തലസ്ഥാനത്ത് ആയുധങ്ങളുമായി മയക്കുമരുന്ന് വില്‍പ്പന നടത്തിയ സംഘത്തെ പിടികൂടാനെത്തിയ പോലീസിന് നേരെ നാടന്‍ പടക്കമെറിഞ്ഞ കേസില്‍ മുഖ്യ പ്രതി രജീഷടക്കം 4 പ്രതികള്‍ക്കും 17കാരനായ കുട്ടിക്കുറ്റവാളിക്കുമെതിരെ നര്‍ക്കോട്ടിക് സെല്‍ കുറ്റപത്രം സമര്‍പ്പിച്ചു.

പ്രായപൂര്‍ത്തിയായ 4 പ്രതികള്‍ക്കെതിരെ തിരുവനന്തപുരം ജില്ലാ സെഷന്‍സ് കോടതി മുമ്പാകെയാണ് അസി. കമ്മീഷണര്‍ ഷീന്‍ തറയില്‍ കുറ്റപത്രം സമര്‍പ്പിച്ചത്. 17 കാരനെതിരെ തിരുവനന്തപുരം ജുവനൈല്‍ ജസ്റ്റിസ് ബോര്‍ഡ് (ജെ. ജെ. ബി ) കോടതി ചുമതല വഹിക്കുന്ന രണ്ടാം ജുഡീഷ്യല്‍ ഫസ്റ്റ് ക്ലാസ്സ് മജിസ്‌ട്രേട്ട് കോടതിയിലാണ് കുറ്റപത്രം സമര്‍പ്പിച്ചത്.

ലഹരി വില്‍പ്പന സംഘത്തിലെ സംഘത്തിലെ പ്രധാനി നെടുങ്കാട് കട്ടയ്ക്കാല്‍ സ്വദേശി രജീഷ് (22) , മുഖ്യപ്രതി തിരുമല കുന്നപ്പുഴ വലിയ കട്ടയ്ക്കാല്‍ വീട്ടില്‍ അച്ചു എന്ന അനന്തു. എ.എസ് (22) , രാകേഷ് കൃഷ്ണന്‍ , ആകാശ് , വെള്ളായണി സ്വദേശിയും നിയമവുമായി പൊരുത്തപ്പെടാത്ത കുട്ടിക്കുറ്റവാളിയും പ്രായ പൂര്‍ത്തിയാകാത്തതുമായ 17 കാരന്‍ എന്നിവര്‍ക്കെതിരായാണ് കുറ്റപത്രം സമര്‍പ്പിച്ചത്.17 കാരന്റെ വിചാരണ പ്രത്യേകമായി ജുവനൈല്‍ ജസ്റ്റിസ് ബോര്‍ഡ് (ജെ. ജെ. ബി ) കോടതിയില്‍ നടക്കും.



കിള്ളിപ്പാലം ലോഡ്ജില്‍ ആയുധങ്ങളുമായി കഞ്ചാവും എംഡിഎംഎ യും വില്‍പന നടത്തിയത് പിടിക്കാന്‍ ചെന്ന പോലീസിന് നേരെ പടക്കമെറിഞ്ഞ് 3 പ്രതികള്‍ രക്ഷപ്പെടുകയായിരുന്നു.

പ്രധാന പ്രതി രജീഷിനെയും 17 കാരനെയും മാത്രം സ്‌പോട്ട് അറസ്റ്റ് ചെയ്തു. 5 കിലോ കഞ്ചാവ് , രണ്ടു ഗ്രാം എംഡിഎംഎ , 2 പെല്ലറ്റ് ഗണ്‍ , 1ലൈറ്റര്‍ ഗണ്‍ , 2 വെട്ടുകത്തി , 5 മൊബൈല്‍ ഫോണ്‍ എന്നിവ ഇവരില്‍ നിന്ന് പിടികൂടിയിരുന്നു. തോക്കുകള്‍ ലൈസന്‍സ് ആവശ്യമില്ലാത്ത എയര്‍ പിസ്റ്റള്‍ വിഭാഗത്തില്‍പ്പെട്ടവയാണ്.

5 കിലോ കഞ്ചാവ് കുറഞ്ഞ അളവായ ഒരു കിലോയ്ക്കും വാണിജ്യ അളവായ 10 കിലോയ്ക്കും ഇടക്കുള്ള ഇന്റര്‍മീഡിയറി ക്വാണ്ടിറ്റി ആയതിനാലും 2 ഗ്രാം എംഡി എംഎ കുറഞ്ഞ അളവായ 0.5 ഗ്രാമിനും വാണിജ്യ അളവായ 5 ഗ്രാമിനും ഇടക്കുള്ള ഇന്റര്‍മീഡിയറി ക്വാണ്ടിറ്റി ആയതിനാലുമാണ് പോലീസിന് നേരിട്ട് ഫയലിംഗ് അധികാര പരിധിയുള്ള ജില്ലാ സെഷന്‍സ് കോടതിയില്‍ കുറ്റപത്രം സമര്‍പ്പിച്ചത്.

2021 ഒക്ടോബര്‍ 18 ന് ഉച്ചയ്ക്കാണ് കേസിനാസ്പദമായ സംഭവം നടന്നത്. കിള്ളിപ്പാലം ബണ്ട് റോഡില്‍ കിള്ളി ടവര്‍ എന്ന വ്യാപാര സമുച്ചയത്തില്‍ പ്രവര്‍ത്തിക്കുന്ന കിള്ളി ടൂറിസ്റ്റ് ഹോമിലാണ് സംഭവം നടന്നത്.

മയക്കു മരുന്ന് കച്ചവടവും ഉപയോഗവും നടക്കുന്നതായുള്ള രഹസ്യവിവരത്തിന്റെ അടിസ്ഥാനത്തില്‍ റെയ്ഡിനെത്തിയ നര്‍ക്കോട്ടിക് സെല്‍ അസി.കമ്മീഷണറുടെ നേതൃത്വത്തിലുള്ള നര്‍ക്കോട്ടിക് , കരമന പോലീസ് സംഘത്തിന് നേരെയാണ് നാടന്‍ പടക്കമെറിഞ്ഞത്. തലനാരിഴക്കാണ് പോലീസുകാര്‍ രക്ഷപ്പെട്ടത്. നാടന്‍ പടക്കമെറിഞ്ഞ് ഭീകരാന്തരീക്ഷം സൃഷ്ടിച്ച ശേഷം രക്ഷപ്പെട്ട മുഖ്യ പ്രതി അനന്തു (22) വും മറ്റൊരു പ്രതിയായ രാകേഷും ആകാശും മൂന്നാം നിലയില്‍ നിന്ന് ചാടി രക്ഷപ്പെടുകയായിരുന്നു. സംഘത്തിലെ പ്രധാനി രജീഷ് , പ്രായപൂര്‍ത്തിയാകാത്ത 17 കാരന്‍ എന്നിവരാണ് സ്‌പോട്ടില്‍ വെച്ച് പിടിയിലായത്.

അസ്വാഭാവികമായി വിദ്യാര്‍ത്ഥികളടക്കം ഒട്ടേറെപ്പേര്‍ കിള്ളിപ്പാലത്തെ ലോഡ്ജിലെ മുറിയിലെത്തുന്നുണ്ടെന്ന വിവരത്തെ തുടര്‍ന്നാണ് നര്‍ക്കോട്ടിക് വിഭാഗം കിളിപ്പാലത്ത് നിരീക്ഷണം തുടങ്ങിയത്. വിദ്യാര്‍ത്ഥികളെയും വിദ്യാര്‍ത്ഥിനികളെയും ലഹരി ഉപയോഗിച്ച നിലയില്‍ ഈ ഭാഗത്ത് കാണാറുണ്ടെന്ന് നാട്ടുകാരും വിവരം നല്‍കിയിരുന്നു. കള്ളിപ്പാലത്ത് നടന്ന രണ്ടു കൊലക്കേസുകളിലെ പ്രതികളുമായി ലഹരി വില്‍പ്പന സംഘത്തിന് ബന്ധമുള്ളതായും പോലീസ് കണ്ടെത്തി. പോലിസോ മറ്റു സംഘങ്ങളോ എത്തിയാല്‍ തിരിച്ചാക്രമിക്കാനും രക്ഷപ്പെടാനുമുള്ള ഒരുക്കങ്ങളെല്ലാം ഇവര്‍ തയ്യാറാക്കിയിരുന്നു.