തിരുവനന്തപുരത്ത് എസ്എഫ്ഐയിലും സംഘടനാ നടപടി സ്വീകരിച്ചിരിക്കുയാണ്. വനിതാ പ്രവർത്തകയോട് മോശമായി പെരുമാറിയെന്ന പരാതിയിൽ ഡി വെെ എഫ് ഐ നേതാവിനെ പാർട്ടി പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തതിന് പിന്നാലെ എസ് എഫ് ഐ നേതാക്കൾക്കെതിരെയും നടപടി.

മദ്യപിച്ച് നൃത്തം ചെയ്യുന്ന ദൃശ്യങ്ങൾ പുറത്തുവന്നതിന് പിന്നാലെ എസ് എഫ് ഐ തിരുവനന്തപുരം ജില്ലാ സെക്രട്ടറി ഗോകുൽ ഗോപിനാഥ്, പ്രസിഡന്റ് ജോബിൻ ജോസ് എന്നിവരെ സ്ഥാനത്തുനിന്ന് നീക്കി. മദ്യപിച്ച് സംസ്കൃത കോളജ് പരിസരത്ത് നൃത്തം ചെയ്തതിന്‍റെ ദൃശ്യങ്ങൾ പുറത്തു വന്നതോടെയാണ് നടപടി എടുത്തത്.

എസ് എഫ് ഐ ജില്ലാ സെക്രട്ടറി ഗോകുലിനെ ഡി വൈ എഫ് ഐ പേരൂർക്കട ബ്ലോക്ക് കമ്മിറ്റിയിൽ നിന്ന് ഒഴിവാക്കാനും ജില്ലാ കമ്മിറ്റി തീരുമാനിച്ചിച്ചുണ്ട്. ജില്ലാ പ്രസിഡന്‍റ് ജോബിൻ ജോസിനോട് വിശദീകരണം തേടാൻ വ്യാഴാഴ്ച ചേർന്ന ഡി വൈ എഫ് ഐ കാട്ടാക്കട ബ്ലോക്ക് കമ്മിറ്റിയും തീരുമാനിച്ചിട്ടുണ്ട്.

സസ്പെൻഷൻ ലഭിച്ച ഡി വെെ എഫ് ഐ നേതാവ് ജെ. ജെ. അഭിജിത്തിനെ വനിതാ പ്രവർത്തകയുടെ പരാതിയിൽ നേരത്തെ ബ്രാഞ്ച് കമ്മിറ്റിയിലേയ്ക്ക് തരം താഴ്‌ത്തിയിരുന്നു. ഗുരുതര ആരോപണങ്ങളുണ്ടായിട്ടും കടുത്ത നടപടി നേരിടാതെ അഭിജിത് പാര്‍ട്ടിയില്‍ തുടരുന്നതില്‍ വിമര്‍ശനം ഉയര്‍ന്നിരുന്നു.

അതേസമയം, എസ്എഫ്ഐ ജില്ലാ സെക്രട്ടറിയാവാൻ അഭിജിത്ത് പ്രായം കുറച്ചു കാട്ടിയെന്ന ആരോപണവും ഉയർന്നിരുന്നു. വിദ്യാർഥി സംഘടനയുടെ നേതൃത്വത്തിൽ അഭിജിത്ത് എത്തിയത് 26 വയസ്സ് എന്ന് കുറച്ചുകാണിച്ചാണ്. ഇതിനു നിർദേശിച്ചത് ആനാവൂർ നാഗപ്പൻ ആണെന്നാണ് അഭിജിത്ത് പറഞ്ഞത്.

പ്രായം കുറച്ച് കാണിച്ചത് സിപിഎം ജില്ലാ സെക്രട്ടറി ആനാവൂർ നാഗപ്പൻ പറഞ്ഞിട്ടാണെന്ന് പറയുന്ന അഭിജിത്തിന്റെ ശബ്ദരേഖ പിന്നാലെ പുറത്തു വന്നിരുന്നു. എന്നാൽ ആനാവൂർ നാ​ഗപ്പൻ ഇത് പാടേ നിഷേധിച്ചു. നേരത്തെ ലഹരിവിരുദ്ധ ക്യാമ്പയ്നിൽ പങ്കെടുത്ത ശേഷം ബാറിലെത്തി മദ്യപിച്ചെന്ന് കാണിച്ച് അഭിജിത്തിനെതിരെ പാർട്ടി നടപടിയെടുത്തിരുന്നു.