പതിവു സമയം കഴിഞ്ഞിട്ടും വീട്ടിലെത്തിയില്ല..... വീട്ടുകാര്‍ അന്വേഷിച്ച് കടയിലെത്തിയപ്പോള്‍ കണ്ടത് വ്യാപാരി മരിച്ച നിലയില്‍.... വടകരയില്‍ കടയ്ക്കുള്ളില്‍ കടയുടമയെ മരിച്ച നിലയില്‍ കണ്ടെത്തി, മോഷണത്തിനിടെയുളള കൊലപാതകമാണെന്നാണ് പ്രാഥമിക നിഗമനം

മാര്‍ക്കറ്റ്‌റോഡിനു സമീപത്തായി ന്യൂ ഇന്ത്യ ഇടവഴിയിലെ വിനായക ട്രെയ്‌ഡേഴ്‌സ് ഉടമയെയാണ് കടയ്ക്കുള്ളില്‍ മരിച്ച നിലയില്‍ കണ്ടെത്തിയത്. അടക്കാത്തെരു പുതിയാപ്പ സ്വദേശി പലവ്യഞ്ജന കട നടത്തുന്ന രാജന്‍ ( 62 )നാണ് മരിച്ചത്.

ഇന്നലെ രാത്രി 12 മണിയോടെയാണ് സംഭവമുണ്ടായത്. പതിവ് സമയം കഴിഞ്ഞിട്ടും രാജന്‍ രാത്രിയില്‍ വീട്ടിലെത്താതിരുന്നതോടെ വീട്ടുകാര്‍ അന്വേഷിച്ച് കടയില്‍ എത്തിയപ്പോഴാണ് നിലത്ത് വീണ് കിടക്കുന്ന നിലയില്‍ കണ്ടെത്തിയത്. ഇയാളുടെ ശരീരത്തിലുണ്ടായിരുന്ന മൂന്ന് പവന്‍ സ്വര്‍ണ ചെയിനും, മോതിരവും, കടയിലുണ്ടായിരുന്ന പണവും നഷ്ടപ്പെട്ടതായി പൊലീസ് .

കഴുത്തിലും, മുഖത്തും, വിരലുകളിലും പരിക്കേറ്റ പാടുകളുണ്ട്. ഇയാളുടെ മോട്ടോര്‍ ബൈക്കും നഷ്ടപ്പെട്ടു. മൃതദേഹം വടകര ഗവ ആശുപത്രി മോര്‍ച്ചറിയിലേക്ക് മാറ്റി. സ്ഥലത്ത് പൊലീസ് പരിശോധന നടത്തുകയാണ്.

ഡോക്‌സ്‌ക്വാഡും വിരലടയാള വിദഗ്ധരും പരിശോധന നടത്തുകയാണ്. സംഭവത്തെ കുറിച്ച് സി.ഐ. മനോജിന്റെ നേതൃത്വത്തിലുള്ള സംഘം അന്വേഷണം തുടങ്ങി.