നയതന്ത്ര സ്വര്‍ണക്കടത്ത് കേസിൽ എന്‍ഐഎ റെയ്ഡില്‍ പിടിച്ചെടുത്ത ഐ ഫോണ്‍ വിട്ടുകിട്ടണമെന്ന് ആവശ്യപ്പെട്ട് കോടതിയെ സമീപിക്കാനൊരുങ്ങി സ്വപ്‌ന സുരേഷ്. മുഖ്യമന്ത്രി ഉള്‍പ്പെടെയുള്ളവര്‍ക്കെതിരായ തെളിവുകള്‍ ഈ ഐ ഫോണിലുണ്ടെന്നും, ഫോണുകളില്‍ ഒന്ന് മഹസറില്‍ രേഖപ്പെടുത്താതെ മാറ്റിയെന്ന ആരോപണമാണ് സ്വപ്ന ഉന്നയിക്കുന്നത്.

എം ശിവശങ്കര്‍ യുഎഇ കോണ്‍സുലേറ്റുമായി നടത്തിയ ചില നിര്‍ണായക സംഭാഷണങ്ങളുടെ തെളിവുകളും ഫോണിലുണ്ടെന്ന് സ്വപ്‌ന ആരോപിക്കുന്നു. ഐ ഫോണില്‍ നിര്‍ണായക തെളിവുകളുണ്ടെന്ന ആരോപണം സ്വപ്‌ന ആവര്‍ത്തിച്ച പശ്ചാത്തലത്തില്‍ ഫോണ്‍ എന്‍ഫോഴ്‌സ്‌മെന്റ് ഡയറക്ടറേറ്റ് പരിശോധിക്കുമെന്ന് റിപ്പോര്‍ട്ടുകളുണ്ടായിരുന്നു.

ഫോണ്‍ വിവരങ്ങളുടെ മിറര്‍ കോപ്പി തേടി എന്‍ഫോഴ്‌സ്‌മെന്റ് ഡയറക്ടറേറ്റ് എന്‍ഐഎ കോടതിയെ സമീപിച്ചിരുന്നു. സ്വപ്‌ന സുരേഷ് 2016-2017 കാലഘട്ടത്തിലാണ് ഈ ഐ ഫോണ്‍ ഉപയോഗിച്ചിരുന്നത്. തിരുവനന്തപുരത്തെ വീട്ടില്‍ എന്‍ഐഎ നടത്തിയ റെയ്ഡിലാണ് ഫോണ്‍ പിടിച്ചെടുത്തതെന്ന് സ്വപ്ന പറയുന്നു.