എല്ലാം കെട്ടടങ്ങി... ബിഷപ്പും അച്ചന്മാരും നേതാക്കളും കേസില്പ്പെട്ടതോടെയും പട്ടാളമിറങ്ങുമെന്ന ധ്വനി വന്നതോടെയും സമവായ ചര്ച്ചകള് തകൃതി; എങ്ങനേയും വിഴിഞ്ഞം സമരം അവസാനിപ്പിക്കാന് സര്ക്കാരും സമര സമിതിയും; വിഴിഞ്ഞം സമരത്തില് അടിയന്തര പ്രമേയം കൊണ്ടുവരാന് പ്രതിപക്ഷം
അടുത്ത ഹൈക്കോടതിയുടെ പരാമര്ശത്തോടെ വിഴിഞ്ഞത്ത് പട്ടാളമിറങ്ങാനാണ് സാധ്യത. അതിന് മുമ്പ് കേസ് പിന്വലിക്കാനുള്ള വലിയ ശ്രമമാണ് നടക്കുന്നത്. സമരം നയിക്കുന്ന അച്ചന്മാരും ബിഷപ്പും കേസില്പ്പെട്ടിരിക്കുകയാണ്. പട്ടാളം വന്നാല് രംഗമാകെ മാറും. അതിനാല് പലഭാഗത്തു നിന്നും സമാധാന ശ്രമങ്ങള് നടക്കുകയാണ്.
വിഴിഞ്ഞത്ത് ഇന്നും സമവായ നീക്കങ്ങള് തുടരും. ഇന്നലെ മുഖ്യമന്ത്രിയും മന്ത്രിസഭാ ഉപസമിതിയും തമ്മില് ചര്ച്ച നടത്തിയെങ്കിലും സമരസമിതിയുമായി ചര്ച്ച നടത്താനായിരുന്നില്ല. കൃത്യമായ ഉറപ്പ് സര്ക്കാരില് നിന്ന് ലഭിക്കുകയാണെങ്കില് മാത്രമേ ചര്ച്ചയ്ക്കുള്ളൂ എന്നാണ് ലത്തീന് അതിരൂപതയുടെ നിലപാട്.
തുടര് ചര്ച്ചകള് നടത്തി ഇക്കാര്യങ്ങള് സമരസമിതിയെ അറിയിക്കാനാണ് സര്ക്കാര് നീക്കം. ഇതിന് ശേഷം ഇന്ന് വൈകീട്ടോടെ മന്ത്രിസഭാ ഉപസമിതിയും സമരസമിതിയും തമ്മില് ചര്ച്ച നടത്താനാണ് ശ്രമം. ഈ ചര്ച്ച വിജയിച്ചാല് മുഖ്യമന്ത്രിയും സമരക്കാരെ കണ്ടേക്കും. കഴിഞ്ഞ ദിവസങ്ങളിലെ അനുരഞ്ജന നീക്കങ്ങള് വിലയിരുത്താനായി ഇന്നും സമരസമിതി യോഗം ചേരും.
ഇതിനിടെ കൊച്ചിയില് തുടരുന്ന കെസിബിസി ശീതകാല സമ്മേളനം വിഴിഞ്ഞം സമരം ചര്ച്ച ചെയ്യും. യോഗത്തിന്റെ ആദ്യ ദിവസമായ ഇന്നലെ ചര്ച്ചകള്ക്ക് തുടക്കമിട്ടെങ്കിലും കൂടുതല് വിശകലനങ്ങളിലേക്ക് പോകേണ്ടതുണ്ടെന്ന് യോഗം വിലയിരുത്തുകയായിരുന്നു. ഈ വിഷയത്തില് തിരുവനന്തപുരത്ത് നടക്കുന്ന ചര്ച്ചകളില് സമവായ സാധ്യതകള് തെളിയുന്നതായി യോഗത്തില് അഭിപ്രായമുയര്ന്നു. മത്സ്യത്തൊഴിലാളികള്ക്കൊപ്പം എന്ന മുന്നിലപാടില് മാറ്റമില്ലെന്നും സമവായ ചര്ച്ചകളില് മുന്നോട്ടുവയ്ക്കുന്ന നിര്ദേശങ്ങള് മത്സ്യത്തൊഴിലാളികളുടെ പ്രശ്നങ്ങള് പൂര്ണമായും പരിഹരിക്കപ്പെടുന്നതായിരിക്കണമെന്നും യോഗം നിലപാടെടുത്തിട്ടുണ്ട്.
നിയമ സഭാ സമ്മേളനത്തിന്റെ രണ്ടാം ദിവസമായ ഇന്ന് വിഴിഞ്ഞം സമരത്തില് അടിയന്തിര പ്രമേയം കൊണ്ട് വരാനാണ് പ്രതിപക്ഷത്തിന്റെ തീരുമാനം. കഴിഞ്ഞ ദിവസത്തെ സമവായ ചര്ച്ച ഫലം കാണാത്ത സാഹചര്യത്തില് സര്ക്കാരിനെ സമ്മര്ദ്ദത്തില് ആക്കുകയാണ് പ്രതിപക്ഷ നീക്കം. ഗവര്ണ്ണറെ ചാന്സലര് സ്ഥാനത്തു നിന്ന് മാറ്റാന് ഉള്ള ബില് നാളെ സഭയില് അവതരിപ്പിക്കും. സബ്ജക്ട് കമ്മിറ്റിക്ക് വിട്ട ശേഷം ഈ ആഴ്ച്ച തന്നെ ബില് പാസ്സാക്കാന് ആണ് ശ്രമം. ഗവര്ണ്ണറെ പിന്തുണക്കാന് ഇല്ലെങ്കിലും ലീഗും ബില്ലിനെ എതിര്ക്കും.
വിഴിഞ്ഞത്ത് സമവായത്തിനായി തിരക്കിട്ട ശ്രമങ്ങളാണ് ഇന്നലെ നടന്നത്. സര്ക്കാരും മധ്യസ്ഥന്റെ റോളിലുള്ള കര്ദ്ദിനാള് ക്ലിമീസ് കാതോലിക്കാ ബാവയും സമരസമിതിയും പലതട്ടില് ആശയവിനിമയം നടത്തി. വൈകീട്ട് മുഖ്യമന്ത്രിയും മന്ത്രിസഭാ ഉപസമിതിയും യോഗം ചേര്ന്ന ശേഷം സമരസമിതിയുമായി ചര്ച്ച നടത്താനായിരുന്നു ധാരണ. എന്നാല് അനുരഞ്ജന ചര്ച്ചകളില് ഉയര്ന്ന് വന്ന നിര്ദ്ദേശങ്ങളില് ഇനിയും വ്യക്തത ആകാത്തതിനാല് സമരസമിതി-സര്ക്കാര് ചര്ച്ച നടന്നില്ല.
തീരശോഷണം പഠിക്കാനുള്ള വിദഗ്ധസമിതിയില് സമരസമിതി നിര്ദ്ദേശിക്കുന്ന പ്രതിനിധിയെ വെക്കണമെന്ന ആവശ്യത്തില് സര്ക്കാര് വഴങ്ങിയിട്ടില്ല. തീരത്ത് നിന്നും മാറിതാമസിക്കുന്നവര്ക്കുള്ള വീട്ടുവാടക 5500 ല് നിന്നും 8000 ആക്കാമെന്ന് സര്ക്കാര് വാഗ്ദാനം നല്കിയിരുന്നു. എന്നാല് കൂട്ടുന്ന തുക അദാനി ഗ്രൂപ്പിന്റെ സിഎസ്ആര് ഫണ്ടില് നിന്നും നല്കാനായിരുന്നു നീക്കം. ഇതിനെ സമരസമിതി എതിര്ത്തു. സര്ക്കാര് നല്കുന്ന ഉറപ്പുകള് പാലിക്കുന്നുണ്ടോ എന്ന് വിലയിരുത്താന് മോണിറ്ററിംഗ് കമ്മിറ്റി ഉണ്ടാക്കാമെന്നാണ് മറ്റൊരു നിര്ദ്ദേശം. ഇതില് സര്ക്കാറിന്രെയും സമരസമിതിയുടേയും പ്രതിനിധികള് ഉണ്ടാകും.
മറ്റ് ആവശ്യങ്ങള് അംഗീകരിച്ചാല് തുറമുഖ നിര്മ്മാണം നിര്ത്തിവെക്കണമെന്ന ആവശ്യത്തില് നിന്നും പിന്നോട്ട് പോകാന് വരെ തയ്യാറെന്ന സൂചന സമരസമിതി നല്കുന്നുണ്ട്. ഇന് വീണ്ടും അനുരജ്ഞന നീക്ക നടത്തി വൈകീട്ടോടെ മന്ത്രിസഭാ ഉപസമിതി സമരക്കാരുമായി ചര്ച്ച നടത്താനാണ് ശ്രമം. സമാധാന നീക്കം വൈകിപ്പോയെന്നാണ് തുറമുഖം വേണമെന്നാവശ്യപ്പെടുന്ന പ്രാദേശിക ജനകീയ കൂട്ടായ്മ വിമര്ശിച്ചത്.
"
https://www.facebook.com/Malayalivartha
