വിഴിഞ്ഞം പദ്ധതി നിര്‍ത്തിവച്ചുകൊണ്ടുള്ള ഒത്തുതീര്‍പ്പിനില്ലെന്ന് നിയമസഭയില്‍ ആവര്‍ത്തിച്ച് മുഖ്യമന്ത്രി.... സമരക്കാരുടെ ആവശ്യം പരിഗണിച്ച് തീരശോഷണം പഠിക്കാന്‍ വിദഗ്ധ സമിതിയെ നിയോഗിക്കുമെന്നും മുഖ്യമന്ത്രി.

തുറമുഖ നിര്‍മാണത്തിനായി മത്സ്യത്തൊഴിലാളികളെ കുടിയൊഴിപ്പിച്ചിട്ടില്ല. മാത്രവുമല്ല തുറമുഖനിര്‍മാണം തീരശോഷണത്തിനു കാരണമാകുന്നെന്ന് പഠനങ്ങളില്‍ കണ്ടെത്തിയിട്ടില്ലെന്നും സഭയില്‍ മുഖ്യന്ത്രി പറഞ്ഞു. പദ്ധതിക്ക് ആവശ്യമായ എല്ലാ പഠനങ്ങളും പൂര്‍ത്തിയാക്കിയ ശേഷമാണ് കരാറിലേര്‍പ്പെട്ട് നിര്‍മാണപ്രവര്‍ത്തനങ്ങള്‍ തുടങ്ങിയത്.

സമരക്കാരുടെ ആവശ്യം പരിഗണിച്ച് തീരശോഷണം പഠിക്കാനായി വിദഗ്ധ സമിതിയെ നിയോഗിക്കുമെന്നും മുഖ്യമന്ത്രി പറഞ്ഞു. മൂന്നു മാസത്തിനകം സമിതിയോട് ഇടക്കാല റിപ്പോര്‍ട്ട് ആവശ്യപ്പെടും. പദ്ധതി തുടങ്ങുംമുമ്പ് തന്നെ തീരശോഷണം ഉണ്ട്. തുറമുഖനിര്‍മാണത്തിന്റെ ഭാഗമായി തീരശോഷണം ഉണ്ടാകുന്നെന്ന വാദം അടിസ്ഥാനരഹിതമാണെന്നും സഭയില്‍ ആവര്‍ത്തിച്ച് മുഖ്യമന്ത്രി.



ഒരു വിഭാഗം ഏഴ് ആവശ്യങ്ങള്‍ ഉന്നയിച്ച് സമരം നടത്തിവരികയാണ്. ഇതില്‍ ഭൂരിഭാഗം ആവശ്യങ്ങളിലും സര്‍ക്കാര്‍ ഇടപെടല്‍ നടത്തുന്നുണ്ടെന്നും മുഖ്യമന്ത്രി. മത്സ്യത്തൊഴിലാളികളുടെ ചില ആവശ്യങ്ങള്‍ ന്യായമാണ്. ചില ആവശ്യങ്ങള്‍ ദീര്‍ഘകാല അടിസ്ഥാനത്തിലുള്ളവയും ചിലത് അടിയന്തരമായി പരിഗണിക്കേണ്ടവയുമാണെന്നും മുഖ്യമന്ത്രി.