എരുമേലി കാളകെട്ടി അഴുതനദിയില്‍ കുളിക്കാനിറങ്ങിയ  ശബരിമല തീര്‍ത്ഥാടകന്‍ മുങ്ങിമരിച്ചു. തിരുവനന്തപുരം ചെങ്കല്‍ചൂള രാജാജി നഗര്‍ സ്വദേശി അഭിലാഷ് (38) ആണ് മരിച്ചത്.

ഒപ്പം കുളിക്കാനിറങ്ങിയ കണ്ണനെന്നയാളെ കാണാതായി. ഇന്നലെ രാതി എട്ടോടെയായിരുന്നു സംഭവം. നാലു കുട്ടികളും അഞ്ച് മുതിര്‍ന്നവരുമടക്കം ഒന്‍പതംഗ സംഘമാണ് ശബരിമല തീര്‍ത്ഥാടനത്തിനായി എത്തിയത്.

അഭിലാഷും കണ്ണനും കുളിക്കാനായി അഴുതക്കടവില്‍ ഇറങ്ങുകയായിരുന്നു. തിരിച്ചെത്താതിരുന്നതിനെ തുടര്‍ന്ന് ഒപ്പം ഉണ്ടായിരുന്നവര്‍ അന്വേഷിച്ചെത്തിയപ്പോഴാണ് അഭിലാഷ് വെള്ളത്തില്‍കിടക്കുന്നതായി കണ്ടത്.

ഇവരുടെ നിലവിളി കേട്ടെത്തിയവര്‍ അഭിലാഷിനെ ആശുപത്രിയില്‍ എത്തിച്ചെങ്കിലും മരിച്ചു. കണ്ണനായി എരുമേലി പൊലീസും ഫയര്‍ഫോഴ്സും, നാട്ടുകാരും തെരച്ചില്‍ നടത്തിയെങ്കിലും രാത്രി വൈകിയും കണ്ടെത്താനായില്ല.