കേരളത്തില്‍ അഞ്ച് ജില്ലകളില്‍ അടുത്ത 24 മണിക്കൂര്‍ നേരത്തേക്ക് തീവ്ര മഴയ്ക്ക് സാധ്യതയെന്ന് ഐഎംഡി മുതിര്‍ന്ന ശാസ്ത്രജ്ഞന്‍ ആര്‍ കെ ജനമണി. ആലപ്പുഴ, കോട്ടയം, ഇടുക്കി, എറണാകുളം , പത്തനംതിട്ട ജില്ലകള്‍കളിലാണ് മഴക്ക് സാധ്യത. ഈ ജില്ലകളില്‍ ഓറഞ്ച് അലര്‍ട്ട് മുന്നറിയിപ്പ് നല്‍കി. 100 മില്ലിമീറ്റര്‍ മുതല്‍ 200 മില്ലിമീറ്റര്‍ വരെ മഴയ്ക്ക് സാധ്യതയെന്നാണ് മുന്നറിയിപ്പ്. ഒന്നോ രണ്ടോ ജില്ലകളില്‍ ചില സ്ഥലങ്ങളിലെ അതിതീവ്ര മഴക്കും സാധ്യതയുണ്ട്. കാലാവസ്ഥാ നിരീക്ഷണ വകുപ്പിന്റെ മുന്നറിയിപ്പ് പാളുന്നുവെന്ന ആരോപണത്തിനും അദ്ദേഹം മറുപടി നല്‍കി. 200 മില്ലി മീറ്ററില്‍ കൂടുതല്‍ മഴ എവിടെയും കിട്ടിയിട്ടില്ല. ചില ഇടങ്ങളില്‍ പെട്ടെന്ന് വലിയ വെള്ളക്കെട്ട് ഉണ്ടാകുന്നുണ്ട്. അതിനു വേറെയും കാരണങ്ങള്‍ ഉണ്ടാകാം. മഴ നിശ്ചിത അളവില്‍ തന്നെ ആണ് പെയ്യുന്നത്. ഐഎംഡി കൃത്യമായ മുന്നറിയിപ്പുകള്‍ നല്‍കുന്നുണ്ട്, കളര്‍കോഡ് സഹിതം, കേരളം വിദേശ കമ്പനികളുടെ സഹായം കൂടി തേടുന്നു എന്നതിനെക്കുറിച്ച് അറിയില്ലെന്നും അദ്ദേഹം പറഞ്ഞു.

സംസ്ഥാനത്ത് കനത്ത മഴ മൂലം ദീര്‍ഘദൂര തീവണ്ടികള്‍ മണിക്കൂറുകള്‍ വൈകി. പുലര്‍ച്ചെ കണ്ണൂരില്‍ നിന്നും പുറപ്പെട്ട് ഉച്ചയോടെ തിരുവനന്തപുരത്ത് എത്തി തിരികെ മടങ്ങി പോകേണ്ട ജനശതാബ്ദി എക്‌സ്പ്രസ് നിലവില്‍ മണിക്കൂറുകള്‍ വൈകിയാണ് ഓടുന്നത്. കോട്ടയം വഴി പോകേണ്ട ഈ ട്രെയിന്‍ ആലപ്പുഴ വഴി തിരിച്ചു വിട്ടിട്ടുണ്ട്. ഉച്ചയ്ക്ക് 2.10ന് തിരുവനന്തപുരത്ത് എത്തേണ്ട ഈ ജനശതാബ്ദി വൈകിട്ട് 3.30ന് ആലപ്പുഴയിലേക്ക് പ്രവേശിക്കുന്നതേയുള്ളൂ. ഇതോടെ തിരുവനന്തപുരം കണ്ണൂര്‍ ജനശതാബ്ദിയും മണിക്കൂറുകള്‍ വൈകാനാണ് സാധ്യത. എറണാകുളം ജംഗ്ഷനിലേക്ക് എത്തേണ്ട മംഗള നിസ്സാമുദ്ദീന്‍ എറണാകുളം നോര്‍ത്ത് സ്റ്റേഷനില്‍ സര്‍വ്വീസ് അവസാനിപ്പിക്കും.

ട്രെയിന്‍ 16650 നാഗര്‍കോവില്‍ മംഗളുരു പരശുറാം എക്‌സ്പ്രസ്സ് തൃപ്പുണിത്തുറ എറണാകുളം ജംഗ്ഷന്‍ എറണാകുളം ടൗണ്‍ റൂട്ടില്‍ വഴി തിരിച്ച് വിടും. ട്രെയിന്‍ 12618 നിസാമുദ്ദിന്‍ എറണാകുളം മംഗള എക്‌സ്പ്രസ്സ് ഇന്ന് എറണാകുളം ജംഗ്ഷന്‍ സ്റ്റേറ്റഷന് പകരം എറണാകുളം ടൌണ്‍ സ്റ്റേഷനില്‍ സര്‍വീസ് അവസാനിപ്പിച്ചു. കോട്ടയം വഴിയുളള ട്രെയിന്‍ 06768 കൊല്ലം എറണാകുളം മെമു എക്‌സ്പ്രസ്സ് തൃപ്പുണിത്തുറയില്‍ സര്‍വീസ് അവസാനിപ്പിച്ചു. കണ്ണൂര്‍ എക്‌സിക്യുട്ടിവ് അലപ്പുഴക്കും ഇടപ്പള്ളിക്കും ഇടയില്‍ ഇന്ന് ഭാഗികമായി റദ്ദ് ചെയ്തു. 16308 കണ്ണൂര്‍ ആലപ്പുഴ എക്‌സിക്യൂട്ടിവ് ഇടപ്പള്ളിയില്‍ സര്‍വ്വീസ് അവസാനിപ്പിച്ചു. കണ്ണൂരേയ്ക്ക് പോകുന്ന 16307 ആലപ്പുഴ കണ്ണൂര്‍ എക്‌സിക്യൂട്ടിവ് ഇന്ന് ഇടപ്പള്ളിയില്‍ നിന്ന് സര്‍വീസ് ആരംഭിക്കും. കോട്ടയം വഴിയുള്ള 06769 എറണാകുളം കൊല്ലം മെമു എക്‌സ്പ്രസ് ഇന്ന് തൃപ്പൂണിത്തുറയില്‍ നിന്നാവും സര്‍വീസ് ആരംഭിക്കുക. എറണാകുളം ജംഗ്ഷനും തൃപ്പൂണിത്തുറക്കും ഇടയില്‍ ഈ ട്രെയിന്‍ ഭാഗികമായി റദ്ദ് ചെയ്തിട്ടുണ്ട്. ആലപ്പുഴ വഴി ഇന്ന് ഡൈ വേര്‍ട്ട ചെയ്തിട്ടുള്ള 12081 കണ്ണൂര്‍ തിരുവനന്തപുരം ജനശതാബ്ദി, 17230.സെക്കന്തരാബദ് തിരുവനന്തപുരം ശബരി ട്രെയിനുകള്‍ക്ക് ചേര്‍ത്തല, ആലപ്പുഴ, അമ്പലപ്പുഴ സ്റ്റേഷനുകളില്‍ സ്റ്റോപ്പ് ഉണ്ടായിരിക്കും.