ഐപിഎല്ലിൽ ഗുജറാത്ത് ടൈറ്റൻസിനെതിരേ ജയം സ്വന്തമാക്കി മുംബൈ ഇന്ത്യൻസ്. 99 റൺസിനാണ് മുംബൈയുടെ ജയം. മുംബൈ ഉയർത്തിയ 200 റൺസ് വിജയലക്ഷ്യത്തിലേക്ക് ബാറ്റേന്തിയ ഗുജറാത്ത് 100 റൺസിന് പുറത്തായി.

അശ്വനി കുമാർ നാല് വിക്കറ്റെടുത്തപ്പോൾ സൂപ്പർ താരം ജസ്പ്രീത് ബുംറയും ഫോമിലേക്കുയരുകയായിരുന്നു. നേരത്തേ സെഞ്ചുറി തികച്ച തിലക് വർമയുടെ ഒറ്റയാൾ പോരാട്ടമാണ് മുംബൈക്ക് മികച്ച സ്‌കോർ സമ്മാനിച്ചത്. 45 പന്തിൽ നിന്ന് താരം 101 റൺസെടുത്ത് പുറത്താവാതെ നിൽക്കുകയായിരുന്നു.

മറുപടി ബാറ്റിങ്ങിനിറങ്ങിയ ഗുജറാത്തിനെ തുടക്കത്തിൽ തന്നെ മുംബൈ ബൗളർമാർ വിറപ്പിക്കുകയായിരുന്നു. ആദ്യ പന്തിൽ തന്നെ ജസ്പ്രീത് ബുംറ സായ് സുദർശനെ പുറത്താക്കി. ടൂർണമെന്റിലെ ബുംറയുടെ ആദ്യ വിക്കറ്റാണിത്. പിന്നാലെ ബാറ്റർമാർ നിരനിരയായി കൂടാരം കയറിയതോടെ ഗുജറാത്ത് പ്രതിരോധത്തിലാകുകയും ചെയ്തു.

ജോസ് ബട്ട്‌ലർ അഞ്ച് റൺസെടുത്ത് മടങ്ങി. ശുഭ്മാൻ ഗിൽ 14 റൺസെടുത്തപ്പോൾ വാഷിങ്ടൺ സുന്ദർ 26 റൺസെടുത്തു. പിന്നാലെ ഗ്ലെൻ ഫിലിപ്‌സും വെറും ആറ് റൺസ് മാത്രമെടുത്ത് പുറത്തായതോടെ ടീം 55-5 എന്ന നിലയിലേക്ക് വീണു. പിന്നീട് അശ്വനി കുമാറിന്റെ തകർപ്പൻ ബൗളിങ്ങിനാണ് സ്റ്റേഡിയം സാക്ഷ്യം വഹിച്ചത്. 11-ാം ഓവറിൽ രാഹുൽ തെവാട്ടിയയേയും(8) 13-ാം ഓവറിൽ റാഷിദ് ഖാൻ(4), ഷാരൂഖ് ഖാൻ(17) എന്നിവരെയും അശ്വനി കുമാർ മടക്കി. . ഒടുക്കം 100 റൺസിന് ഗുജറാത്ത് പുറത്തായി. മുംബൈ നിശ്ചിത 20 ഓവറിൽ അഞ്ച് വിക്കറ്റ് നഷ്ടത്തിൽ 199 റൺസാണെടുത്തത്.