50 കോടി രൂപ സര്‍ക്കാര്‍് അനുവദിച്ചു..... കെ.എസ്.ആര്‍.ടി.സി.യില്‍ നവംബറിലെ ശമ്പളം തിങ്കളാഴ്ച വിതരണം ചെയ്യും... 30 കോടിയാണ് ധനവകുപ്പ് ശമ്പളവിതരണത്തിനായി ആദ്യം അനുവദിച്ചത്. ഈ തുക തികയുമായിരുന്നില്ല.

ഗതാഗതമന്ത്രി ആന്റണി രാജു, ധനമന്ത്രി കെ.എന്‍.ബാലഗോപാലിനെ ഇക്കാര്യം ധരിപ്പിച്ചതിനെത്തുടര്‍ന്ന് 20 കോടികൂടി അധികമായി അനുവദിച്ചു. തുടര്‍നടപടികള്‍ പൂര്‍ത്തിയാക്കി തിങ്കളാഴ്ച ശമ്പളം നല്‍കും. നവംബറിലെ വരുമാനമായ 206 കോടിയില്‍ നിന്ന് 100 കോടി രൂപ ഡീസലിനായി മാറ്റി. 4.68 കോടി രൂപ ഫെബ്രുവരിമുതല്‍ ജൂണ്‍വരെയുള്ള അലവന്‍സ് വിതരണത്തിനായി മാറ്റിവെച്ചു.

മറ്റ് ആനുകൂല്യങ്ങള്‍ക്കായും തുക മാറ്റി. കോര്‍പ്പറേഷന്റെ വരുമാനത്തില്‍ 50 ശതമാനം തുക ഡീസലിനായി മാറ്റിവെക്കേണ്ടിവരുന്നുണ്ട്. 1.50 കോടിയോളം രൂപ പ്രതിദിനം ബാങ്കുകളില്‍ തിരിച്ചടവിനായും മാറ്റും. ഇന്‍ഷുറന്‍സ്, വാഹനാപകട നഷ്ടപരിഹാരക്കേസുകള്‍ എന്നിവയ്ക്കുള്ള തുക നല്‍കിയതും കഴിഞ്ഞമാസത്തെ വരുമാനത്തില്‍ നിന്നാണ്.


കോവിഡ് കാലത്ത് ഓടിക്കാതിരുന്ന ബസ്സുകള്‍ അറ്റകുറ്റപ്പണി നടത്തി, നിരത്തിലിറക്കാനായി 10 കോടി രൂപ സര്‍ക്കാരിനോട് ആവശ്യപ്പെട്ടിരുന്നെങ്കിലും കിട്ടിയില്ല. ഇപ്പോള്‍ കോര്‍പ്പറേഷന്റെ തനതുഫണ്ടില്‍നിന്നുള്ള തുക ഉപയോഗിച്ച് ബസ്സുകളുടെ തകരാര്‍ പരിഹരിച്ച് ഉപയോഗക്ഷമമാക്കുകയാണ്. 150 ബസ്സുകള്‍ അടുത്തദിവസങ്ങളില്‍ തന്നെ ഫിറ്റ്നെസ് പരിശോധനയ്ക്കായി ഒരുങ്ങുന്നുണ്ട്. ഇതിനുവേണ്ട പണവും വരുമാനത്തില്‍നിന്നു തന്നെ ഉപയോഗിക്കുകയായിരുന്നു.

1300 ബസ്സുകളാണ് ഇപ്പോള്‍ കട്ടപ്പുറത്തുള്ളത്. അവയില്‍ 748 എണ്ണം അറ്റകുറ്റപ്പണി നടത്തിയാല്‍ ഓടിക്കാനാകും. സ്‌പെയര്‍ പാര്‍ട്‌സിനുള്ള ചെലവടക്കം 30 കോടിയോളം രൂപയാണ് ഇതിനു കണക്കാക്കുന്നത്.

നവംബറിലെ കളക്ഷനില്‍നിന്നുള്ള തുകയും ബസ്സുകള്‍ നന്നാക്കുന്നതിനായി മാറ്റിയിട്ടുണ്ട്. ബസ്സുകള്‍ നന്നാക്കി, ദിവസവേതനാടിസ്ഥാനത്തില്‍ പുതുതായി നിയമിക്കപ്പെട്ട ജീവനക്കാരെക്കൊണ്ട് ഓടിക്കാന്‍ ആലോചിക്കുന്നു. ഇതുവഴി വരുമാനം കൂട്ടാനും പ്രതിസന്ധി പരിഹരിക്കാനും കഴിയുമെന്നാണ് പ്രതീക്ഷിക്കുന്നത്.