സര്‍വകലാശാല ചാന്‍സലര്‍ പദവിയില്‍ നിന്നും ഗവര്‍ണറെ പുറത്താക്കാന്‍ ബില്‍ പാസാക്കിയ സര്‍ക്കാരിനും പാര്‍ട്ടിയ്ക്കും വലിയ തിരിച്ചടിയാണ് ഗവര്‍ണറുടെ ഭാഗത്ത് നിന്നും ഉണ്ടാകുന്നത്. സജി ചെറിയാനെ വീണ്ടും മന്ത്രിയായി സത്യപ്രതിജ്ഞ ചെയ്യിക്കണമെന്ന മുഖ്യമന്ത്രിയുടെ ശുപാര്‍ശയില്‍ ആവശ്യത്തിന് സമയമെടുത്ത് ആലോചിച്ച് തീരുമാനമെടുത്താല്‍ മതിയെന്ന് ഗവര്‍ണര്‍ക്ക് നിയമോപദേശം.

സര്‍ക്കാരും മുഖ്യമന്ത്രിയും ആവശ്യപ്പെട്ടാലും ഇക്കാര്യത്തില്‍ സ്വയം ബോധ്യപ്പെടുംവരെ സമയമെടുക്കാം. മുഖ്യമന്ത്രി ആവശ്യപ്പെട്ടു എന്ന് കരുതി അതിവേഗം തീരുമാനമെടുക്കേണ്ട കാര്യമില്ല. ഭരണഘടനയെ അവഹേളിച്ചെന്ന കേസില്‍ കോടതി കുറ്റാരോപിതന് ക്ലീന്‍ചിറ്റ് നല്‍കിയിട്ടില്ല. ഭരണഘടനാ തത്വങ്ങള്‍ പാലിക്കപ്പെടുന്നുണ്ടെന്നും സംരക്ഷിക്കപ്പെടുന്നുണ്ടെന്നും ഉറപ്പാക്കേണ്ട ബാധ്യതയുണ്ടെന്നും ഗവര്‍ണര്‍ക്ക് ലഭിച്ച നിയമോപദേശത്തിലുണ്ട്.

ഇതോടെ ബുദ്ധനാഴ്ച തന്നെ സജി ചെറിയാന്റെ സത്യപ്രതിജ്ഞ നടക്കുമോയെന്ന കാര്യം അനിശ്ചിതത്വത്തിലായി. നാലിന് സത്യപ്രതിജ്ഞ നടത്താന്‍ മുഖ്യമന്ത്രി സമയം ചോദിച്ചതോടെയാണ് ഗവര്‍ണര്‍ നിയമോപദേശം തേടിയത്. സജി ചെറിയാന്റെ മന്ത്രിസഭാ പുനപ്രവേശനം നിയമപരമാണോ എന്ന് പരിശോധിക്കാനാണ് സ്റ്റാന്റിംഗ് കൗണ്‍സിലിനോട് ഗവര്‍ണര്‍ ആവശ്യപ്പെട്ടത്.

മന്ത്രിമാരെ നിശ്ചയിക്കാനുള്ള അധികാരം മുഖ്യമന്ത്രിക്കാണെന്നും തീരുമാനം മുഖ്യമന്ത്രി അറിയിച്ചാല്‍ അത് ചോദ്യം ചെയ്യാന്‍ ഭരണഘടനാപരമായി ഗവര്‍ണര്‍ക്ക് അധികാരമില്ലെന്നുമാണ് നിയമോപദേശം. ആവശ്യമെങ്കില്‍ ഗവര്‍ണര്‍ക്ക് സര്‍ക്കാരിനോട് കൂടുതല്‍ വ്യക്തത തേടാം.

ഈ നിയമോപദേശം കിട്ടയതോടെ ഗവര്‍ണറുടെ തീരുമാനം നിര്‍ണായകമാകും. സജി ചെറിയാനെ മന്ത്രിസഭയില്‍ തിരിച്ചെടുത്ത് സത്യപ്രതിജ്ഞ ചെയ്യിക്കണമെന്ന മുഖ്യമന്ത്രിയുടെ ശുപാര്‍ശയില്‍ ഗവര്‍ണര്‍ ആരിഫ് മുഹമ്മദ് ഖാന്‍ ഇന്നു തീരുമാനമെടുക്കാനാണ് സാധ്യത. മുഖ്യമന്ത്രി പിണറായി വിജയനോട് ഇക്കാര്യത്തില്‍ വിശദീകരണം തേടാനാണ് സാധ്യത. നാളെ സത്യപ്രതിജ്ഞ നടക്കുന്ന കാര്യത്തില്‍ അനിശ്ചിതത്വം തുടരുകയാണ്.

മുഖ്യമന്ത്രിയുടെ ആവശ്യത്തിന് എളുപ്പം വഴങ്ങില്ലെന്ന സൂചനയാണ് ഗവര്‍ണറുടേത്. ഭരണഘടനയുടെ അന്തസ്സിനെ അപമാനിച്ചെന്നതാണ് കേസ് എന്നും ഇത് അസാധാരണമാണെന്നും ഗവര്‍ണര്‍ ചൂണ്ടിക്കാട്ടി. മുഖ്യമന്ത്രിക്കു പോലും അംഗീകരിക്കാന്‍ കഴിയാത്ത സാഹചര്യത്തിലാണു രാജിവയ്‌ക്കേണ്ടി വന്നത്. ആ സാഹചര്യം മാറിയോ എന്നു പരിശോധിക്കും.

തിരിച്ചെടുക്കുന്നതിനുള്ള നടപടിയെ സ്വാഭാവികം എന്നു പറയാന്‍ സാധിക്കില്ല. സജി ചെറിയാനെ വീണ്ടും മന്ത്രിയായി സത്യപ്രതിജ്ഞ ചെയ്യിക്കണമെന്ന് ആവശ്യപ്പെട്ടു മുഖ്യമന്ത്രിയുടെ അറിയിപ്പ് ലഭിച്ചു. ഇതു സംബന്ധിച്ചു നിയമോപദേശം തേടുക എന്നത് സ്വാഭാവിക നടപടിയാണ്. അതു പരിശോധിച്ചു തീരുമാനമെടുക്കും. നിയമോപദേശകന്റെ അഭിപ്രായം പരിഗണിക്കും.

അതിനു ശേഷമായിരിക്കും തീരുമാനമെന്നും തിരുവനന്തപുരത്തു മടങ്ങിയെത്തിയ അദ്ദേഹം പറഞ്ഞു. മുഖ്യമന്ത്രി ആവശ്യപ്പെട്ടാല്‍ മന്ത്രിയെ സത്യപ്രതിജ്ഞ ചെയ്യിക്കാന്‍ ഗവര്‍ണര്‍ക്കു ബാധ്യതയുണ്ട്. ഗവര്‍ണറുടെ പ്രീതി നഷ്ടപ്പെട്ടാലും മന്ത്രിയെ പിന്‍വലിക്കാനുള്ള അധികാരം മുഖ്യമന്ത്രിക്കാണ്. ഈ സാഹചര്യത്തില്‍, ഭരണഘടനാ വിരുദ്ധ പ്രസംഗം നടത്തിയതിന്റെ പേരില്‍ കോടതിയിലുള്ള കേസില്‍ സജി ചെറിയാനെ കുറ്റവിമുക്തനാക്കിയോ എന്നായിരിക്കും പ്രധാനമായും ഗവര്‍ണര്‍ ആരായുക. അദ്ദേഹം രാജിവച്ചപ്പോഴും വീണ്ടും മന്ത്രിയാക്കണമെന്നു ശുപാര്‍ശ ചെയ്തപ്പോഴും കാരണം എന്തെന്നു മുഖ്യമന്ത്രി വിശദീകരിച്ചിരുന്നില്ല.

രാജിവച്ചയാളെ വീണ്ടും എന്തിനു സത്യപ്രതിജ്ഞ ചെയ്യിക്കുന്നു എന്ന് ഗവര്‍ണര്‍ക്ക് ആരായാം. എന്തുകൊണ്ട് രാജി വച്ചു, എന്തു കൊണ്ടാണ് വീണ്ടും സത്യപ്രതിജ്ഞ ചെയ്യിക്കുന്നത്, ഇതുമായി ബന്ധപ്പെട്ട കേസ് കോടതിയില്‍ നിലവിലുണ്ടോ തുടങ്ങിയവ ആയിരിക്കും ഗവര്‍ണര്‍ ചോദിക്കുക. വിശദീകരണം തൃപ്തികരമാണെങ്കില്‍ സത്യപ്രതിജ്ഞ നടക്കും. അല്ലെങ്കില്‍ ഗവര്‍ണര്‍ക്ക് കോടതിയുടെ തീരുമാനത്തിനു കാത്തിരിക്കാം. സജി ചെറിയാനെ സത്യപ്രതിജ്ഞ ചെയ്യിക്കേണ്ട അടിയന്തര സാഹചര്യം ഇല്ലെന്നാണ് രാജ്ഭവന്റെ വിലയിരുത്തല്‍.