ഇന്ഡിഗോയില് ഇനി യാത്ര ചെയ്യില്ലെന്ന് ഇപി ജയരാജന്.... വിമാനത്തിന് ചെലവ് കൂടുതലാണെന്നും ട്രെയിന് ആദായമാണെന്നും ജയരാജന്; ഇന്ഡിഗോയുടെ ഔദ്യോഗിക ഫെയ്സ്ബുക്ക് പേജില് ട്രോളുകള്
തനിക്ക് വിലക്കേര്പ്പെടുത്തിയ ഇന്ഡിഗോയെ പൂര്ണമായി ബഹിഷ്കരിച്ചെന്ന് എല്ഡിഎഫ് കണ്വീനര് ഇപി ജയരാജന്. ഇന്ഡിഗോയില് ഇനി യാത്ര ചെയ്യില്ലെന്ന് തീരുമാനിച്ച ഇപി ജയരാജന് തിരുവനന്തപുരത്ത് നിന്ന് കണ്ണൂരിലേക്ക് ട്രെയിനില് യാത്ര തിരിച്ചു. എന്നാല് ഇപി ജയരാജന്റെ തീരുമാനത്തിനുപിന്നാലെ നിരവധി കമന്റുകളാണ് ഇന്ഡിഗോയുടെ ഔദ്യോഗിക ഫെയ്സ്ബുക്ക് പേജില് വന്നത്.
ഒരു കാര്യം ശരിയായ രീതിയില് പരിശോധിക്കാതെ ഇത്തരത്തില് ഉത്തരവ് പുറപ്പെടുവിക്കുന്ന നിലവാരത്തിലേക്ക് ഇന്ഡിഗോ തരം താഴ്ന്നുപോയെന്ന് ഇപി ജയരാജന് വിമര്ശിച്ചു. തനിക്ക് മൂന്നാഴ്ചത്തേക്കാണ് വിലക്കേര്പ്പെടുത്തിയത് എന്നാല് ഇന്ഡിഗോയെ പൂര്ണമായി ബഹിഷ്കരിച്ചെന്നും ഇപി ജയരാജന് പ്രതികരിച്ചു. വിമാനത്തിന് ചെലവ് കൂടുതലാണെന്നും ട്രെയിന് ആദായമാണെന്നും ജയരാജന് പറഞ്ഞു.
ചിലപ്പോള് കമ്പനി തകര്ന്നു പോകുമെന്നും ഇന്ഡിഗോ പൂട്ടണമെന്ന് ആളുകള് തീരുമാനിക്കട്ടെയെന്നും ജയരാജന് പറഞ്ഞു. എല്ലാവരും യാത്രയ്ക്കായി ട്രെയിന് തെരഞ്ഞെടുക്കണമെന്ന് അഭ്യര്ഥിക്കുന്നതായും അദ്ദേഹം പറഞ്ഞു. ഇന്ഡിഗോ വിമാനത്തില് ഇന്ത്യയ്ക്ക് അകത്തും പുറത്തും മൂന്നാഴ്ച യാത്രചെയ്യുന്നതിനാണ് ഇ.പി. ജയരാജന് വിലക്ക്.
മുഖ്യമന്ത്രിക്കെതിരായ പ്രതിഷേധത്തെ തുടര്ന്നുണ്ടായ വിമാനത്തിലെ അച്ചടക്ക ലംഘനത്തില് എല്ഡിഎഫ് കണ്വീനര് ഇ.പി ജയരാജനും യൂത്ത് കോണ്ഗ്രസ് പ്രവര്ത്തകര്ക്കും ഇന്ഡിഗോ യാത്രാവിലക്ക് ഏര്പ്പെടുത്തിയത്. ഇപി ജയരാജന് 3 ആഴ്ചയും യൂത്ത് കോണ്ഗ്രസ് പ്രവര്ത്തകര്ക്ക് 2 ആഴ്ചയുമാണ് യാത്രാവിലക്ക് ഏര്പ്പെടുത്തിയത്.
'ഇന്ഡിഗോ വൃത്തികെട്ട കമ്പനി, ഇനി കയറില്ല; ഞാന് ആരാണെന്ന് അറിയില്ലെന്ന് തോന്നുന്നു' യാത്രാവിലക്ക് ഏര്പ്പെടുത്തിയ ഇന്ഡിഗോ കമ്പനിയുടെ വിമാനത്തില് ഇനി താനോ കുടുംബമോ യാത്ര ചെയ്യില്ലെന്ന ഇ.പി.ജയരാജന്റെ പ്രഖ്യാപനം ട്രോള് പേജുകളിലും വൈറലാണ്. കണ്ണൂരില്നിന്നും തിരുവനന്തപുരത്തേക്ക് സര്വീസ് നടത്തുന്നത് ഇന്ഡിഗോ മാത്രമാണെന്ന് ഇതു പറയുമ്പോള് അദ്ദേഹത്തിന് അറിയാമായിരുന്നോ എന്നാണ് ചിലര് കമന്റില് ചോദിക്കുന്നത്.
ഇതിനൊപ്പം, കണ്ണൂരിലേക്ക് ഇനി മുതല് നടന്നുപോകുന്ന ഇപി, ആകാശത്ത് കൂടി പറക്കുന്ന ഇന്ഡിഗോ വിമാനത്തിന് കല്ലെറിയാന് നോക്കുന്ന അണികള്, ഇന്ഡിഗോ പെയിന്റ് കടയ്ക്ക് മുന്നിലെ പ്രതിഷേധം, വിമാനത്തിന്റെ വില ചോദിക്കുന്ന യുവ നേതാവ്, അങ്ങനെ തലങ്ങുംവിലങ്ങും ഇപി ട്രോളുകളില് നിറയുകയാണ്.
https://www.facebook.com/Malayalivartha
