ഇലന്തൂരിലെ നരബലി കൊലപാതക കേസിലെ മുഖ്യപ്രതി മുഹമ്മദ് ഷാഫി മദ്യവും മയക്കുമരുന്നും സ്ഥിരമായി ഉപയോഗിക്കുന്നയാള്‍.... പുത്തന്‍കുരിശ്ശിലെ ഒരു സ്വകാര്യ കമ്പനിയില്‍ ലോറി ഡ്രൈവറായി ജോലി ചെയ്യുന്ന സ്ഥലത്തിനടുത്തുള്ള 60 കാരിയുമായി ബന്ധമുണ്ടായിരുന്ന ഷാഫി അവരുടെ മുന്നില്‍ വച്ച് 75 കാരിയെ ക്രൂരമായി ബലാത്സംഗം ചെയ്തശേഷം കത്തി കൊണ്ട് അവരെ ആക്രമിച്ചു, ആ കേസില്‍ വിചാരണ ആരംഭിക്കാനിരിക്കെയാണ് കേരളത്തെ ഞെട്ടിച്ച ഈ കൊലപാതകക്കേസ്

ജോലി ചെയ്യുന്ന സ്ഥലത്തിന് സമീപത്തുള്ള 60-കാരിയുമായി ഷാഫിക്ക് ബന്ധമുണ്ടായിരുന്നു. ഇവരുടെ വീട്ടിലെ സ്ഥിരം സന്ദര്‍ശകനായിരുന്നു.

ഒരു ദിവസം മദ്യപിച്ച് ഈ സ്ത്രീയുടെ വീട്ടില്‍ നില്‍ക്കുമ്പോള്‍ വഴിയിലൂടെ നടന്നുപോയ 75-കാരിയെയാണ് ആക്രമിച്ചത്. താനുമായി അടുപ്പമുള്ള സ്ത്രീയുടെ സഹായത്തോടു കൂടി ഇവരെ വീട്ടിലേക്ക് വലിച്ചുകൊണ്ടുപോയ ശേഷം തന്റെ അടുപ്പക്കാരിയുടെ മുന്നില്‍ വെച്ച് ക്രൂരമായി ബലാത്സംഗം ചെയ്യുകയായിരുന്നു.

ഇതിനുശേഷം ഇയാള്‍ കയ്യില്‍ കരുതാറുള്ള കത്തി ഉപയോഗിച്ച്75കാരിയെ ആക്രമിച്ചശേഷം അവിടെനിന്ന് പോയി. ഈ കേസില്‍ ഷാഫിയെ പുത്തന്‍കുരിശ്ശ് പോലീസ് അറസ്റ്റ് ചെയ്ത് കോടതിയില്‍ ഹാജരാക്കി. 2021 ഫെബ്രുവരിയില്‍ കേസില്‍ ജാമ്യത്തിലിറങ്ങി.

പുത്തന്‍കുരിശ് പോലീസ് സ്റ്റേഷന്‍ പരിധിയില്‍ പ്രവേശിക്കരുതെന്ന ജാമ്യവ്യവസ്ഥ നിലനിന്നിരുന്നതിനാല്‍ ഇയാള്‍ പിന്നീട് അവിടേക്ക് പോയില്ല.

ക്രിമിനല്‍ പശ്ചാത്തലവും ഇരകളെ അക്രമിക്കുന്ന മനോഭാവുമുള്ള വ്യക്തിയാണ് ഷാഫിയെന്ന് പോലീസ് . മദ്യവും മയക്കുമരുന്നും സ്ഥിരമായി ഉപയോഗിക്കുന്നയാളാണ്. പുത്തന്‍കുരിശ് സംഭവത്തിന് ശേഷം ഇവിടേക്ക് പ്രവേശിക്കാന്‍ ആകാത്തതോടെയാണ് മറ്റ് സ്ഥലങ്ങളിലേക്ക് പ്രവര്‍ത്തനം മാറിയത്.


പിന്നീട് കടവന്ത്രയില്‍ ഒരു കട നടത്തിവരികയായിരുന്നു. ഈ പ്രദേശം കേന്ദ്രീകരിച്ച് ജോലികള്‍ ചെയ്തിരുന്ന സ്ത്രീകളെയാണ് വലയിലാക്കാനായി ശ്രമിച്ചതും. ഷാഫി ഏജന്റായി പ്രവര്‍ത്തിച്ച് നടത്തിയ ക്രൂര കൊലപാതകത്തിന്റെ പശ്ചാത്തലത്തില്‍ ഇയാളുടെ സാന്നിധ്യമുണ്ടായിരുന്ന പ്രദേശങ്ങളില്‍നിന്ന് കാണാതായ സ്ത്രീകളുടെ പട്ടികയും ഒപ്പം തന്നെ സമൂഹമാധ്യമങ്ങളില്‍ ശ്രീദേവി എന്ന വ്യാജ പേരില്‍ ഇയാള്‍ ഉപയോഗിച്ചിരുന്ന അക്കൗണ്ടില്‍ അടുത്ത ബന്ധം സ്ഥാപിച്ചിരുന്നവരെയും സൈബര്‍ പോലീസിന്റെ സഹായത്തോടെ കണ്ടെത്താനാണ് പോലീസിന്റെ നീക്കം. തെളിവെടുപ്പിന് ശേഷം ഷാഫിയെ വിശദമായി പോലീസ് ചോദ്യം ചെയ്യും.

അതേസമയം അധികം ബന്ധുക്കളൊന്നുമില്ലാത്തതും ആരും അന്വേഷിച്ച് വരാന്‍ സാധ്യതയില്ലാത്തതുമായ ആളുകളെ നോക്കിയാണ് ഇലന്തൂര്‍ സംഭവത്തില്‍ പോലും ഇരയാക്കാന്‍ തെരഞ്ഞെടുത്തത്. അതിനാല്‍ ഇതുപോലെ വേറെ സ്ഥലങ്ങളിലും ഇയാള്‍ ഇത്തരം പ്രവര്‍ത്തികള്‍ ചെയ്തിട്ടുണ്ടോയെന്ന് പോലീസ് അന്വേഷിക്കും.