ക്ഷേത്രത്തില്‍ യാഗം കാണാനെത്തിയ സ്ത്രീകളുടെ കഴുത്തില്‍ കിടന്ന മാല കവര്‍ന്നെടുത്ത തമിഴ് നാട് സ്വദേശിനികളെ ഭക്തര്‍ തടഞ്ഞ് വച്ച് പോലീസിന് കൈമാറി, പരിശോധനയില്‍ അറസ്റ്റിലായവരില്‍ നിന്ന് മോഷണ മുതല്‍ കണ്ടെടുക്കാനായില്ല. കൂടെയുണ്ടായിരുന്ന ആളിനായി അന്വേഷണം ഊര്‍ജ്ജിതമാക്കി.

തോളൂര്‍ ചെമ്പകമംഗലം ഭദ്രകാളി മഹാക്ഷേത്രത്തില്‍ നടന്ന മഹാരുദ്ര ഭൈരവി യാഗം കാണാനായി എത്തിയ രണ്ട് സ്ത്രീകളുടെ കഴുത്തില്‍ കിടന്ന മാല നഷ്ടപ്പെട്ട കേസില്‍ സഹോദരങ്ങളായ വനിതകളെ ഭക്തര്‍ തടഞ്ഞു വച്ച് പൊലീസിന് കൈമാറി. തമിഴ്നാട് സ്വദേശിനികളായ കനക (34), പത്മ (48) എന്നിവരെയാണ് ആര്യനാട് പൊലീസ് അറസ്റ്റ് ചെയ്തത്. ഇത് ഇവരുടെ കൃത്യമായ പേര് ആണോ എന്ന കാര്യത്തില്‍ പൊലീസിന് സംശയമേറെയുണ്ട്.

മുമ്പ് അമ്പലപ്പുഴ പൊലീസ് അറസ്റ്റ് ചെയ്തപ്പോള്‍ മറ്റൊരു പേരാണ് പൊലീസിനോട് ഇവര്‍ പറഞ്ഞതെന്ന് ആര്യനാട് എസ്‌ഐ എല്‍.ഷീന പറഞ്ഞു.ഇന്നലെ ഉച്ചയ്ക്കാണ് പേഴുംമൂട് വസന്തം വീട്ടില്‍ പി.വസന്ത കുമാരി (68), വാലൂക്കോണം തെങ്ങുവിള അനിഴം വീട്ടില്‍ ഐ.ശശികല (49) എന്നിവരുടെ മാലകള്‍ നഷ്ടമായത്. ക്ഷേത്രത്തില്‍ നിന്ന് ആഹാരം കഴിക്കാനുള്ള തിരക്കിനിടെയാണ് വസന്ത കുമാരിയുടെ 4 പവന്റെ മാലയും ശശികലയുടെ 3 പവന്റെ മാലയും കവര്‍ന്നത്.
മോഷണമുതല്‍ ഇവരില്‍ നിന്നും കണ്ടെടുക്കാനായിട്ടില്ല. അറസ്റ്റിലായവര്‍ക്ക് ഒപ്പം ഉണ്ടായിരുന്ന ആളിനെ പിടികൂടുന്നതിനായി അന്വേഷണം ഊര്‍ജിതമാക്കിയതായി എസ്‌ഐ പറഞ്ഞു. ക്ഷേത്രത്തിലെ സിസിടിവി ദൃശ്യത്തില്‍ കണ്ട ഇവരെ ഭക്തര്‍ തടഞ്ഞുവച്ച് പൊലീസിന് കൈമാറുകയായിരുന്നു.