നീങ്ങിത്തുടങ്ങിയ ട്രെയിനില്‍ കയറാന്‍ ശ്രമിക്കവേ പെണ്‍കുട്ടി സ്റ്റെപ്പില്‍ നിന്ന് കാല്‍ വഴുതി കമ്പിയില്‍ തൂങ്ങി കിടന്നു.... നിലവിളിച്ച് യാത്രക്കാര്‍, രക്ഷകനായി പോലീസുകാരന്‍.

സ്വന്തം ജീവന്‍ പണയപ്പെടുത്തി യാത്രക്കാരിയായ പെണ്‍കുട്ടിയുടെ ജീവന്‍ രക്ഷിച്ച വടകര റെയില്‍വേ പോലീസ് ഹെഡ്കോണ്‍സ്റ്റബിള്‍ വി.പി. മഹേഷിന് യാത്രക്കാരുടെ ഹൃദയത്തില്‍ നിന്നുള്ള ഒരായിരം സല്യൂട്ട്. ഞായറാഴ്ച വൈകുന്നേരം 5.40-നാണ് നാഗര്‍കോവിലില്‍ നിന്ന് മംഗലാപുരം വരെ പോവുന്ന പരശുറാം എക്സ്പ്രസ് വടകര റെയില്‍വേ സ്റ്റേഷനിലെ രണ്ടാംനമ്പര്‍ പ്ലാറ്റ്ഫോമില്‍ എത്തിയത്. പരശുറാമിലെ ഭിന്നശേഷിക്കാര്‍ക്കുള്ള കോച്ചില്‍ മറ്റ് യാത്രക്കാര്‍ കയറിയിട്ടുണ്ടോയെന്ന് പരിശോധിക്കാനാണ് ഡ്യൂട്ടിയിലുണ്ടായിരുന്ന മഹേഷ് പ്ലാറ്റ്ഫോമില്‍ എത്തിയത്.


പരിശോധനയ്‌ക്കൊടുവില്‍ അവിടെ നില്‍ക്കുമ്പോഴാണ് നീങ്ങിത്തുടങ്ങിയ ട്രെയിനിലേക്ക് കയറാനായി പെണ്‍കുട്ടി ബാഗുമായി ഓടിവരുന്നത് മഹേഷിന്റെ ദൃഷ്ടിയില്‍ പെട്ടത്.രണ്ടാമത്തെ പ്ലാറ്റ്ഫോമില്‍ മുമ്പും അപകടങ്ങള്‍ നടന്നിട്ടുള്ളതിനാല്‍ ഓടിക്കയറരുതെന്ന് ഇദ്ദേഹം പെണ്‍കുട്ടിയെ വിലക്കുന്നുണ്ടായിരുന്നു.

എങ്കിലും അതൊന്നും ശ്രദ്ധിക്കാതെ ട്രെയിനിലേക്ക് ചാടിക്കയറാനായി ശ്രമിച്ച പെണ്‍കുട്ടിയാകട്ടെ സ്റ്റെപ്പില്‍ നിന്ന് കാല്‍വഴുതി കമ്പിയില്‍ തൂങ്ങി നിന്നു.
പെണ്‍കുട്ടി കമ്പിയില്‍ നിന്ന് കൈവഴുതി താഴേക്ക് പോയ്ക്കൊണ്ടിക്കുമ്പോള്‍ പ്ലാറ്റ്ഫോമില്‍ ഉണ്ടായിരുന്നവര്‍ക്ക് അലറി വിളിക്കാനല്ലാതെ ഒന്നു ചെയ്യാനായില്ല.

അതുകണ്ടയുടന്‍ മഹേഷ് ഓടിയെത്തി കുട്ടിയെ പിടിച്ചുയര്‍ത്തി പ്ലാറ്റ്ഫോമിലേക്കിടാനായി ശ്രമിച്ചു. എന്നാല്‍ പെണ്‍കുട്ടി വെപ്രാളത്തില്‍ ഇടതുകൈ കൊണ്ട് മഹേഷിന്റെ കഴുത്തില്‍ ചുറ്റിപ്പിടിച്ചതോടെ രണ്ടുപേരും ട്രാക്കിലേക്ക് വീഴുമെന്ന നിലയിലായി.

എന്നാല്‍ ഒരുനിമിഷം ബാലന്‍സ് വീണ്ടെടുത്ത മഹേഷ് ഒരു കൈ കൊണ്ട് ട്രാക്കില്‍ വീഴാതെ പെണ്‍കുട്ടിയെ ഉയര്‍ത്തി പ്ലാറ്റ്ഫോമിലേക്ക് ചാടി. രണ്ടുപേരും വലിയ പരിക്കുകളില്ലാതെ പ്ലാറ്റ്ഫോമിലേക്ക വന്നു വീണു.

അപ്പോഴേക്കും സംഭവം ശ്രദ്ധയില്‍പ്പെട്ട ലോക്കോ പൈലറ്റ് ട്രെയിന്‍ നിര്‍ത്തുകയും ചെയ്തു. സംഭവത്തില്‍ മഹേഷിനെ യാത്രക്കാര്‍ അഭിനന്ദനംകൊണ്ട് മൂടി. ഫോട്ടോയെടുത്ത് ഹൃദയസ്പര്‍ശിയായ കുറിപ്പോടെ സാമൂഹികമാധ്യമങ്ങളിലിടുകയും ചെയ്തു.കണ്ണൂര്‍ പിണറായി സ്വദേശിയാണ് മഹേഷ്.