ഗവര്ണറെ കൊണ്ട് മാപ്പു പറയിക്കാന് സിപിഎമ്മിന് മോഹം; കേരളത്തിലെത്തിയാല് പരസ്യ പ്രതിഷേധത്തിന് ഒരുങ്ങി സിപിഎം; നേതൃസ്ഥാനത്ത് എംവി ജയരാജന്എംവി ജയരാജന്
കണ്ണൂര് സര്വകലാശാലയിലെ വിഷയങ്ങളില് ഗവര്ണറെ കൊണ്ട് മാപ്പു പറയിക്കാന് ഇറങ്ങിത്തിരിച്ചിരിക്കുകയാണ് സിപിഎം. ഇതിനായി പരസ്യ പ്രതിഷേധത്തിലേക്ക് കടക്കുകയാണ് സി പി എം. ഗവര്ണര് ആരിഫ് മുഹമ്മദ് ഖാന് മാപ്പ് പറയണമെന്നാവശ്യപ്പെട്ട് ഇന്ന് കണ്ണൂര് സര്വകലാശാലയില് പ്രതിഷേധ യോഗം നടത്താനാണ് തീരുമാനമായത്. സര്വകലാശാല സംരക്ഷണ സമിതി എന്നപേരില് സി പി എമ്മാണ് പരിപാടി സംഘടിപ്പിക്കുന്നത്. സി പി എം ജില്ലാ സെക്രട്ടറി എം വി ജയരാജന് പ്രതിഷേധ യോഗം ഉദ്ഘാടനം ചെയ്യുക.
ഇക്കഴിഞ്ഞ ദിവസമാണ് കണ്ണൂര് വി സി ഡോ. ഗോപിനാഥ് രവീന്ദ്രനെതിരെ ക്രിമിനല് പ്രയോഗം നടത്തിയത്. ചരിത്ര കോണ്ഗ്രസ് വേദിയില് കായികമായി തന്നെ നേരിടാന് വൈസ് ചാന്സിലര് ഒത്താശ ചെയ്തെന്ന് ആരോപിച്ചായിരുന്നു ഗവര്ണറുടെ ക്രിമിനല് പരാമര്ശം. 2019 ല് കണ്ണൂര് സര്വ്വകാലാശാലയില് നടന്ന ചരിത്ര കോണ്ഗ്രസിലെ സംഭവവുമായി ബന്ധപ്പെട്ടായിരുന്നു ആരോപണം പൗരത്വ നിയമ ഭേദഗതിയെ ന്യായീകരിച്ച ഗവര്ണര്ക്കെതിരെ അന്ന് വലിയ പ്രതിഷേധം ഉയര്ന്നിരുന്നു. ചരിത്രകാരന് ഇര്ഫാന് ഹബീബ് തന്റെ പ്രസംഗത്തെ ചോദ്യം ചെയ്യാന് ശ്രമിച്ചതും പിന്നീട് കയ്യാങ്കളിയോളമെത്തിയതും ആസൂത്രിത സംഭവമായിരുന്നുവെന്നും അതിന് എല്ലാ ഒത്താശയും കണ്ണൂര് വിസി ചെയ്തെന്നുമാണ് ഗവര്ണര് ആരോപിക്കുന്നത്. തന്റെ എഡിസിക്ക് നേരെ കയ്യേറ്റമുണ്ടായി. ദില്ലി കേന്ദ്രീകരിച്ച് നടന്ന ഗൂഢാലോചനയാണ് സംഭവത്തിന് പിന്നിലെന്നും വൈസ് ചാന്സിലര് അതില് പങ്കാളിയായിരുന്നുവെന്നും ഗവവര്ണര് കഴിഞ്ഞ ദിവസം പറഞ്ഞിരുന്നു. രാഷ്ട്രപതിക്കോ ഗവര്ണ്ണര്ക്കോ നേരെ കയ്യേറ്റ ശ്രമമുണ്ടാകുന്നത് ഗുരുതരമായ കുറ്റമാണ്. എന്നാല് സംഭവം പൊലീസിന്റെ ശ്രദ്ധയില് പെടുത്താനോ, താന് നിര്ദ്ദേശിച്ച അന്വേഷണത്തോട് സഹകരിക്കാനോ വിസി തയ്യാറായില്ലെന്നും ഗവര്ണര് ആരോപിച്ചിരുന്നു.
അതേസമയം രാജ്ഭവനെ ഗവര്ണര് സംഘപരിവാര് ഗൂഢാലോചനാ കേന്ദ്രമാക്കി മാറ്റിയെന്നായിരുന്നു സി പി എം നേതാക്കളുടെ തിരിച്ചടി. ഗവര്ണര് പദവിയും രാജ്ഭവനും ദുരുപയോഗം ചെയ്യരുത്. ഗവര്ണറുടെ നടപടി പ്രതിഷേധാര്ഹമെന്നുമാണ് എല് ഡി എഫ് കണ്വീനര് ഇ പി ജയരാജന് പ്രതികരിച്ചത്. കണ്ണൂര് വി സിയ്ക്ക് പിന്തുണ നല്കുന്നെന്നും എല് ഡി എഫ് പറഞ്ഞു. ഉന്നതമായ അക്കാദമിക പാരമ്പര്യമുള്ള അധ്യാപകനാണ് വി സിയെന്നും ഗവര്ണര് ആര് എസ് എസ് സേവകനെ പോലെ തരം താഴുന്നു എന്നും ഇ പി ജയരാജന് പറഞ്ഞു. കേരള ഗവര്ണര് എല്ലാ സീമകളും ലംഘിക്കുകയാണെന്നാണ് സിപിഎം കണ്ണൂര് ജില്ലാ സെക്രട്ടറി എം വി ജയരാജന് പറഞ്ഞത്. കണ്ണൂര് സര്വ്വകലാശാല വിസിക്കെതിരായ ക്രിമിനല് പരാമര്ശം ദൗര്ഭാഗ്യകരമാണ്. അദ്ദേഹം ഗവര്ണര് സ്ഥാനത്ത് ഇരിക്കാന് യോഗ്യനല്ലെന്നും ജയരാജന് പറഞ്ഞു. ഡല്ഹിയില് വച്ച് ഗൂഡാലോചന നടത്തിയെന്ന പരാമര്ശം ഒരിക്കലും ഉണ്ടാകാന് പാടില്ലാത്തതാണ്. ഗവര്ണര് പൗരത്വ ഭേദഗതിയെ ന്യായീകരിച്ചു. എന്നാല് ചരിത്ര കോണ്ഗ്രസ് വേദി രാഷ്ട്രീയ വേദിയല്ല. ചരിത്ര കോണ്ഗ്രസ് വേദിയില് ഗവര്ണര് സംഘപരിവാറിന്റെ ശബ്ദമായി. അതാണ് അവിടെ പ്രതിഷേധമുണ്ടാകാന് കാരണം. ഇങ്ങനെയൊക്കെ കള്ളം പറയാന് ഈ പദവിയിലില് ഇരിക്കുന്ന ആള്ക്ക് സാധിക്കുമോ? വൈസ് ചാന്സലര്ക്കെതിരായ വ്യക്തിഹത്യ പരാമര്ശം പിന്വലിക്കണമെന്നും ജയരാജന് ആവശ്യപ്പെട്ടിരുന്നു.
അതേസമയം ഇന്നലെ രാത്രിയും കണ്ണൂര് സര്വകലാശാല വിഷയങ്ങളില് നിലപാട് ആവ!ര്ത്തിച്ച് ഗവര്ണര് രംഗത്തെത്തിയിരുന്നു. ചരിത്രകാരന് ഇര്ഫാന് ഹബീബിനെ ഗുണ്ടയെന്നാണ് ഗവര്ണര് വിളിച്ചത്. ഇര്ഫാന് ഹബീബ് ചെയ്തത് തെരുവ് ഗുണ്ടയുടെ പണിയാണ്. ഇര്ഫാന് ഹബീബിന്റെ പ്രവര്ത്തിയെ പ്രതിഷേധമെന്ന് വിളിക്കാനാകില്ല. ആക്രമണം മുന്കൂട്ടി തീരുമാനിച്ചതാണെന്നാണ് വിമര്ശിച്ച ഗവര്ണര്, കണ്ണൂര് വൈസ് ചാന്സിലര്ക്കെതിരെയും വീണ്ടും രംഗത്തെത്തി. ചരിത്ര കോണ്ഗ്രസില് ഉണ്ടായത് ആസൂത്രിത ആക്രമണണെന്ന് ഗവര്ണര് ആരോപിച്ചു. ദില്ലിയില് ഗൂഡാലോചന നടത്തിയത് മുന്പേ അറിഞ്ഞിരുന്നതായി വിജിലന്സ് ഉദ്യോഗസ്ഥര് പറഞ്ഞിരുന്നു. ഗൂഢാലോചനയില് വിസിയും പങ്കാളിയാണ്. വിസിയുടെ ക്രിമിനല് മനോഭാവം തുറന്നു കാണിക്കുകയാണ് തന്റെ ഉദ്ദേശ്യം. കേരളത്തില് ഭരണഘടന സംവിധാനങ്ങള് തകര്ന്നതിന്റെ തെളിവാണിതെന്നും വൈസ് ചാന്സിലര്ക്കുള്ള നടപടി പരിശോധിച്ചശേഷം തീരുമാനിക്കുമെന്നും ഗവര്ണര് ദില്ലിയില് പറഞ്ഞു.
https://www.facebook.com/Malayalivartha
