഹാജരായി വീഡിയോ പ്രദര്‍ശിപ്പിച്ചത്.
എറണാകുളം വെണ്ണല ശിവക്ഷേത്രത്തില്‍ നടത്തിയ പ്രസംഗ സി ഡി 23 ന് കോടതിയില്‍ പ്രദര്‍ശിപ്പിക്കാനും മജിസ്‌ട്രേട്ട് എ .അനീസ ഹൈടെക് സെല്ലിനും ഫോര്‍ട്ട് പോലീസിനും നിര്‍ദ്ദേശം നല്‍കിയിരുന്നു.
കിഴക്കേക്കോട്ട വിദ്വേഷ പ്രസംഗക്കേസില്‍ ജാമ്യ വ്യവസ്ഥ ലംഘിച്ചതിനാല്‍ പി 'സി യ്ക്ക് നല്‍കിയ ജാമ്യം റദ്ദാക്കണമെന്ന സര്‍ക്കാര്‍ ഹര്‍ജി പരിഗണിക്കവേയാണ് കോടതി ഉത്തരവ്. 23 ന് കോടതിയില്‍ പ്രദര്‍ശിപ്പിച്ച് ഉള്ളടക്കം കണ്ട ശേഷം ജാമ്യം റദ്ദാക്കണമോ ജാമ്യത്തില്‍ തുടരാന്‍ അനുവദിക്കണമോയെന്ന് തീരുമാനിക്കാമെന്ന് കോടതി വ്യക്തമാക്കിയിരുന്നു.
അതേ സമയം പി. സി യുടെ ജാമ്യം റദ്ദാക്കണമെന്ന് സര്‍ക്കാര്‍ കോടതിയില്‍ അവര്‍ത്തിച്ചു. എന്നാല്‍ പ്രതിക്ക് മത വികാരം വ്രണപ്പെടുത്തണമെന്നോ ലഹളയുണ്ടാക്കണമെന്നോയെന്ന യാതൊരു ഉദ്ദേശ്യവുമുണ്ടായിരുന്നില്ലെന്നും പ്രതിയുടെ പ്രസംഗത്തെ തുടര്‍ന്ന് സംസ്ഥാനത്ത് യാതൊരു വര്‍ഗ്ഗീയ ലഹളയുമുണ്ടായിട്ടില്ലെന്നും ജാമ്യം റദ്ദാക്കേണ്ട സാഹചര്യമില്ലെന്നും അതിനാല്‍ ജാമ്യം റദ്ദാക്കരുതെന്നും പ്രതിഭാഗം വാദിച്ചു.
https://www.facebook.com/Malayalivartha
