കാല്‍തെറ്റി തീവണ്ടിക്കടിയിലേയ്ക്ക് വീണ് യുവാവിന് ദാരുണാന്ത്യം. എളംകൂര്‍ ചെറാംകുത്തില്‍ മണലായിയിലെ കല്ലിങ്ങല്‍ മഹേഷാണ് മരിച്ചത്. ഞായറാഴ്ച പുലര്‍ച്ചെ തിരൂര്‍ റെയില്‍വേ സ്റ്റേഷനില്‍ എത്തിയ മഹേഷ് നീങ്ങിത്തുടങ്ങിയ തീവണ്ടിയില്‍ നിന്ന് പ്ലാറ്റ്‌ഫോമിലേക്ക് ചാടിയിറങ്ങാൻ ശ്രമിക്കുന്നതിനിടെയാണ് കാല്‍തെറ്റി തീവണ്ടിക്കടിയിലേയ്ക്ക് വീണത്.

പോണ്ടിച്ചേരി-മംഗളൂരു എക്‌സ്പ്രസില്‍ പോത്തന്നൂരില്‍ നിന്നാണ് മഹേഷ് ട്രെയിൻ കയറിയത്. തിരുച്ചിറപ്പള്ളിയില്‍ എം.ആര്‍.എഫ്. കമ്പനിയില്‍ ഇലക്ട്രിക്കല്‍ സൂപ്പര്‍വൈസറാണ് മഹേഷ്. തിരൂരില്‍ വണ്ടി നിര്‍ത്തിയത് അറിയാൻ വൈകിയെന്നാണ് സംശയിക്കുന്നത്.

4.58-ന് വണ്ടി വിട്ടപ്പോള്‍ പെട്ടെന്ന് ചാടിയിറങ്ങുകയായിരുന്നു. സത്യകുമാറിന്റെയും സുനിതയുടെയും മകനാണ്. സഹോദരി: മഞ്ജിത. സുരേഷ്‌കുമാറാണ് സഹോദരീഭര്‍ത്താവ്. സംസ്ക്കാരം വീട്ടുവളപ്പിൽ നടന്നു.