രാജ്യത്തെ സ്റ്റാർട്ടപ്പ് ആവാസവ്യവസ്ഥയ്ക്ക് കരുത്തുപകർന്നുകൊണ്ട്,  17 സ്റ്റാർട്ടപ്പുകളിലായി 13.5 കോടിയിലധികം രൂപയുടെ നിക്ഷേപ വാഗ്ദാനങ്ങൾ പ്രൊമിത്യൂസ് ഇന്നൊവേഷൻ കോൺക്ലേവ് 2026-ൽ പ്രഖ്യാപിച്ചു.

സോലസ്‌ലെറ്റ്‌സിൻ പ്രൈവറ്റ് ലിമിറ്റഡ്, ജേർണീസ് വേൾഡ് ട്രാവൽ ആൻഡ് ടൂറിസം, ബാബിൾടൈം പ്രൈവറ്റ് ലിമിറ്റഡ്, ലൈറാബൈറ്റ്സ് ടെക്നോളജീസ് തുടങ്ങിയ സ്റ്റാർട്ടപ്പുകൾക്ക് സാമ്പത്തിക സഹായവും  കൂടാതെ ഫുഡൂ ഓർഡറിങ് സൊല്യൂഷൻസ്, പ്ലീറ്റ് ഇൻക്, മൈക്രോവിൻ സ്റ്റെറിസൊല്യൂഷൻസ് തുടങ്ങിയ കമ്പനികളുടെ അന്താരാഷ്ട്രതലത്തിലുള്ള വിപുലീകരണത്തിന് പിന്തുണ നൽകുന്ന പ്ലാറ്റ്‌ഫോം അധിഷ്ഠിത നിക്ഷേപ അവസരങ്ങളും കോൺക്ലേവിൽ അനാവരണം ചെയ്തു.

കേരളത്തിലെ സ്റ്റാർട്ടപ്പ് മേഖലയിലെ നിക്ഷേപ അവസരങ്ങൾക്കും  പുതിയ ആശയങ്ങൾക്കും  കോൺക്ലേവ് വലിയ ഉത്തേജനമാണ് നൽകിയിരിക്കുന്നതെന്ന് പവിഴം ഗ്രൂപ്പ് മാനേജിങ് ഡയറക്ടർ എൻ. പി. ആന്റണി ചടങ്ങ് ഉദ്ഘാടനം ചെയ്തുകൊണ്ട് പറഞ്ഞു.

കൊച്ചി എയർപോർട്ട് റോഡിലെ ഫോർച്യൂൺ ഹോട്ടലിൽ പ്രൊമിത്യൂസ് പ്രൊജക്ട്സ് പ്രൈവറ്റ് ലിമിറ്റഡ് ആണ് പരിപാടി സംഘടിപ്പിച്ചത്. ആശയ രൂപീകരണ ഘട്ടത്തിലുള്ള സ്റ്റാർട്ടപ്പുകൾക്കുള്ള റിസ്ക് ക്യാപിറ്റൽ, വളർച്ചാ ഘട്ടത്തിലുള്ള കമ്പനികൾക്കായുള്ള ഗ്രോത്ത് ക്യാപിറ്റൽ, അന്താരാഷ്ട്ര വിപുലീകരണം ലക്ഷ്യമിടുന്ന ബിസിനസുകൾക്കായുള്ള ഗ്ലോബൽ ക്യാപിറ്റൽ എന്നിങ്ങനെ മൂന്ന് പ്രധാന നിക്ഷേപ വിഭാഗങ്ങളിലാണ് തങ്ങൾ ശ്രദ്ധ കേന്ദ്രീകരിക്കുന്നതെന്ന് പ്രൊമിത്യൂസ് പ്രൊജക്ട്സ് വ്യക്തമാക്കി. കോൺക്ലേവിന്റെ ഭാഗമായി സ്റ്റാർട്ടപ്പുകൾ, വിദ്യാഭ്യാസ സ്ഥാപനങ്ങൾ, വ്യവസായ മേഖല എന്നിവ തമ്മിലുള്ള സഹകരണം ശക്തമാക്കുന്നതിനും അക്കാദമിക രംഗവും സംരംഭകത്വവും തമ്മിലുള്ള വ്യത്യാസം ഇല്ലാതാക്കുന്നതിനുമായി സഹൃദയ കോളേജ്, കാർമൽ കോളേജ് എന്നിവയുമായി കമ്പനി ധാരണാപത്രങ്ങളിൽ ഒപ്പുവെച്ചു.

സ്റ്റാർട്ടപ്പുകളെയും അക്രഡിറ്റഡ് നിക്ഷേപകരെയും ഒരേ പ്ലാറ്റ്‌ഫോമിൽ എത്തിക്കുക എന്ന ലക്ഷ്യത്തോടെ പ്രൊമിത്യൂസ് പ്രൊജക്ട്സിന്റെ മുൻനിര പ്ലാറ്റ്‌ഫോമായ VentureNavigator.vc വഴിയാണ് കോൺക്ലേവ് സംഘടിപ്പിച്ചത്. ആശയ രൂപീകരണ ഘട്ടത്തിലും പ്രാരംഭ-വളർച്ചാ ഘട്ടങ്ങളിലുമുള്ള സ്റ്റാർട്ടപ്പുകൾക്ക് സീഡ്, എയ്ഞ്ചൽ നിക്ഷേപങ്ങൾ ലഭ്യമാക്കുന്നതിനെക്കുറിച്ചും നിക്ഷേപ വൈവിധ്യവൽക്കരണത്തിന്റെ പ്രാധാന്യത്തെക്കുറിച്ചും ചർച്ചകൾ നടന്നു.

 ഇന്ത്യയിൽ നിന്നും വിദേശത്തു നിന്നുമുള്ള വിദഗ്ധർ പങ്കെടുത്ത പാനൽ ചർച്ചകൾ, ആഗോള സ്റ്റാർട്ടപ്പ് ആവാസവ്യവസ്ഥയുടെ വികാസത്തെക്കുറിച്ച് പ്രതിനിധികൾക്ക് പുതിയ കാഴ്ചപ്പാടുകൾ നൽകി. പ്രൊമിത്യൂസ് പ്രൊജക്ട്സ് ഡയറക്ടർ പ്രദീപ് പി. എസ്. ചടങ്ങിൽ സ്വാഗതം ആശംസിച്ചു. സഹ ഡയറക്ടർമാരായ ആൽബി ആന്റണിയും വിവേക് എം. വി.യും കമ്പനിയുടെ ഭാവി കാഴ്ചപ്പാടുകൾ അവതരിപ്പിച്ചു.

ബീക്കൺ ബാറ്ററീസ് എംഡി ജോസഫ് കണിച്ചായി, മുൻ ഐടി സെക്രട്ടറി എം ശിവശങ്കർ ഐഎഎസ് (റിട്ട),സ്‌റ്റാർട്ടപ്പ് സ്ഥാപകരായ റമീസ് അലി, അമിത് രാമൻ, ഗോഡ്‌വിൻ ആന്റണി, സുരേഷ് ഗോപിനാഥ്, അനീഷ് എസ് എന്നിവരും ചടങ്ങിൽ പങ്കെടുത്തു.