അഗ്നിപഥ് റിക്രൂട്ട്‌മെന്റ് റാലിയിൽ പങ്കെടുക്കുന്നതിനായുള്ള തെക്കൻ മേഖലയിലുള്ളവർക്കായുള്ള ഓൺലൈൻ റജിസ്‌ട്രേഷൻ തീയതി നീട്ടി. ഹ്രസ്വകാല സൈനിക സേവനത്തിന് താൽപര്യമുള്ളവർക്കുവേണ്ടി നടത്തുന്ന കേരളത്തിലെ അഗ്നിപഥ് റിക്രൂട്ട്‌മെന്റ് റാലിയുടെ ഓൺലൈൻ രജിസ്ട്രേഷൻ ആരംഭിക്കുന്നതിനുള്ള തീയതി ഓ​ഗസ്റ്റ് ഒന്നിൽ നിന്നും ഓ​ഗസ്റ്റ് 5 ലേക്കാണ് നീട്ടിയത്.

സാങ്കേതിക കാരണങ്ങളാലാണ് തീയതി നീട്ടിയതെന്നാണ് വിശദീകരണം. ഓഗസ്റ്റ് 05 മുതൽ സെപ്തംബർ 03 വരെ www.joinindianarmy.nic.in എന്ന വെബ്സൈറ്റ് വഴി ഓൺലൈനായി രജിസ്ട്രേഷൻ ചെയ്യാവുന്നതാണ്.തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലെ പുരുഷ ഉദ്യോഗാർത്ഥികൾക്കായുള്ള അഗ്‌നിപഥ് റിക്രൂട്ട്മെന്റ് റാലി 2022 നവംബർ 15 മുതൽ നവംബർ 30 വരെ കൊല്ലം ലാൽ ബഹദൂർ ശാസ്ത്രി സ്റ്റേഡിയത്തിൽ നടക്കും.

അഗ്നിവീർ ട്രേഡ്‌സ്‌മെൻ, അഗ്നിവീർ ടെക്‌നിക്കൽ, അഗ്നിവീർ ജനറൽ ഡ്യൂട്ടി, എന്നീ വിഭാഗങ്ങളിൽ അപേക്ഷിക്കുന്നവർ പത്താം ക്ലാസ്സ് പാസായിരിക്കണം. അഗ്നിവീർ കാറ്റഗറിയിലേക്ക് അപേക്ഷിക്കാൻ എട്ടാം ക്ലാസ്സാണ് യോഗ്യത. അഗ്നിവീർ ക്ലർക്ക്/സ്റ്റോർ കീപ്പർ ടെക്‌നിക്കൽ എന്നീ വിഭാഗങ്ങൾ സേനയിൽ എൻറോൾ ചെയ്യുന്നതിനാണ് കൊല്ലത്ത് റാലി സംഘടിപ്പിക്കുന്നത്.