കൊല്ലത്ത് വന്ധ്യംകരണം നടത്തിയ തെരുവ് നായ പ്രസവിച്ചു. കൊല്ലം കോര്‍പ്പറേഷന്റെ വന്ധ്യംകരണ പദ്ധതി പ്രകാരം വന്ധ്യംകരിക്കപ്പെട്ട നായ ആറ് കുഞ്ഞുങ്ങൾക്ക് ജന്മം നൽകിയത്.മാര്‍ച്ചിൽ ഊര്‍ജ്ജിതമാക്കിയ തെരുവ് നായ വന്ധ്യം കരണ പദ്ധതി പ്രകാരം നഗരത്തിൽ അലഞ്ഞ് തിരിയുന്ന നായകളെ പിടികൂടി വന്ധ്യം കരിച്ചിരുന്നു.

വന്ധ്യംകരിക്കപ്പെട്ട നായകളുടെ ചെവിയിൽ തിരിച്ചറിയാൻ അടയാളവു നൽകിയിരുന്നു. ഇക്കൂട്ടത്തിൽ ഈ നായയും ഉൾപ്പെട്ടിരുന്നു. പ്രത്യേക സംഘത്തെ നിയോഗിച്ച് അഞ്ചാലുംമൂട് മൃഗാശുപത്രിയിൽ വച്ചായിരുന്നു വന്ധ്യംകരണം നടത്തിയത്. ഇതിന് ശേഷം തിരിച്ചുകൊണ്ടുവിട്ട നായ പോളയത്തോട് പ്രദേശത്ത് അലഞ്ഞ് നടന്നിരുന്നു.

‌‌ഇതിനിടെ കഴിഞ്ഞ ദിവസമാണ് നായയെ പ്രസവിച്ച നിലയിൽ കണ്ടെത്തിയത്. നായയും കുഞ്ഞുങ്ങളും ഇപ്പോൾ പോളയത്തോടാണ് കഴിയുന്നത്. ഇപ്പോൾ പരിസരത്തെ വ്യാപാരികളും ഓട്ടോ ഡ്രൈവര്‍മാരും നൽകുന്ന ഭക്ഷണവും ബിസ്‌കറ്റും കഴിച്ചാണ് ഇവരുടെ ജീവിതം. എന്നാൽ നായയെ വന്ധ്യംകരിക്കാതെയാണ് തിരികെ കൊണ്ടവിട്ടതെന്നാണ് നാട്ടുകാരുടെ ആരോപിക്കുന്നത്.