വിഴിഞ്ഞം സമരത്തെ തുടർന്ന് സമവായ ചർച്ചകൾ നടന്നുവരുകയാണ്. ഇതിനിടെ 'വിഴിഞ്ഞം തുറമുഖം വലിയ വികസനം കൊണ്ടുവരുമെന്ന് പറയുന്നവർ ഈ റിപ്പോർട്ടുകളോ രേഖകളോ വല്ലതും കണ്ടിട്ടുണ്ടോ ആവോ !! ദൈവം നമ്മളെ രക്ഷിക്കും എന്ന വിശ്വാസത്തിലപ്പുറം എന്ത് വസ്തുതകളിന്മേൽ ആണാവോ ഇവരുടെ വികസനവിശ്വസം? ഏലിയാസ് ജോണിന്റെയും കൂട്ടരുടെയും കോട്ടത്താപ്പ് കണക്കല്ല' എന്ന് പറയുകയാണ് അഡ്വ. ഹരീഷ് വാസുദേവൻ.

ഫേസ്ബുക്ക് കുറിപ്പ് ഇങ്ങനെ;

വിഴിഞ്ഞം തുറമുഖ വിഷയത്തിൽ ഒരു വിദഗ്ധ പഠനം ആവശ്യമുണ്ട് എന്നാണ് സർക്കാരിന്റെ നിലപാട്. ഗ്രീൻട്രിബ്യുണലിലെ അപ്പീലിൽ പറഞ്ഞത് പോലെ, വിഴിഞ്ഞം ഒരു eroding cost ആണെങ്കിൽ, പദ്ധതി കൊണ്ടാണ് തീരശോഷണമെങ്കിൽ, പഠനത്തിൽ തെളിയും. സർക്കാർ പദ്ധതി നിർത്തി വയ്‌ക്കേണ്ടി വരെ വന്നേക്കും. തെളിവാണ് പ്രധാനം - അതിനു പഠനത്തിന് തയ്യാർ. 2-3 ദിവസത്തിനുള്ളിൽ പഠനത്തിന്റെ TOR ഇറങ്ങിയേക്കും. എന്നാൽ പദ്ധതിയെ അനുകൂലിച്ചു രംഗത്ത് വന്ന സാംസ്‌കാരിക നായകന്മാർക്ക് അത്തരം ആശങ്ക ഒന്നുമില്ല. സർക്കാരിനേക്കാൾ വലിയ സർക്കാർ ഭക്തിയാണവർക്ക്.

നായകരുടെ ലിസ്റ്റ് നോക്കുകയായിരുന്നു. തലസ്ഥാനത്തെ പ്രമുഖ നിശാക്ലബ്ബിലെ സ്ഥിരം സാന്നിധ്യങ്ങൾക്കു പുറമെയുള്ളവർ ആരൊക്കെയാണെന്നാണ് ആദ്യം നോക്കിയത്. അധികമില്ല, ഭരണം വന്നശേഷം ഏത് ആപത്തിലും സർക്കാരിനൊപ്പം ചാടിവീഴുന്ന അടിമകലാസാഹിത്യസംഘത്തിന്റെ സ്ഥിരാംഗങ്ങൾക്ക് പുറമേ ശരിക്കും നിലപാടുള്ള വിരലിൽ എണ്ണാവുന്ന മറ്റുചിലർ.. പൗരപ്രമുഖരിൽ രാജപ്രമുഖ ഉണ്ട് മുൻപിൽ. തുല്യരിൽ തുല്യ.

ഈ പദ്ധതിയുടെ പാരിസ്ഥിതിക ആഘാതം പോട്ടേ, എന്റെ വീട് തീരത്തല്ലാത്തത് കൊണ്ടും TVM എയർപോർട്ട് ഞാൻ ഉപയോഗിക്കാത്തതുകൊണ്ടും, മീൻപിടിച്ചല്ല ജീവിക്കുന്നത് എന്നതുകൊണ്ടും ശംഘുമുഖം ബീച്ചിനേക്കാൾ നല്ല ബീച്ച് നീലേശ്വരത്ത് ഉള്ളതുകൊണ്ടും ശരാശരി മലയാളിയെപ്പോലെ ഞാനും, വിഴിഞ്ഞത്ത് മത്സ്യത്തൊഴിലാളികളുടെ തൊഴിലോ വീടോ പോയാലും എനിക്കൊരു ചുക്കുമില്ല.. എന്നെ ബാധിക്കുന്ന പ്രശ്നങ്ങൾക്ക് മാത്രമേ സമരങ്ങളെ ഞാൻ പിന്തുണയ്ക്കൂ അല്ലാത്ത എല്ലാ സമരങ്ങളും അനാവശ്യമാണ്..

നൂറോ ഇരുനൂറോ മീറ്റർ കടൽ കയറിയാൽ എനിക്കെന്ത് !!

എന്നാൽ ഇതൊരു സാമ്പത്തിക ദുരന്തമായാൽ എനിക്ക് ദണ്ണമുണ്ട്. IFC ലോകത്തെ ഒന്നാംനിര സാമ്പത്തിക കൺസൾട്ടൻസി ആണ്. അവരുടെ റിപ്പോർട്ടുണ്ട്. മറ്റു സമാന റിപ്പോർട്ടറുകളുണ്ട്. വിഴിഞ്ഞം തുറമുഖം വലിയ വികസനം കൊണ്ടുവരുമെന്ന് പറയുന്നവർ ഈ റിപ്പോർട്ടുകളോ രേഖകളോ വല്ലതും കണ്ടിട്ടുണ്ടോ ആവോ !! ദൈവം നമ്മളെ രക്ഷിക്കും എന്ന വിശ്വാസത്തിലപ്പുറം എന്ത് വസ്തുതകളിന്മേൽ ആണാവോ ഇവരുടെ വികസനവിശ്വസം? ഏലിയാസ് ജോണിന്റെയും കൂട്ടരുടെയും കോട്ടത്താപ്പ് കണക്കല്ല - real facts, അതുണ്ടോ?

പെരുപ്പിച്ച കള്ളക്കണക്കിൽ കൊച്ചി മെട്രോയ്ക്ക് അംഗീകാരം നൽകാൻ പ്രധാനമന്ത്രിയുടെ ഓഫീസിലിരുന്ന് ഇടപെട്ട നായർക്ക് വസ്തുതകളോട് എന്ത് ബാധ്യത?? അതേ ഇടപെടൽ പദ്ധതിപ്രദേശവും വടക്കും ഇറോഡിങ് കോസ്റ്റ് അല്ലെന്ന നുണയ്ക്ക് അംഗീകാരം നേടാനും നടത്തി. അടുത്തൂൺ പറ്റി ഇരിക്കുമ്പോൾ പഴയ ചെയ്തികളെ ന്യായീകരിക്കുക..

ഖാദിചെയർമാന്റെ വണ്ടിക്ക് 30 ലക്ഷം ചെലവാക്കുമ്പോ പൊള്ളുന്ന മനോരമയ്ക്ക് വിഴിഞ്ഞത്ത് അദാനിയുടെ പേരിൽ കടലിൽ തള്ളുന്ന ആയിരക്കണക്കിന് കോടിയും, അതിന്റെ കെടുതി തീർക്കാൻ തീരത്ത് ഇനി വർഷാവർഷം ചെലവാക്കേണ്ടി വരുന്ന ആയിരക്കണക്കിന് കോടികളും കണ്ണിൽ പിടിക്കില്ല.. അതിലൊരു ത്രില്ലില്ല.. അതോണ്ട് മത്സ്യത്തൊഴിലാളികൾ അടിയന്തിരമായി ക്ലബിൽ അംഗത്വമെടുക്കണം. വികസനചർച്ചകളിൽ അത് അത്യാവശ്യമാണ്..