യമനില്‍ വധശിക്ഷക്ക് വിധിക്കപ്പെട്ട മലയാളി നഴ്‌സ് നിമിഷപ്രിയയുടെ (34) ജീവനായുള്ള അവസാന പോരാട്ടത്തിലാണ് ബന്ധുക്കളും കൂട്ടായ്മകളും. അതിനിടെ പ്രതീക്ഷകള്‍ക്ക് മങ്ങല്‍. യമന്‍ പൗരനെ കൊലപ്പെടുത്തിയ കേസില്‍ വധശിക്ഷ നടപ്പാക്കരുതെന്ന് അപേക്ഷിച്ചു മലയാളി നഴ്‌സ് നിമിഷപ്രിയ സമര്‍പ്പിച്ച അപ്പീലില്‍ ഉടന്‍ തീര്‍പ്പു വേണമെന്നു യെമന്‍ സുപ്രീംകോടതിയില്‍ പ്രോസിക്യൂഷന്‍ സമ്മര്‍ദം.

നഴ്‌സ് നിമിഷപ്രിയയുടെ വധശിക്ഷ ഉടന്‍ നടപ്പാക്കണമെന്നാവശ്യപ്പെട്ട് കൊല്ലപ്പെട്ട യുവാവിന്റെ ബന്ധുക്കളാണ് കോടതിയെ സമീപിച്ചത്. സനായിലെ അപ്പീല്‍ കോടതിയെ ആണ് യുവാവിന്റെ ബന്ധുക്കള്‍ സമീപിച്ചത്. നിമിഷപ്രിയയുടെ മോചനത്തിനായി ആക്ഷന്‍ കൗണ്‍സില്‍ രാജ്യാന്തരതലത്തില്‍ ശ്രമങ്ങള്‍ തുടങ്ങിയിരുന്നു കേന്ദ്ര സര്‍ക്കാരും ഇടപെട്ടിരുന്നു.

എന്നാല്‍ നഷ്ടപരിഹാരം സ്വീകരിക്കാന്‍ കൊല്ലപ്പെട്ടയാളുടെ ബന്ധുക്കള്‍ തയാറാകാതെ വന്നതോടെയാണ് അനുരഞ്ജന ശ്രമങ്ങള്‍ നിര്‍ജീവമായത്. കേസിനെ കുറിച്ചോ നിലവിലെ അവസ്ഥയെ കുറിച്ചോ യാതൊരു വിവരവുമില്ലെന്ന് നിമിഷപ്രിയയുടെ അമ്മ പറഞ്ഞു. കേന്ദ്രസര്‍ക്കാര്‍ ഇടപെടാമെന്ന് അറിയിച്ചിരുന്നുവെന്നും അമ്മ പ്രതികരിച്ചു. യെമന്‍ ജയിലില്‍ കഴിയുന്ന നിമിഷ പ്രിയയുടെ വധശിക്ഷ സനയിലെ ഹൈക്കോടതിയും ശരിവച്ചതോടെയാണ് മോചന സാധ്യത മങ്ങിയത്.

മരിച്ച തലാലിന്റെ കുടുംബം മാപ്പ് നല്‍കിയാലേ ഇനി മോചനം സാധ്യമാകൂ. ഇതിനുള്ള പരിശ്രമങ്ങളാണ് ഇപ്പോള്‍ നടക്കുന്നത്. നിയമപരമായ വഴികള്‍ മാത്രമല്ല, ആചാരങ്ങളും പാരമ്പര്യങ്ങളും അനുസരിച്ച് അവര്‍ക്ക് മാപ്പ് ലഭ്യമാക്കാനുള്ള സാധ്യതയും സാമൂഹിക സംഘടനകളുമായി ചേര്‍ന്ന് സര്‍ക്കാര്‍ പരിശോധിക്കുകയാണെന്നാണ് നേരത്തെ കേന്ദ്രം അറിയിച്ചിരുന്നു.

2017 ജൂലൈ 25 നാണ് കേസിന് ആസ്പദമായ സംഭവം നടന്നത്. പാലക്കാട് കൊല്ലങ്കോട് സ്വദേശി നിമിഷ പ്രിയ യെമന്‍കാരനായ തലാല്‍ അബ്ദുമഹ്ദിയെ കൊലപ്പെടുത്തി വീട്ടിലെ വാട്ടര്‍ ടാങ്കില്‍ ഒളിപ്പിച്ചെന്നാണ് കേസ്. തലാലിനൊപ്പം ക്ലിനിക് നടത്തുകയായിരുന്നു നിമിഷപ്രിയ. സ്വന്തമായി ക്ലിനിക് തുടങ്ങാന്‍ സഹായ വാഗ്ദാനവുമായി വന്ന യെമന്‍ പൌരന്‍ തലാല്‍ അബ്ദുമഹദി പാസ്‌പോര്‍ട്ട് പിടിച്ചെടുത്ത് നടത്തിയ ക്രൂര പീഡനമാണ് കൊലപാതകത്തിലേക്ക് നയിച്ചത് എന്നാണ് നിമിഷയുടെ വാദം.

ഈ കേസിലാണ് കൊല്ലപ്പെട്ട യമന്‍ പൗരന്‍ തലാല്‍ അബ്ദു മഹ്ദിയുടെ കുടുംബത്തിനായി വാദിക്കുന്ന സര്‍ക്കാര്‍ അഭിഭാഷകരാണു കോടതിയില്‍ സമ്മര്‍ദം ചെലുത്തുന്നത്. പാലക്കാട് കൊല്ലങ്കോട് സ്വദേശിയായ നിമിഷപ്രിയയുടെ വധശിക്ഷ 2022 മാര്‍ച്ചില്‍ സുപ്രീംകോടതി ശരിവച്ചിരുന്നു. ഇതിനെതിരായ അപ്പീലാണു കോടതിയുടെ പരിഗണനയിലുള്ളത്.

ഇതില്‍ അനുകൂലവിധിയാണു പ്രതീക്ഷിക്കുന്നതെന്നു നിമിഷപ്രിയയുടെ രക്ഷയ്ക്കായി യെമന്‍ തലസ്ഥാനമായ സനയില്‍ പ്രവര്‍ത്തിക്കുന്ന കൂട്ടായ്മയുടെ വക്താവും തമിഴ്‌നാട് സ്വദേശിയുമായ സാമുവേല്‍ ജെറോം ഭാസ്‌കരന്‍ പറഞ്ഞു. കൊല്ലപ്പെട്ട തലാലിന്റെ കുടുംബത്തിനു 'ബ്ലഡ് മണി' (പരിഹാരത്തുക) നല്‍കി നിമിഷയുടെ മോചനം സാധ്യമാക്കാനുള്ള ഫലപ്രദമായ ചര്‍ച്ചകള്‍ ഇനിയും നടന്നിട്ടില്ലെന്ന് അദ്ദേഹം പറയുന്നു

യെമന്‍ പൗരനായ തലാല്‍ മുഹമ്മദിനെ കൊലപ്പെടുത്തിയ കേസില്‍ വധശിക്ഷയ്ക്ക് വിധിക്കപ്പെട്ട് യെമനിലെ ജയിലില്‍ കഴിയുന്ന നിമിഷപ്രിയയുടെ മോചനത്തിനായി വലിയ ശ്രമങ്ങളാണ് നടന്നു വരുന്നത്. നേരത്തെ യെമന്‍ ഉദ്യോഗസ്ഥര്‍ ജയിലിലെത്തി നിമിഷപ്രിയയെ കണ്ടതായാണ് വിവരം. തലാലിന്റെ കുടുംബം ദയധനം സംബന്ധിച്ച് ചര്‍ച്ചയ്ക്ക് തയാറാണെന്ന് ഉദ്യോഗസ്ഥര്‍ അറിയിച്ചു.

50 ദശലക്ഷം യെമെന്‍ റിയാല്‍ ( ഏകദേശം ഒന്നരക്കോടി രൂപ) തലാലിന്റെ കുടുംബം ആവശ്യപ്പെട്ടതായി ഉദ്യോഗസ്ഥര്‍ അറിയിച്ചു. റംസാന്‍ മാസം അവസാനിക്കുന്നതിന് മുന്‍പ് മറുപടി നല്‍കണമെന്നാണ് ഉദ്യോഗസ്ഥര്‍ പറയുന്നത്. നിമിഷപ്രിയയുടെ മോചനത്തിനായി കേന്ദ്ര സംസ്ഥാന സര്‍ക്കാരുകള്‍ ഇടപെടണമെന്ന് കുടുംബം ആവശ്യപ്പെട്ടിരുന്നു. പല ഭാഗത്തു നിന്നുള്ള ഇടപെടലുകള്‍ ഉണ്ടായിട്ടും പുതിയ സംഭവം ആശങ്കയിലാഴ്ത്തുന്നു.