കഴിഞ്ഞ ദിവസം വനിതാ പോലീസ് ഉദ്യോഗസ്ഥ വാഹനാപകടത്തിൽ മരിച്ചിരുന്നു. സിൻസിയെ കുറിച്ച് വേദനാനിർഭരമായ കുറിപ്പ് പങ്കു വച്ചിരിക്കുകയാണ് ആനി ശിവ. ആ വാക്കുകൾ ഇങ്ങനെ; സിൻസീ നീ പോകരുതായിരുന്നു. നിന്നെ സ്നേഹം കൊണ്ട് പൊതിയാൻ. നീ ഇത്രേം നാൾ കാത്തിരുന്നവരൊക്കെ

നിൻ്റെ അരികിലേക്ക് വന്നപ്പോൾ നീ എല്ലാം തട്ടി തെറിപ്പിച്ചു പോകരുതായിരുന്നു. അവരുടെ സ്നേഹം കൊണ്ട് വീർപ്പു മുട്ടാൻ നീ വേണം ആയിരുന്നു. 14 ആം ബാച്ചിലെ എണ്ണം ഒരിക്കലും കുറയില്ല. എന്നും നീ നമ്മളോടൊപ്പം ഉണ്ടാകും. ആദരാഞ്ജലികൾ സുഹൃത്തേ എന്ന് പറഞ്ഞാണ് കുറിപ്പ് അവസാനിപ്പിച്ചിരിക്കുന്നത്.

പത്തനംതിട്ടയിൽ സ്കൂട്ടറും കാറും തമ്മിൽ കൂട്ടിയിടിച്ചുണ്ടായ അപകടത്തിൽ പരിക്കേറ്റ് ചികിത്സയില്‍ കഴിഞ്ഞിരുന്ന പൊലീസുകാരിയാണ് മരിച്ചത് . പത്തനംതിട്ട വനിതാ പൊലീസ് സ്റ്റേഷനിലെ സിപിഒ സിന്‍സി പി.അസീസാണ് (35) മരിച്ചത്. ഇക്കഴിഞ്ഞ പതിനൊന്നിന് കിടങ്ങന്നൂരിന് സമീപത്തുവച്ച്‌ വൈകുന്നേരം മൂന്നരയോടെ സിന്‍സി ഓടിച്ചിരുന്ന സ്കൂട്ടര്‍ കാറുമായി കൂട്ടിയിടിച്ചത്.

അപകടത്തില്‍ തലയ്ക്ക് ഗുരുതരമായി പരിക്കേറ്റ് റോഡില്‍ കിടന്ന സിന്‍സിയെ ആശുപത്രിയിലെത്തിച്ചത് ഏറെ വൈകിയാണ്. വിവരമറിഞ്ഞ് ഇലവുംതിട്ട പൊലീസ് സ്റ്റേഷനില്‍ നിന്ന് പൊലീസുകാരെത്തിയാണ് സിന്‍സിയെ ആശുപത്രിയില്‍ എത്തിച്ചത്. അപ്പോഴേക്കും ശരീരത്തില്‍ നിന്ന് ഏറെ രക്തം നഷ്ടമായിരുന്നു.

സിന്‍സിയെ ആദ്യം കോഴഞ്ചേരിയിലെ സ്വകാര്യ ആശുപത്രിയിലും അവിടെനിന്ന് കല്ലിശേരിയിലെ സ്വകാര്യ ആശുപത്രിയിലേക്കും മാറ്റിയിരുന്നു. എന്നിട്ടും ജീവൻ രക്ഷിക്കാനായില്ല.തലയ്‌ക്കേറ്റ പരിക്കായിരുന്നു മരണ കാരണം. സ്ത്രീകള്‍ക്കും കുട്ടികള്‍ക്കും സെല്‍ഫ് ഡിഫന്‍സ് പരിശീലനം നല്‍കുന്ന ചുമതല വഹിക്കുകയായിരുന്നു സിന്‍സി.