ഇടുക്കിയിൽ നാല് വയസ്സുകാരി കുളത്തിൽ വീണ് മരിച്ച നിലയിൽ കണ്ടെത്തി. ഉടുമ്പൻചോലയിൽ പഞ്ചായത്ത് കുളത്തിലാണ് കുട്ടിയുടെ മൃതദേഹം കണ്ടെത്തിയത്. വെള്ളറക്കംപാറ കോളനിയിൽ പരേതനായ പരമശിവം-വീരലക്ഷ്മി ദമ്പതികളുടെ മകൾ ധരണിയാണ് മരിച്ചത്.

കഴിഞ്ഞ ദിവസം രാത്രിയോടെയായിരുന്നു സംഭവം. കുട്ടി കാൽവഴുതി കുളത്തിൽ വീണതാണെന്നാണ് പ്രാഥമിക നിഗമനം. കുളത്തിന് സംരക്ഷണ വേലിയില്ലായിരുന്നു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

അതേസമയം തിരുവനന്തപുരം നവോദയ സ്കൂളിൽ പ്ലസ്ടു വിദ്യാർഥിനി മൂവാറ്റുപുഴയിൽ ചാടി ജീവനൊടുക്കി. ജിൻസി(17) യാണ് പുഴയിൽ ചാടി ജീവനൊടുക്കിയത്. മിഠായി കുന്നം കുഴിയെടുത്ത് കുഞ്ഞുമോന്റെയും മോളിയുടെയും മകളാണ്.

വെള്ളിയാഴ്ച രാവിലെ സ്കൂളിലേക്ക് പോകുന്നതിനായുള്ള ഒരുക്കങ്ങൾക്ക് ശേഷമാണ് ഉറങ്ങാൻ കിടന്നത്. വ്യാഴാഴ്ച രാത്രി എല്ലാവരുംകിടന്നശേഷം വെട്ടിക്കാട്ടുമുക്ക് പാലത്തിൽ നിന്നും ചാടിയെന്നാണ് നി​ഗമനം. കുട്ടിയെ കാണാതായതോടെ മാതാപിതാക്കൾ തലയോലപ്പറമ്പ് പോലീസിൽ പരാതി നൽകിയിരുന്നു.

തലയോലപ്പറമ്പ് പോലീസും കടുത്തുരുത്തി അഗ്നിരക്ഷാസേനയും സംയുക്തമായി നടത്തിയ അന്വേഷണത്തിനൊടുവിൽ മൂന്നുമണിയോടെ വിദ്യാർഥിയെ മരിച്ച നിലയിൽ കണ്ടെത്തുകയായിരുന്നു.