പറവൂരില്‍ മഷിനോട്ടം നടത്തിയിരുന്നയാളെ കെട്ടിയിട്ട് അബോധാവസ്ഥയിലാക്കി സ്വര്‍ണാഭരണങ്ങള്‍ കവര്‍ന്ന കേസില്‍ ഒരാള്‍ കൂടി അറസ്റ്റിലായി.... ആലപ്പുഴയില്‍ വീട് കുത്തിത്തുറന്ന് 100 പവന്‍ സ്വര്‍ണം മോഷ്ടിച്ച കേസിലെ പിടികിട്ടാപ്പുള്ളിയാണ് രാജേഷ്.


പെരുവാരത്ത് വീട് വാടകയ്ക്കെടുത്ത് മഷിനോട്ടം നടത്തിയിരുന്നയാളെ കെട്ടിയിട്ട് അബോധാവസ്ഥയിലാക്കി സ്വര്‍ണാഭരണങ്ങള്‍ കവര്‍ന്ന കേസിലാണ് അമ്പലപ്പുഴ പാക്കള്ളിച്ചിറ വീട്ടില്‍ രാജേഷ് (46) പിടിയിലായത്.

കൊടുങ്ങല്ലൂര്‍ സ്വദേശി വിജയനെ കെട്ടിയിട്ട് അബോധാവസ്ഥയിലാക്കിയ ശേഷം സ്വര്‍ണമാല, ബ്രേസ്ലെറ്റ്, രണ്ട് മോതിരം ഉള്‍പ്പെടെ ഏഴേകാല്‍ പവന്റെ സ്വര്‍ണാഭരണങ്ങളും മൊബൈല്‍ ഫോണും കവര്‍ന്നെടുത്തു. കേസില്‍ ചങ്ങനാശ്ശേരി കുന്നേല്‍ പുതുപറമ്പില്‍ അജിത്കുമാറി (40) നെ നേരത്തേ അറസ്റ്റ് ചെയ്തിരുന്നു.നേരത്തേ ആലപ്പുഴയില്‍ നിന്ന് വീട് കുത്തിത്തുറന്ന് 100 പവന്‍ സ്വര്‍ണം മോഷ്ടിച്ച കേസിലെ പിടികിട്ടാപ്പുള്ളിയാണ് രാജേഷ്. 10 വര്‍ഷമായി ഇയാളെ പോലീസ് തിരയുകയായിരുന്നു.

തോപ്പുംപടിയില്‍ നിന്ന് രാജേഷ് സ്‌കൂട്ടര്‍ മോഷ്ടിച്ച് അജിത്കുമാറിനെയും കൂട്ടി കവര്‍ച്ചയ്ക്ക് എത്തിയതാണെന്ന് പോലീസ് പറഞ്ഞു.ആലപ്പുഴ പാതിരപ്പിള്ളിയിലെ പെട്രോള്‍ പമ്പിലെ ജീവനക്കാരനെ കെട്ടിയിട്ട ശേഷം പണം കവര്‍ന്ന കേസിലും ഇയാള്‍ പ്രതിയാണ്. കണ്ണൂര്‍ ഭാഗത്ത് ഒളിവില്‍ കഴിയുകയായിരുന്നു രാജേഷ്. കോടതിയില്‍ ഹാജരാക്കിയ രാജേഷിനെ റിമാന്‍ഡിലാക്കി.