സിനിമാക്കാരെ ഏറെ ഞെട്ടിപ്പിച്ച സംഭവമാണ് ഷൂട്ടിംഗ് സെറ്റില്‍ ടിവി താരം തുനിഷ ശര്‍മ്മയെ തൂങ്ങിമരിച്ചനിലയില്‍ കണ്ടെത്തിയ സംഭവം. മഹാരാഷ്ട്രയിലെ പാല്‍ഘര്‍ ജില്ലയിലെ വസായില്‍ ഒരു ടെലിവിഷന്‍ പരിപാടിയുടെ സെറ്റില്‍ വെച്ച് ശനിയാഴ്ചയാണ് തുനിഷ ശര്‍മ എന്ന നടി ആത്മഹത്യ ചെയ്തത്. ഉത്സവത്തോടെ ഷൂട്ടിംഗ് നടത്തിയിരുന്ന സെറ്റ് വളരെപ്പെട്ടന്ന് മരണവീടായി. നടിയെ ഫാനില്‍ തുങ്ങിമരിച്ച നിലയില്‍ കണ്ടെത്തിയതോടെ രംഗമാകെ മാറി. പലതരം അഭ്യൂഹങ്ങളുയര്‍ന്നു.

അവസാനം തുനിഷ അഭിനയിച്ചുകൊണ്ടിരുന്ന പരമ്പരയിലെ സഹതാരമായ ഷീസാന്‍ ഖാന്‍ അറസ്റ്റിലായി. പ്രേരണാ കുറ്റം ചുമത്തിയായിരുന്നു അറസ്റ്റ്. തുനിഷയും ഷീസാനും പ്രണയത്തിലായിരുന്നുവെന്നും ഈ ബന്ധം തകര്‍ന്നതാണ് നടിയെ ആത്മഹത്യയിലേക്ക് നയിച്ചതെന്നുമാണ് റിപ്പോര്‍ട്ട്. തുനിഷയുടെ അമ്മ ഇയാള്‍ക്കെതിരെ പരാതി നല്‍കിയിരുന്നു. ഇതിനെത്തുടര്‍ന്നായിരുന്നു അറസ്റ്റ്. ചോദ്യം ചെയ്തിതിനുശേഷമായിരുന്നു അറസ്റ്റെന്നാണ് റിപ്പോര്‍ട്ട്. അഭിനയിച്ചു കൊണ്ടിരുന്ന സീരിയലിന്റെ സെറ്റിലെ മേക്കപ്പ് റൂമിലാണ് നടി ജീവനൊടുക്കിയത്.

മഹാരാഷ്ട്രയില്‍ നടിയുടെ ആത്മഹത്യ 'ലവ് ജിഹാദിനെ' തുടര്‍ന്നാണെന്ന് ആരോപിച്ച് ബി.ജെ.പി എം.എല്‍.എ രംഗത്ത്. മഹാരാഷ്ട്ര ബി.ജെ.പി എം.എല്‍.എ രാം കദം ആണ് വിദ്വേഷ പ്രസ്താവനയുമായി രംഗത്തെത്തിയത്.

തുനിഷയുടെ കുടുംബത്തിന് നീതി ലഭിക്കും. കേസിന് ലൗ ജിഹാദുമായി ബന്ധമുണ്ടോ ഇല്ലയോ എന്ന് ഞങ്ങള്‍ കണ്ടെത്തും. ബന്ധമുണ്ടെങ്കില്‍ അതിന് പിന്നിലെ ഗൂഢാലോചനക്കാരെയും സംഘടനകളെയും തുറന്നുകാട്ടുമെന്നും ബിജെപി നേതാവ് പറഞ്ഞു.

ആത്മഹത്യക്ക് കാരണം എന്തായിരുന്നു? ഇതില്‍ ലൗ ജിഹാദ് ഉണ്ടോ? അതോ മറ്റെന്തെങ്കിലും പ്രശ്നമുണ്ടോ? അന്വേഷണത്തില്‍ സത്യം പുറത്തുവരും. ഇത് ലൗ ജിഹാദാണെങ്കില്‍, അതിന് പിന്നില്‍ ഗൂഢാലോചന നടത്തിയവര്‍ ആരാണെന്ന് പൊലീസ് അന്വേഷിക്കുമെന്നും എം.എല്‍എ കൂട്ടിച്ചേര്‍ത്തു.

ടെലിവിഷന്‍ പരമ്പരയിലെ തുനിഷയുടെ സഹനടന്‍ ഷീസന്‍ മുഹമ്മദ് ഖാനെതിരെ തുനിഷയുടെ അമ്മയുടെ പരാതിയുടെ അടിസ്ഥാനത്തില്‍ ആത്മഹത്യ പ്രേരണ കുറ്റത്തിന് കേസെടുത്തിരുന്നു. ഇരുവരും ഡേറ്റിംഗിലായിരുന്നെന്നും 15 ദിവസം മുമ്പ് ഇവര്‍ വേര്‍പിരിഞ്ഞെന്നും ഇത് നടിയെ ആത്മഹത്യയുടെ വക്കിലേക്ക് തള്ളിയിരിക്കാമെന്നും എഫ്.ഐ.ആറില്‍ പറയുന്നു.

അമ്മയുടെ പരാതിയെതുടര്‍ന്നാണ് ഷീസന്‍ മൊഹമ്മദ് ഖാനെ പൊലീസ് അറസ്റ്റ് ചെയ്തത്. ഇദ്ദേഹത്തെ നാല് ദിവസം റിമാന്റില്‍ വെച്ചു. നേരത്ത തുനിഷ ശര്‍മ്മ ആത്മഹത്യ ചെയ്യുന്ന സമയത്ത് ഗര്‍ഭിണി ആയിരുന്നെന്ന് വാര്‍ത്തയുണ്ടായിരുന്നു. എന്നാല്‍ ഈ വാര്‍ത്ത തെറ്റാണെന്ന് എസിപി പിന്നീട് സ്ഥിരീകരിച്ചു.

പോസ്റ്റ് മോര്‍ട്ടം റിപ്പോര്‍ട്ടിന് ശേഷമാണ് എസിപി തുനിഷ ശര്‍മ്മ ഗര്‍ഭിണി ആയിരുന്നില്ലെന്ന് സ്ഥിരീകരിച്ചത്. തുനിഷ ശര്‍മ്മയുമായി പ്രണയം തുടങ്ങുന്നതിന് മുന്‍പ് ഷീസാന്‍ മൊഹമ്മദ് ഖാന് മറ്റൊരു നടിയുമായി പ്രണയുണ്ടായിരുന്നു. 20 വയസ്സേ ഉള്ളൂ ആത്മഹത്യ ചെയ്ത തുനിഷ ശര്‍മ്മയ്ക്ക്. ജിയാഖാന്‍, സുശാന്ത് സിങ്ങ് രാജ്പുത് തുടങ്ങിയ യുവതാരങ്ങളുടെ ആത്മഹത്യകള്‍ പോലെ തുനിഷ ശര്‍മ്മയുടെ ആത്മഹത്യയും പ്രതിയെ കണ്ടെത്താതെ അവസാനിച്ചേക്കുമോ എന്ന് പലര്‍ക്കും ആശങ്കയുണ്ട്.

ആലിബാബ ദാസ്താന്‍ ഇ കാബൂള്‍ എന്ന പരമ്പരയില്‍ ഷെഹ്‌സാദി മറിയം എന്ന കഥാപാത്രത്തെ അവതരിപ്പിച്ചുവരികയായിരുന്നു. ഭാരത് കാ വീര്‍പുത്ര മഹാറാണ പ്രതാപ് എന്ന പരമ്പരയിലൂടെയാണ് ടെലിവിഷന്‍ രംഗത്തെത്തുന്നത്. ഒട്ടേറെ സിനിമകളിലും തുനിഷ ശര്‍മ്മ അഭിനിയിച്ചിട്ടുണ്ട്. ഫിത്തൂര്‍, ബാര്‍ ബാര്‍ ദേഖോ തുടങ്ങിയ ചിത്രങ്ങളില്‍ കത്രിന കൈഫിന്റെ സഹോദരിയുടെ വേഷത്തിലും നടി എത്തി. ചക്രവര്‍ക്കി അശോക സമ്രാട്ട്, ഗബ്ബാര്‍ പൂഞ്ച്വാല, ഷെര്‍ ഇ പഞ്ചാബ് മഹാരാജ രഞ്ജിത് സിംഗ്, ഇന്റര്‍നെറ്റ് വാലാ ലവ്. സുബ്ഹാന്‍ അല്ലാ തുടങ്ങിയവയാണ് തുനിഷ അഭിനയിച്ച ശ്രദ്ധേയമായ പരമ്പരകള്‍.