രണ്ടുനാലു ദിനംകൊണ്ടൊരുത്തനെ... പല പരിശ്രമങ്ങള് നടത്തിയിട്ടും അദാനി ഗ്രൂപ്പ് കടുത്ത പ്രതിസന്ധിയില്; ഓഹരികളില് ഇടിവ് തുടരുന്നു; വായ്പാ വിവരങ്ങള് തേടി ആര്ബിഐ; അദാനി ഗ്രൂപ്പിന് കേന്ദ്രത്തിന്റെ വഴിവിട്ട സഹായത്തില് രാജ്യവ്യാപക പ്രതിഷേധവുമായി കോണ്ഗ്രസ്; കേന്ദ്ര സര്ക്കാരിനും സമ്മര്ദം
വരുമ്പോള് എല്ലാം കൂടി മലപോലെ വരുമെന്ന് പറയുന്നത് അദാനിയെ സംബന്ധിച്ചും ഫലിക്കുകയാണ്. കടുത്ത സാമ്പത്തിക പ്രതിസന്ധിക്ക് പിന്നാലെ നടപടിയ്ക്കായി കോണ്ഗ്രസ് പ്രക്ഷോഭത്തിന് ഒരുങ്ങുകയാണ്.
അദാനി ഗ്രൂപ്പ് നേരിടുന്ന പ്രതിസന്ധി കൂടുതല് രൂക്ഷമാവുന്നു. ഓഹരികള്ക്കൊപ്പം അദാനിയുടെ കടപത്രങ്ങള്ക്കും അന്താരാഷ്ട്ര വിപണിയില് വിലയിടിഞ്ഞു.
വായ്പയ്ക്ക് ഈടായി അദാനിയില് നിന്ന് ഓഹരികള് സ്വീകരിക്കുന്നത് ബാങ്കുകളും നിര്ത്തിത്തുടങ്ങി. ഓഹരിവിപണിയില് ഇന്നും കൂപ്പുകുത്തി വീണതോടെ അദാനിയുടെ ഓഹരി മൂല്യത്തില് ഒരാഴ്ചയുണ്ടായ ഇടിവ് എട്ടര ലക്ഷം കോടി രൂപ കടന്നു. ഒരു വശത്ത് അദാനിയുടെ ഓഹരികള് നിലയില്ലാതെ താഴേക്ക് വീണ് കൊണ്ടിരിക്കുന്നു. പ്രതിസന്ധിയില് നിന്ന് കരകയറാനാകാതെ വലയുമ്പോഴാണ് അന്താരാഷ്ട്ര വിപണിയില് അദാനിയുടെ കടപ്പത്രങ്ങളും തകര്ച്ച നേരിടുന്നത്.
അദാനിഗ്രൂപ്പ് കമ്പനികളുടെ കടപ്പത്രങ്ങള് പണയമായി സ്വീകരിച്ച് വായ്പനല്കേണ്ടെന്ന സ്വിസ് ബാങ്കിങ് ഗ്രൂപ്പായ ക്രെഡിറ്റ് സ്യൂസിയുടെ തീരുമാനം വന്നതിന് പിന്നാലെയാണ് ഈ വീഴ്ചയുടെ വേഗം കൂടിയത്. അദാനി പോര്ട്സ്, അദാനി ഗ്രീന് എനര്ജി എന്നിവയുടെ കടപ്പത്രങ്ങള്ക്കാണ് വന് വിലയിടിവുണ്ടായതറ. ഓഹരി ഈടായി വാങ്ങി അദാനിക്ക് ഇനി വായ്പയില്ലെന്ന് സിറ്റി ഗ്രൂപ്പ് പറയുന്നു.
ഓഹരി മൂല്യം ഇടിഞ്ഞതിനാല് കൂടുതല് ഓഹരി ഈടായി ചോദിക്കുകയാണ് ബാര്ക്ലെയ്സ് ബാങ്ക്. അതിനിടെ അദാനിക്ക് നല്കിയ വായ്പാ വിവരങ്ങള് റിപ്പോര്ട്ട് ചെയ്യാന് ഇന്ത്യന് ബാങ്കുകളോട് ആര്ബിഐ ആവശ്യപ്പെട്ടെന്ന വിവരവും ഇന്ന് പുറത്ത് വന്നു. തുടര് ഓഹരി വില്പന റദ്ദാക്കി നിക്ഷേപക താത്പര്യങ്ങള്ക്കൊപ്പമെന്ന് ഗൗതം അദാനി പറയുമ്പോഴും അദാനി എന്റെര്പ്രൈസസിന്റെ ഓഹരി വില ഇന്നലെയും 26 ശതമാനത്തിലേറെ താഴ്ന്നു. 100 ബില്യണ് ഡോളറിലേറെയാണ് ഹിന്ഡന്ബെര്ഗ് റിസര്ച്ച് റിപ്പോര്ട്ടിന് പിന്നാലെ അദാനിക്കുണ്ടായ നഷ്ടം.
അതേസമയം കേന്ദ്രത്തെ സമ്മര്ദത്തിലാക്കി കോണ്ഗ്രസ്. എല്.ഐ.സി,എസ്.ബി.ഐ പോലുള്ള പൊതുമേഖലാ സ്ഥാപനങ്ങളെ ദുരുപയോഗം ചെയ്ത് അദാനി ഗ്രൂപ്പിനെ വഴിവിട്ട് സഹായിച്ച കേന്ദ്ര സര്ക്കാര് നടപടിക്കെതിരെ രാജ്യവ്യാപക പ്രതിഷേധവുമായി കോണ്ഗ്രസ്. കേന്ദ്ര നടപടിയില് അന്വേഷണം ആവശ്യപ്പെട്ട് കോണ്ഗ്രസ് രാജ്യവ്യാപകമായി ജില്ലാതലങ്ങളില് പ്രതിഷേധം സംഘടിപ്പിക്കുമെന്ന് എഐസിസി ജനറല് സെക്രട്ടറി കെ.സി.വേണുഗോപാല് എംപി അറിയിച്ചു.
സുപ്രീം കോടതി ചീഫ് ജസ്റ്റിസിന്റെ കീഴില് നിഷ്പക്ഷമായോ അല്ലെങ്കില് സംയുക്ത പാര്ലമെന്ററി സമിതിയുടെ മേല്നോട്ടത്തിലോ അന്വേഷണം നടത്തണം, നിക്ഷേപര്ക്ക് സംരക്ഷണം ഉറപ്പാക്കാന് ആവശ്യമായ നടപടികള് സ്വീകരിക്കണം, എല്.ഐ.സി., എസ്.ബി.ഐ, മറ്റ് ബാങ്കുകള് എന്നിവയെനിര്ബന്ധിച്ച് ആദാനി ഗ്രൂപ്പില് ഓഹരി നിക്ഷേപിക്കാനുണ്ടായ സാഹചര്യം പാര്ലമെന്റില് ചര്ച്ചചെയ്യണം എന്നിവയാണ് കോണ്ഗ്രസിന്റെ പ്രധാന ആവശ്യങ്ങള്.
ഇവ ഉന്നയിച്ചാണ് ഫെബ്രുവരി 6ന് രാജ്യവ്യാപകമായി ലൈഫ് ഇന്ഷുറന്സ് കോര്പ്പറേഷന്, സ്റ്റേറ്റ് ബാങ്ക് ഓഫ് ഇന്ത്യ എന്നിവയുടെ ജില്ലാ ഓഫീസുകള്ക്ക് മുന്നില് പ്രതിഷേധ മാര്ച്ചും ധര്ണ്ണയും സംഘടിപ്പിക്കുക.
പൊതുജനങ്ങളില് നിന്ന് സമാഹരിച്ച പണം കൊണ്ട് പ്രവര്ത്തിക്കുന്ന പൊതുമേഖല സ്ഥാപനങ്ങളായ എല്ഐസിയേയും എസ്.ബി.ഐയേയും മോദി സര്ക്കാര് അദാനിക്ക് തീറെഴുതി. ഈ സ്ഥാപനങ്ങളില് നിന്നും കോടി കണക്കിന് തുകയാണ് അദാനിയെ വഴിവിട്ട് സഹായിക്കുന്നതിനും സാമ്പത്തിക നേട്ടം ഉണ്ടാക്കുന്നതിനും അവരുടെ കമ്പനികളില് കേന്ദ്രസര്ക്കാര് നിക്ഷേപിച്ചതെന്ന് കെസി വേണുഗോപാല് ആരോപിച്ചു.
"
https://www.facebook.com/Malayalivartha
