ഇന്നലെ കെകെ രമ എംഎല്‍എയുടെ ദിവസമായിരുന്നു. ഒപ്പം ടിപിയുടെ ഓര്‍മ്മകളും. സര്‍ക്കാരിനെ ഏറ്റവുമധികം വിമര്‍ശിച്ച കെകെ രമ സഭയുടെ നാഥയാകുന്ന കാഴ്ചയും കണ്ടു. മുഖ്യമന്ത്രി ഉള്‍പ്പെടെയുള്ളവരെ സഭയില്‍ നിയന്ത്രിക്കാന്‍ പറ്റിയ സുവര്‍ണാവസരത്തില്‍ തിളങ്ങിയിരിക്കുകയാണ് കെകെ രമ. അതേസമയം സിപിഎമ്മില്‍ മഞ്ഞുരുകുന്നോ എന്ന ചോദ്യം പാര്‍ട്ടി പ്രവര്‍ത്തകരില്‍ പോലുമുണ്ടായി.

സ്പീക്കറുടെ പാനലിലേക്ക് മൂന്ന് വനിതകളെ നിയമിച്ചതായി നിയമസഭാ സ്പീക്കര്‍ എ.എന്‍ ഷംസീര്‍ അറിയിച്ചത് കഴിഞ്ഞ ദിവസമാണ്. വടകര എംഎല്‍എയായ കെ.കെ രമ ഇന്ന് സ്പീക്കറുടെ ചെയറിലിരുന്ന് സഭാ നടപടികള്‍ നിയന്ത്രിച്ചിരുന്നു. ഈ അനുഭവം വ്യക്തമാക്കിയും ചില കാര്യങ്ങള്‍ ഓര്‍മ്മിപ്പിച്ചും കെ.കെ രമ കുറിച്ച ഫേസ്ബുക്ക് പോസ്റ്റ് ശ്രദ്ധേയമാകുന്നു.

പതിനഞ്ചാം നിയമസഭയുടെ ഏഴാം സമ്മേളനത്തില്‍ പൂര്‍ണമായും വനിതകളെ ഉള്‍പ്പെടുത്തി സ്പീക്കര്‍ പാനല്‍ പ്രഖ്യാപിച്ചു. സ്പീക്കറുടെയും ഡെപ്യൂട്ടി സ്പീക്കറുടെയും അഭാവത്തില്‍ സഭ നിയന്ത്രിക്കേണ്ട സ്പീക്കര്‍ പാനലിലാണ് ഇക്കുറി വനിതകള്‍ മാത്രം ഇടംപിടിച്ചിരിക്കുന്നത്. ഭരണപക്ഷത്തുനിന്നു രണ്ടുപേരെയും പ്രതിപക്ഷത്തുനിന്നു ഒരാളെയും ഉള്‍പ്പെടുത്തിയാണ് പാനല്‍ പ്രഖ്യാപിച്ചിരിക്കുന്നത്.

സ്പീക്കര്‍ എ എന്‍ ഷംസീര്‍ ആണ് വനിതകള്‍ പാനലില്‍ വരണമെന്ന നിര്‍ദേശം മുന്നോട്ടുവെച്ചത്. ഭരണപക്ഷത്തുനിന്നു സി കെ ആശയും യു പ്രതിഭയും പ്രതിപക്ഷത്തുനിന്നു കെ കെ രമയുമാണ് പാനലില്‍ ഉള്‍പ്പെട്ടിരിക്കുന്നത്. നിയമസഭയുടെ ചരിത്രത്തില്‍ ആദ്യമായാണ് വനിതകളെ മാത്രം ഉള്‍പ്പെടുത്തി പാനല്‍ പ്രഖ്യാപിക്കുന്നത്. മൂന്നംഗ സ്പീക്കര്‍ പാനലില്‍ സാധാരണ ഒരു വനിതാ അംഗം മാത്രമാണ് ഉള്‍പ്പെടാറുള്ളത്. അതേസമയം പ്രതിപക്ഷത്തുനിന്ന് സഭയിലെ പുതുമുഖമായ ഉമ തോമസ് എത്തുമെന്നായിരുന്നു ഭരണപക്ഷം കരുതിയിരുന്നത്.

ഇതു തെറ്റിച്ചാണ് സ്പീക്കര്‍ പാനലിലേക്ക് വടകര എംഎല്‍എ കെ കെ രമയുടെ പേര് പ്രതിപക്ഷം നിര്‍ദേശിച്ചത്. സ്പീക്കര്‍ പാനലില്‍ ഉള്‍പ്പെട്ട യു പ്രതിഭ കായംകുളം എംഎല്‍എയും സി കെ ആശ വൈക്കം എംഎല്‍എയുമാണ്.

അതിനിടെ കെകെ രമയുടെ ഫേസ്ബുക്ക് പോസ്റ്റ് ശ്രദ്ധ നേടുന്നു. മൂന്ന് വനിതകള്‍ സ്പീക്കര്‍ പാനലിലേക്ക് തിരഞ്ഞെടുക്കപ്പെട്ടത് ആഘോഷമാക്കുന്നതിലൂടെ ജനാധിപത്യ വ്യവസ്ഥിതിയുടെ ആഴത്തിലുളള പ്രതിസന്ധി വ്യക്തമാകുന്നു. സ്വാതന്ത്ര്യം നേടി ഇത്ര വര്‍ഷമായിട്ടും സ്പീക്കര്‍ പദവിയില്‍ ഒരു സ്ത്രീ ഇരുന്നിട്ടില്ല എന്നത് ദു:ഖകരമായ വസ്തുതയാണെന്നും കെകെ രമ ചൂണ്ടിക്കാട്ടുന്നു.

കെ കെ രമയുടെ ഫേസ്ബുക്ക് പേസ്റ്റ് പൂര്‍ണരൂപം

ഇന്ന് സ്പീക്കറുടെ ചെയറിലിരുന്ന് സഭാ നടപടികള്‍ നിയന്ത്രിച്ചു. ഒരു വനിതാ സാമാജിക എന്ന നിലയിലും വ്യക്തി എന്ന നിലയിലും സന്തോഷവും ആത്മവിശ്വാസവും പകര്‍ന്ന ഒരു ദിനമാണ് കടന്നുപോയത്. നല്ല നിലയില്‍ സഭാ നടപടികളുമായി സഹകരിച്ച ഭരണ, പ്രതിപക്ഷ നിരകളിലെ മുഴുവന്‍ സഹപ്രവര്‍ത്തകരേയും സ്നേഹമറിയിക്കുന്നു.

എങ്കിലും സ്പീക്കര്‍ പാനലില്‍ മൂന്ന് വനിതകള്‍ തെരെഞ്ഞെടുക്കപ്പെട്ടത് ആഘോഷമാവുന്നത് നമ്മുടെ ജനാധിപത്യ വ്യവസ്ഥിതിയുടെ ആഴത്തിലുള്ള പ്രതിസന്ധിയെയാണ് കാണിക്കുന്നത്. ഇന്ത്യ സ്വതന്ത്രയാവുകയും കേരള സംസ്ഥാനം രൂപീകരിക്കപ്പെടുകയും ചെയ്തിട്ട് ഇത്രയും വര്‍ഷമായിട്ടും സ്പീക്കര്‍ പദവിയില്‍ ഒരു സ്ത്രീ ഇരുന്നിട്ടില്ല എന്നത് ദു:ഖകരമായ വസ്തുതയാണ്. അതുകൊണ്ടാണ് ഇപ്പോഴത്തെ ഈ തെരെഞ്ഞടുപ്പ് മഹാ സംഭവമായി ആഘോഷിക്കപ്പെടുന്നത്.

ആ ആത്മവിമര്‍ശനം കൂടി ആവശ്യപ്പെടുന്നുണ്ട് ഈ സന്ദര്‍ഭം. ഈ അഭിമാനനിമിഷം സ:ടി.പിക്ക് സമര്‍പ്പിക്കുന്നു... എന്നാണ് കെകെ രമ കുറിച്ചത്.

പതിനഞ്ചാം നിയമസഭയുടെ ഏഴാം സമ്മേളനത്തിന് തിങ്കളാഴ്ചയാണ് തുടക്കമായത്. സ്പീക്കറായി ചുമതലയേറ്റെടുത്ത എ എന്‍ ഷംസീര്‍ നിയന്ത്രിക്കുന്ന ആദ്യ നിയമസഭാ സമ്മേളനം കൂടിയാണിത്. സ്പീക്കറായിരുന്ന എം ബി രാജേഷ് മന്ത്രിയായതോടെയാണ് സ്പീക്കര്‍ സ്ഥാനത്ത് ഒഴിയുവന്നത്. തുടര്‍ന്ന് തലശേരി എംഎല്‍എ എ എന്‍ ഷംസീറിനെ സ്പീക്കര്‍ സ്ഥാനത്തേക്ക് തെരഞ്ഞെടുക്കുകയായിരുന്നു.