അമ്പലപ്പുഴയിൽ സാമൂഹിക വിരുദ്ധരുടെ ശല്യം കാരണം ദുരിതത്തിലായിരിക്കുകയാണ് ചില വീട്ടുക്കാർ. രാത്രിയിലെത്തി വീട്ടുപറമ്പുകളിലെ ഫലവൃക്ഷങ്ങൾ നശിപ്പിക്കുകയാണ്. അമ്പലപ്പുഴയിൽ തെക്ക് ഗ്രാമപഞ്ചായത്ത് 15-ാം വാർഡ് കാക്കാഴം വ്യാസാ ജങ്ഷന് സമീപമുള്ള 30 ഓളം വീടുകളിലെ വാഴ, പപ്പായ തുടങ്ങിയ ഫല വൃക്ഷങ്ങളാണ് വെട്ടിയരിഞ്ഞിരിക്കുന്നത്.

ഇന്ന് രാവിലെ ഉറക്കമുണർന്ന് നോക്കിയപ്പോഴായിരുന്നു ഞെട്ടിക്കുന്ന കാഴ്ച്ച അവർ കണ്ടത്. വീട്ടുകാരാണ് ഓരോ വീടിന് മുന്നിലും റോഡരികിലും ഉണ്ടായിരുന്ന ഫലവൃക്ഷങ്ങള്‍ വെട്ടിയരിഞ്ഞ നിലയിൽ കണ്ടത്. ഈ ആക്രമണത്തോടെ പ്രദേശവാസികൾ ഭീതിയിലാണ്. വിവരമറിയിച്ചപ്പോൾ അമ്പലപ്പുഴ പൊലീസ് അന്വേഷണം തുടങ്ങി.

ആക്രമണത്തിലെ പ്രതികളെ ഉടൻ പിടികൂടണമെന്ന ആവശ്യം നാട്ടുകാർ ശക്തമാക്കിയിരിക്കുകയാണ്. ഇത്തരത്തിലുള്ള സമാന ആക്രമണം പലപ്പോഴായി നടന്നിട്ടുണ്ടെന്നതാണ് ശ്രദ്ധേയമായ കാര്യം. ചില വീടുകളിൽ മോട്ടോറും ഹോസും നശിപ്പിക്കുകയുണ്ടായി. രണ്ടാഴ്ച മുന്നേ ഈ പ്രദേശത്ത് തെരുവ് നായ്ക്കളുടെ തലയറുത്തിട്ടിരുന്നു. രാത്രികളിൽ വീടുകൾക്കു നേരെ കല്ലേറും നടന്നിരുന്നു.

തീരപ്രദേശമാണ് ഇവിടെ. വഴിവിളക്കുകൾ സ്ഥാപിച്ചാലും അത് നശിപ്പിക്കുന്നത് പതിവായി കൊണ്ടിരിക്കുകയാണ്. രാത്രി സമയത്ത് മറ്റ് പ്രദേശങ്ങളിൽ നിന്നും ധാരാളം യുവാക്കൾ കടൽഭിത്തിയോട് ചേർന്നുള്ള സ്ഥലത്ത് നിൽക്കാറുണ്ട്. ഇവർ ലഹരി വസ്തുക്കൾ ഉപയോഗിക്കാറുണ്ടെന്നാണ് നാട്ടുകാർ പറയുന്നത്. വിവരമറിഞ്ഞ് പൊലീസെത്തിയപ്പോൾ ഇവർ ഓടി കളഞ്ഞു. കുട്ടികൾക്കും സ്ത്രീകൾക്കും പുറത്തിറങ്ങാൻ കഴിയാത്ത സ്ഥിതിയാണ്. പൊലീസിന് നിരവധി തവണ പരാതി നൽകിയിരുന്നു.